گرو رجنیش وتی کتابے تھا گوشتگ اَت کہ ” اُگدہ مردم ءَ کرپٹ کنت” بلے آئی ءَ من وت نہ زاناں کہ کُجام زانتکار ءِ حوالہ ءَ اے گپ جتگ اَت، ڈینکن یا دگری،،،، اُگدہ چون مردم ءَ کرپٹ کنت ؟ من اے گپ ءَ مناں ھوں نہ مناں ھوں،،، من گُشاں اگدہ مردم ءَ کرپٹ نہ کنت ، بلکیں کرپٹ ءُ سلیں مردم وت اگدہ یے رندا تچیت،، اے جھان ءَ کئے اِنت کہ اگدہ ءِ دز گرگ ءَ پیش  ایماندار بیتگ من گوشاں نیست ، ایمانداریں مردم کدی ھم اُگدہ یے واھگدار نہ اِنت ،، بلکیں آ کہ اگدہ یے رندا تچیت آ وت پیش ءَ کرپٹ بیتگ، پدا انسان پہ ھمے اگدہ ءِ هاترا چی چی نہ کنت ، انسان ءَ پہ ھمے اگدہءِ یے واستہ چی نہ کُتگ، ھلاکو خان ، چنگیز خان ، محمد بن قاسم یا ھٹلر ءُ مسولینی ءَ ھزاراں انسان کُشتگ آں ، پرچہ؟؟؟ ھمے شومیں اگدہ یے ھاترا ،، انسان ھمے اگدہ یے ھاترا چی چی نہ کنت،ھمے اگدہ یے دزگرگ ءِ بازیں رھبند بنت یکے پہ زور ھزاراں انسان کُشیت ءُ اگدہ ءَ دست گیپت، دگری پہ وتارا بے وس زاھر کنان ءَ وت ءَ قوم ءِ بلاھیں دوزواھے زاھر کنان ءَ کئیت ءُ دومی مردمانی سرا چٹی بیت ، پہ درور یک راجدوستی ، کئیت گُدے جنڈاں ، مھلوق ءِ گورا کئیت پہ بزگی گُشے من ءَ ووٹ بِدیئے، من شمے واستہ کار کناں ، شمے واستہ شیر یے جو کاراں، بلے وھدی سوب مند بیت پدا ھچ نہ کنت، وتی بان ءُ بادگیراں گیش کنت ، ھمے واھگ ءَ داریت کہ من ءَ مھلوک ءُ مردم واجہ بو گُشنت،، گُڑا اے مرد اگدہ یے دز گرگ ءَ رند پرچا کرپٹ بیت ؟ پرچا واجہی یے واھگدار بیت،، پیش ءَ ھمے مرد پہ بزگی اتک کہ من ءَ ووٹ بدیئے، بلے رندا چیا چو بوت؟ اے رندا چو نہ بیت، بلکیں اے پیش ءَ ھمے مرد اَت، بلے پہ مھلوک ءِ رد دیگ ءَ آئی ءَ بزگی یے پوشاک گؤرا کُتگ اَت،، بلے وھدی کہ وتی مقصد ءَ سوب مند بیت گُڑا ایشی یے اسل دروشم پدر بوت،، اے مرد پیش ءَ کرپٹ بیتگ، بلے دستی نہ رستگ، اگدھے دزگرگ ءَ گوں اے مرد ھما کنت کہ دلے بلوٹیت،،، پدا انسان وا ھرکس بہ بیت آ اگدہ یے واھگدار بیت ، آ وڑی نا وڑی دومی کس ءَ وتی حکم ءِ پابند کنگ لوٹیت، اے ھر انسان ءِ تب ءُ نفسیات ایں کہ دومی مردم منی حکم ءِ پابند بہ بیت، اے حیوانی تب انسان ءِ سرشت ءُ فطرت ءَ استیں،، شُما دگرا بِلّے ، یک اسکول ٹیچرے ، آ ھم لوٹیت کہ ھما زھگ کہ اسکول ءَ وانگیں ، آ منی حکم ءِ پابند بہ بیت ، آ وتی دل ءِ سھڈینگ ءَ وت ءَ اگدھ دار زاھر کنگ ءَ لٹ دست کنت ءُ ھمے زھگ ءِ سرا وتی حکم  ءَ ھلائینیت،،،،، چیا؟ نا زھگ ءَ لٹ جنگ ءِ ضرورت ایں ناکہ ایشی ءَ لٹ یے دست ءَ کنگ یے ، چیا کہ انسان لائق ءِ لٹ جنَگ نه ایں ،، بلے ھمے ٹیچر چی بہ کنت ؟ ھاکمی لوٹیت حاکمی ئے برجاہ دارگ ءَ الم ترا یکے سرا مسلط بیئگی اِنت۔ اے ٹیچرءِ یا مُلا ءِ دست دگرا نہ رسیت ، گُڑا آ ھمے فطرت ءِ برجاہ دارگ ءَ الم گونڈو ءَ وتی حکم ءِ پابند کنت،،،

 انسان ھمنچو بزگ بہ بیت ، بے وس بہ بیت ، دومی یے غلام بہ بیت ، بلے آئی یے ھمے واجہی یے شوق چر آئی یے دل ءَ در نئیت، آ حاکم بیئگ لوٹیت، کُچک یک ساھداری ، کُچکى بہ بیت یا پَسے بہ بیت یا ھرے ، آئی یے مالک چیا لٹے دست کنت ءُ آئی یے رندا بیت ، شوانگ ءَ چیا لٹے گوں؟  ھمے انسان ءِ واجہی یے شوق انت کہ شوانگ ءَ یا گوال ءَ لٹ دست دنت، شوانگ بے وس انت ، لاچار انت ، پہ لاپ ءِ شوھاز ءَ دگر ءِ پساں چارینیت، بلے آئی یے ھمے واجہی ءُ حاکمی ءِ شوق ھلاس نہ بیت ، چیاکہ اے انسان ءِ تھا حیوانے فطرتیں،،، شوانگ ءِ دست پہ کس ءَ نہ رسیت ، بلے وتی حاکمی یے برجاہ دارگ ءِ ھاترا لٹ ءَ دست کنت ، پسانی سرا یا کُچک ءِ سرا وتی دلے واھگ ءَ پیلہ کنگ لوٹیت، وتی حاکمی ٰے برجاہ دارگ ءَ پس ءُ کُجک ءِ سرا حاکمی کنت , آھاں حکم دنت آھاں لٹ جنت ، شما الم باز شوانگ دیستگ آ گوں پساں گپ جن انت۔ پسانی سرا زھر گرنت ، آھاں زاھ دینت، اے ھمے انسان ءِ نفسیات ایں ، ادا دو گپ دیم ءَ کئیت ۔ یکے اِش انت کہ اگدہ کرپٹ نہ کنت بلکیں کرپٹیں مردم اگدھے رندا تچیت ۔ دومی ھر انسان وڑی نا وڑی حاکمی کنگ لوٹیت، دومی ءَ وتی حکم ءِ پابند کنگ لوٹیت ، دومی سرا مسلط بیئگ لوٹیت ، اگاں کسی حکم ءِ مہ منیت تا آئی ءَ کُشیت یا زاہ ءُ بد کنت،، پدا انوگیں وھد ءَ انسان ءِ تھا حیوانی فطرت ءَ گیش ردوم زُرتگ، من گُشاں انسان ءِ جند کرپٹ جوڑ بیتگ، ھرکس اگدھے واھگ دار جوڑ بیتگ، ھرکس حکم دیئگ لوٹیت، دومی گپ یے مہ گیپت آئی ءَ کُشیت، گار کنت ، انسان حیوان جوڑ بیتگ، نفسیاتی مریض جوڑ بیتگ، پمیشا دُنیا ءِ تھا کُشت ءُ کوش بند نہ بیت ، امن نہ بیت، دُنیا ءَ امن آرگ ءِ ھاترا ، دُنیا ءِ ھر راجاں آزاد کنگ ءِ ھاترا ، انسان ءَ ھمے اگدہ ءِ واھگ داری  ءُ واجہ گیری یے شوق چہ دل ءَ کشگ لوٹیت