ندکار ءَ ماں درانڈیھی نپس گیریں شپاں بازیں یات کاینت۔۔ گوست ءِ یات، ھما بیل ءُ ھمگنگلانی یات ءُ ترانگ کہ زوراکیں وھد ءَ من ءَ چہ آھاں سِست ءُ جتا کُت۔۔اے ترانگ ءُ یات بازیں دردناکیں کِسہ ساچ اَنت۔۔ ھما سنگت ءُ بیلی کہ چما سِست ءُ جتا بیتاں۔ بازیں اے دُنیا ءَ نہ اَنت۔۔۔۔ بلے شپ الم کئیت۔ شپ ءَ ترانگانی لَڑے گون پہ ندکار ءَ۔ کئے اِنت تیز رواجیں وھد ءِ سفر ءَ دزماجن بہ بیت۔۔ شپ گوں دِلراکیں غم ءُ اندوھاں روچ بیت ءُ پدا دومی شپ ءُ دردانی انتظار۔۔۔۔۔۔۔۔ پمیشا مرچاں چاٹ رومانی گواز کنگ ندکار ءِ ھم روچی ئیں کار جوڑ بیتگ۔ دانکہ درانڈیھیں ندکار ھم ڈیھ ءِ ھالاں سرپد بہ بیت۔۔۔۔۔۔ بلے مرچی شپ گوں دگہ آدینکے ءَ گوں ندکار ءَ دوچار کپت۔۔۔ بزاں اینکہ چاٹ رومانی گواز کنگ پد ءَ من یک انچیں ھمگنگل ءُ دوستی ءَ دوچار کپتاں کہ من گوستگیں ھژدہ ماھاں گوں آئی ءَ تران نہ کُتگ۔۔۔ من اِنّا، بلکیں ھمائی ءَ وتی بے دِل ءُ سر سِستگیں دوست در گیپت ءُ گوں من ھمتران بوت۔۔۔۔۔۔۔۔۔
آئی ءِ گپاں گوں من پُرشتاں ءُ چہ ھستاں بے ھست بیتاں۔۔ آئی ءَ وڑ وڑیں آدینک دیم ءَ آؤرت ءُ وڑ وڑیں کِسہ کُت۔۔۔۔ آئی ءَ ھما راج پُلانی کِسہ ھم آؤرتاں کہ چما گِسر بیتگ اَنت ءُ ماتیں گُلزمین ءِ ڈیساں رپتگ اَنت۔۔ آئی ءَھما منی وڑیں بے دِل ءُ درانڈیھیں مردمانی کِسہ ھم آؤرتاں کہ تتکگ ءُ پناہ اِش زُرتگ۔۔۔ آئی ءَ من ءَ دگہ یک پناھگیریں درانڈیھیں سنگتے ءِ ھال دات کہ من دنیگہ آئی ءِ درانڈیھی ءَ سرپد نہ اِتاں۔۔۔۔۔۔ بلے آئی ءِ بس ھمے گپ ءَ من ءَ گیشتر پروشت ءُ دِل زدگ کُت کہ آئی ءَ چہ من ءَ منی فون نمبر لوٹ ات ءُ پدا گُشتے
”ادا بازیں آدینکاں گوں مردم دوچار کپیت، باز تچ ایت ءُ باز شھید بیت، بلے مانَنت ھما کہ شھید بنت”
منی 21 سالئیں اے تمرد ءُ بھادُر ءُ عقل مندیں سنگت ءِ گپاں من ءَپروشت۔ من پُرشت۔ کپتاں ءُ پدا وتی ذات ءِ آدینک ءَ سُرک دات ءُ چار اِت ۔ تہ من زانت کہ من چِنکہ آپ ءَ آں۔۔
