واجہ شما مھر کُتگ ؟ مات ھاک ءِ ڈیساں رپتگیں شھیدیں راج پُل ءِ ابدمانیں مھر ءِ لِذتاں شما آشنایے۔۔۔۔۔ مات ھاک ءِ ھمے مھر اِنت کہ شھیدیں راج پُل ءَ پہ وشیں بانداتے ءِ اوست ءَ ماں ھمے مات ءِ دلبند ءَ واب گیجیت ءُ نمیران کنت۔۔۔۔ واجہ راج پُل جست کنت کہ شما ھمے رِتکگیں ھونانی گُما وفا کُتگ ؟ واجہ وتی دِل ءَ جُست کن یے ؟ پہ راستی ءُ بے ریائی وتی جبین ءِ آدینک ءَ سرُک کن اِت ءُ بچاریے کہ شھیدیں راج پُل ءِ ھون توار جنگ ءَ اَنت کہ شما چنکہ آپ ءِ تھا یے ؟ ھون بس یکیں پسہ ءَ لوٹ اَنت کہ واجہ شما وفا کُتگ۔ مھر کُتگ۔ اگاں ھو گُڑا یک رندے پدا وتی جبین ءِ آدینک ءَ سُرک کن اِت ءُ بچاریے کہ شمے ھر عمل پہ چیا؟ شمئے کردانی باپشت ءَ چونیں واھگے چیر اِنت۔ زید بہ بیت یا بکر، وت ءَ جُست بہ کنت کہ آئی ءِ ھر کرد پہ نام کشی ءُ واجہ گیری ءِ شوق ءِ بنیاد ءَ نہ اِنت ؟ واجہ باریں شما وتی انفرادیت نفی کُتگ ءُ اجتماعی سِنچ ءَ گوں کار کنگ ءَ یے؟ باریں شمئے ھر عمل پہ ذاتی نام کشی ءِ ھاترا نہ اِنت یا شمئے مھر گوں مات ھاک ءَ ھمگرنچ اِنت؟ شما الم گُشئے ھو۔۔۔۔ بلے من گُشاں اِنّاں ۔۔ واجہ شما تہ انگت وتی ذات ءِ نفی نہ کُتگ۔۔۔شما راج پل ءِ شھیدیں ھونانی گما وفا نہ کُتگ ، مات ھاک ءِ مھراں چہ نہ آشنا یے۔۔۔۔۔شما شش گلانی تھا بھرے۔ آجوئی ءِ سِنچ ءَ ھرکس داریت۔ گپ ءَ ھرکس جنت۔ راج ءِ بزگی ءَ ھرکس ماریت۔ بلے چہ مھر ءَ نا آشنا۔۔۔واجہ شما مات مھر ءِ لِذتاں چہ ناآشنا ءُ شھیدیں ھونانی سِنچ ءَ ناپوہ ءُ وتی ذات ءِ قالب ءِ تھا بندیگ یے ءُ یکے دومی ءِ ایر جنگ ءُ کلاگ ءُ چیواہ ءَ وتی وھد ءَ گوازینگ ءَ یے۔۔۔۔ اگاں شما مھر کُتگ، اگاں شما انفرادیت ءِ قالب ءَ درکپتگ یے گُڑا ھما راستی کجام اِنت کہ فقیریں راج شاعر ءَ مارتگ کہ

                بچار قاضی پُسگاں
                گوں ناروائیں کِسہ ءَ
                چے پئیم ءَ بھر بھر بنت
                گوں چاکریں نزوریاں
                زمانگ ءَ گلگ پِریں
                نہ رسم ءُ نہ روایتاں
                اے کُل بلوچ ءِ مال ءُ مت
                ا و اے کُل بلوچ ءِ زندگی
                ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

واجہ رھشون اے گُلزمین بلوچ راج ءِ ڈیھ اِنت۔۔ ادا بلوچ نِشتگ۔۔ سیبی ءَ بگر تاں بے مرادیں گوادر ءَ کراچی تاں چاھبار۔۔۔۔ واجہ ادا بلوچ نِشتگ۔ بلوچ ءِ مرگ ءُ زند گوں ھمے زمین ءَ ھمگرنچ اِنت۔ زمین برؤت گڑا بلوچ ھم رؤت۔ دوئیں ماتیں زبان ھم پشت نہ کپ اَنت۔۔۔ واجہ رھشون اے زمین ءِ پانک پان تو بیتگ یے۔۔۔ بلے تو وت ءَ چہ ذاتی قالب ءَ نہ کَش اِتگ۔۔ تو گپ بلوچ ءِ جتگ۔ بلے مکرانی یے بیتگ یے، مینگلے بیتگ یے۔ جھکرانی ئے بیتگ یے، زھری ئے بیتگ یے، بگٹی یے بیتگ یے۔ مری ئے بیتگ یے۔۔۔۔۔۔۔۔۔واجہ وتی ردیاں بہ مار ، چہ ذات ءِ قالب ءَ درکپ کہ بیگواہ بہ یے۔۔ واجہ مھر ءَ گوں گُلزمین ءَ بہ کن۔ شھیدیں راج پُل ءِ رتکگیں ھوناں گوں وفا بہ کن۔۔۔ بلوچی بو۔ بس تئی پجار بلوچ اِنت۔۔۔۔۔ واجہ بہ زر پہ مھر ءَ۔۔ وتی سِستگیں سنگتاں بہ نَزّار۔۔۔۔ واجہ فاضل سنچ ءَ چہ آشنا بو کہ

ناتپاکی ءَ چی شمارا کَٹ ءُ نپ اِنت

واجہ ردی شمے بیتگ ء ردیانی آس ءَ ھمے بزگیں راج سُتکگ۔ واجہ شمے بے مھری ءُ ناتپاکی ءَ چہ دُژمن ءَ نپ چِست کُتگ۔۔۔واجہ شمئے بے مھریانی آس ءَ مائی کلانچی ءِ ھنکین سُتکگ ءُ برتکگ۔۔۔۔۔ واجہ بلے تہ انگت  شما ھمے بے مھریانی آس ءَ سچگ ءَ یے۔۔۔ تو تہ انگت وتی ردی نہ مارتگ۔۔۔۔ واجہ اختر مینگل ءَ مرچی وتی زبان ءَ وت گُشت کہ ” بزگیں  راج ءَ میار پِر نیست۔ردی مئے رھشونانی بیتگ، کہ ما یکمُشت نہ بیتگیں ءُ راج پھازی نہ کُتگ ءُ ذات ءِ قالب ءَ در نہ کپتگیں” ۔۔۔ بلے باز ءَ ھمے ردی نہ مارتگ ۔ واجہ شما تہ انگت وتی ردی نہ مارتگ ءُ وتی ذات ءِ قالب ءَ در نہ کپتگ یے۔۔۔پمیشا شما مات مھر ءِ لِذتاں چہ نا آشنا یے ءُ یکے گوں دومی ءِ کلاگ ءُ چیواہ ءَ وتی وھد ءَ زوال کنگ ءَ یے۔۔۔۔۔۔۔۔۔۔۔۔۔۔۔۔۔۔

واجہ شھید مات ھاک ءِ دیناں شُتگ۔۔ شھید مات ھاک ءِ مھرانی لِذت ءَ آشنا بوتگ۔۔ چیاکہ شھید بلوچی بیتگ ءُ آئی ءِ ھون بلوچی ھونے بیتگ۔ آ مُرتگ پہ بلوچ ءَ مُرتگ۔۔ بلوچ ءِ دُشمن ءَ کُشتگ۔۔۔ بلے شما یکے راج ءِ شھید گُشتگ ءُ دومی پارٹی ءِ شھید، چیاکہ شما مات ھاک ءِ مھراں نا آشنا بیتگ یے ءُ شھید ءِ ھون ءِ گُما شما وفا نہ کُتگ۔۔۔۔ علاقائی ءُ ذاتی قالب ءِ تھا بند بیتگ یے۔ واجہ تئی راج کواس ءِ قلم ءَ مھر ءُ زانت ءَ ابئید کینگ رودینتگ۔۔۔۔۔۔ واجہ تو شھید ءِ ھوناں گوں سیراپ ءُ رُستگیں درچک (فرنٹ) شاہ ءُ لمب ءَ پیسر بے مھریانی ھرجان کُت۔۔۔ واجہ تو راج زھگ ءِ دلاں کینگ کِشتگ۔ تو نِشتگ ءُ کمے اختلافانی بنیاد ءَ وتی دوست ءَ ڈوبارے ءُ وت ءَ دُشمن شات کنگ ءَ یے۔۔۔۔

واجہ لھتے گپانی سرا اختلاف راجی زند ءِ ارواہ اِنت ءُ لھتے گپانی سرا اختلاف جھد ءَ شررنگی بخشائیت۔۔۔ بلے تو اختلاف دارگ ءِ سنچ ءَ چہ ناپوہ بیتگ یے ءُ تنقید نہ سگّ اِتگ۔۔۔ واجہ ابئید اختلاف ءُ تنقید ءَ راہ نہ گیشیت ءُ جھد شونز بندیت۔۔ بلے تو نہ اختلاف داشتگ ءُ نہ اختلاف سگ اِتگ۔۔۔دومی نیمگ ءَ تو کردانی سرا تنقید نہ کُتگ بلکیں ذاتی ءُ شخصی تنقید کُتگ۔۔۔ چیاکہ تو تنقید ءِ ارواہ ءَ پوہ نہ بیتگ یے ۔۔ پمیشا تئی اختلافی سنچ ءَ مھر ءُ یک دستی ءَ ابئید کینگ درنز اِتگ۔۔۔چیاکہ تو عطا زانت ءَ ناپوہ بیتگ یے ءُ وت ءَ ذات ءِ قالب ءَ بند کُتگ۔۔۔

              کئے گُشتگ واھگاں بکش، کئے گُشتگ وت وت ءَ بہ جُش
               قھر  ءَ   کدی    کمال   بیت ؟  مھر ءَ   کدی  زوال  بیت؟؟

واجہ بلے پہ ترا وھد باز پشت کپتگ۔۔۔ چاکری کینگاں کوتاہ کن ءُ پدا وتی سِستگیں ھمبلاں بہ نَزّآر کہ آیوکیں وھد تئی ودار ءَ اِنت۔۔۔ واجہ شھید ءِ ھون ترا توار ءَ اَنت کہ وتی جبین ءَ سرُک بہ کن ءُ بچار ، باریں تو چنکہ آپ ءَ یے۔۔ باریں تو تہ انگت ذات ءِ قالب ءَ بندوک یے یا ماتی مھراں آشنا یے۔۔۔۔۔۔۔۔۔ اگاں ناں اے رِتکگیں ھون کَسّ ءَ معاف نہ کن اَنت ءُ ھون ھمائی ءَ ھم پدر کن اَنت کہ آ ھمے رِتکگیں ھونانی باپُشت ءَ نام کشی ءُ واجہ گیری یے رندا تچیت ءُ دیم ءَ شھیدیں راج پُل ءِ ماتاں شمارا جواب دیگ لوٹیت۔۔۔ واجہ گوں مھر ءُ تپاکی وتی بُرتگیں آواراں بہ ترین یے کہ وھد شمئے دست ءَ در کئیت ءُ شما بیگواہ بہ یے۔۔۔۔۔۔۔۔