ھو من شمارا گُشت کہ ھما راستی ءَ کہ من گِنداں ، ھر کسے دیم ءِ کاراں، من ءَ دِل گُشیت راستیں گپ ءَ بہ جن، تُری وتی بابت ءَ بہ بیت یا دگرانی۔۔۔۔ پدا مرچاں دوتل ءُ دروگ بندی یے سیاست ءِ سرا من ءَ سک نفرت اِنت۔ آ تری پارلیمنٹ ءِ نام ءَ بلوچ ءِ رد دیگ ءِ کار بہ بیت۔ یا درانڈیھ ءِ نِشتگیں منی جِند ءُ ریشمی دزمالی سرمچاری۔۔۔۔۔ دل گُشیت راست ءَ راست بہ گش، دُشمن بلے گیش بنت۔۔۔۔ پمیشا مرچاں من سگریٹ کشگ ءُ شراب ءِ ورگ ھم وئیل کُتگ۔ چیاکہ اے کارانی کنوک ءَ الم دروگ بندگ لوٹیت۔۔۔۔ چوکہ دیوانے ءَ اگاں ترا جُست کنگ بہ بیت کہ تو شراب وریے گُڑا الم تو گُشئے کہ اِنّاں۔۔ اے دروگے بیت۔۔ پمیشا منی شپ ملارانی دوست ءُ سنگت مرچی ءَ چہ پد ھمے کار ءِ واستہ منی گورا میاینت۔۔۔ اگاں ناں گُڑا شر نہ بیت۔۔۔ چیاکہ من دروگ بندگ یل کُتگ ءُ چہ ملائی ءَ نفرت کناں۔۔۔۔۔۔۔بلے مرچیگیں راستی ءُ منی چم دیست سک تھل اِنت ءُ من دل ءَ جزماں کہ پہ اے راستی ءِ درنگازگ ءَ بازیں درانڈیھی شپ ملاریں سنگت ناراض بنت ءُ پدا ھما زاہ ءُ بد ءِ کِسہ کہ تو مارا پاشک کُتگ۔۔۔۔۔۔۔۔ واجہ اَنچو ھال اِنت کہ آیوکیں الیکشن ءِ تیاری ءَ کنگ اِنت۔۔۔۔ بلے خدا اے گپ ءَ دروگ کنات۔ اگاں چو بوت گُڑا بزاں وتی پاداں وت تپر جنگ اِنت ءُ بلوچ ءِ دیم ءَ ٹینڈر ءُ رُسوا بیت اگاں ھرکس اے کار ءَ بہ کنت۔۔۔ خدا ھر باعزتیں بلوچ ءَ چہ قحبگانی مُلک ءِ پارلیمانی سیاست ءَ پھریز اَت۔۔ اگاں واجہ اے تیاری ءَ کنگ اِنت گُڑا یک گپے یاد بہ کنت کہ بلوچ ھما قوم اِنت کہ اے پہ زبان مردم ءَ کُشیت ءُ گار کنت۔۔۔ خدا واجہ ءَ ھدایت بہ کنت ءُ نیکیں راہ ءَ بیاریت۔۔ عقل مندیں رھشون مصیبت ءِ وھد ءَ اَنچیں فیصلہ کنت کہ آ چہ پیشی پولنگاں پلک شود بیت ءُ چو آسمان ءَ ساپ بیت ، بلے بے عقلیں رھشون مصیبت ءِ وھد ءَ اَنچیں کارے کنت کہ وتی پیشی نیکیاں ھم ببا دنت ءُ وت ءَ رسوا کنت، خدا ھرکس ءَ چہ چوشیں بے عقلے ءَ بہ پھریزات۔۔ قحبگ (ملا) وا قحبگ اِنت۔ بلے پہ بلوچ ءَ قحبگ ءِ دلاری کنگ مستریں عیبے۔۔۔۔قحبگ وتی بدن ءَ بھا کنت ءُ قحبگ ءِ دلار(پارلیمنٹرین) یک راجی ءِ سودا ءَ جنت۔۔۔ پمیشا قحبگ ءَ چہ قحبگ ءِ دلار گیشتر رسوا ءُ ٹینڈر اِنت۔۔ سنگتاں اے قحبگ دلاری ءِ کِسہ سک دراج اِنت۔ اے واجہاں ھما درمیانہ طبقہ ءِ لیڈری ءِ کِسہ اِنت کہ رندا قحبگ دلاری ءِ دروشمے زُرت۔۔۔ پیش ءَ وا ما چاپ جت۔ ایشی ءِ سر نہ گیپت۔۔۔ رندا راج ھمے بیماری ءِ آماچ بوت۔۔۔ پمیشا من دیموکریٹک سیاست ءِ پارلیمانی واھگ داراں یک برے پدا گُشاں کہ واجہاں وتی سرا بہ گِریے، اگاں ناں شمئے کِسہ ھم چو ھما درمیانہ طبقہ ءِ لیڈرانی ءَ بیت۔۔۔۔۔بلوچ ءَ گُشتگ ”زبان کوہ پروشیت” اگاں شما وتی سر نہ گیپت گُڑا بلوچ ءِ زبان ءِ کزا ءَ نہ رک یے۔۔۔۔۔۔۔۔۔۔۔۔۔۔۔۔۔۔۔۔

بلے بِل ایشی ءَ او بِگر آئی ءَ، مرچاں دگہ دودی ھم دراَتکگ۔۔۔۔بزاں ھمے درانڈیھ ءِ بلوچانی عکسی۔ مزن پاگی ءُ ریشمی دزمال ءِ سرمچاری۔۔۔درمیانہ طبقہ ءِ لیڈری سِنچ ءَ مارا گار ءُ بیگواہ نہ کُت، بلے من ءَ تُرس اِنت کہ ھمے ریشمی دزمال ءُ مزن پاگ ءِ سرمچاری مارا گار کنت۔ سنگت شعیب ءِ یک گپے من ءَ باز دوست بوت کہ آ گُشیت کہ ”زندگیں راج وتی پیشی زمانگ ءِ چیزاں میوزیم آں ایر کن اَنت، بلے ما کلچر ءِ نام ءِ سرا وتی کوھنیں چیزانی دوبر زندگ کنگ ءِ شوپچ ءَ کپتگیں” نو من ءَ تُرس اِنت کہ اے مزن پاگی ءُ ریشمی دزمال ءِ سرمچار مئے جِند ءَ میوزیم ءَ دیم مہ دینت ءُ بیگواہ مہ کن اَنت۔۔۔ چیاکہ راج ءِ دیمروئی گوں علمی ءُ سائنسی ءُ تخلیقی تکانی دیمروئی ءَ بندوک اِنت ناکہ گوست ءِ گیر آرگ، کلچر راجی زند ءِ اندری احساسانی نام اِنت ناکہ زاھری۔۔۔۔ جاپانی ھما گُدا گورا نہ کن اَنت کہ پنچ سد سال پیش شنٹو ازم ءُ بدھ ازم ءِ منوگراں گورا بیتگ، بلکیں جاندراں ھم۔۔۔۔ بلے آھانی مڑاہ ءُشان ھما اِنت۔اگاں چو بوت گُڑا مئے مثال چو عربانی ءَ بیت کہ ادا ٹیکنالوجی باز دیم ءَ شُتگ ءُ ھر چیز کمپیوٹرائز اِنت۔ بلے گیشیں مھلوک ٹیکنیکل نہ اِنت، ایشانی رھدربر دومی راج اَنت۔۔۔۔

گُشنت کہ مردم بے وس بیت گُڑا پہ زور وتی طاقت مندی ءِ پیشدارگ ءِ جہد ءَ کنت۔۔۔ فرانز فینن گُشیت اے غلام قوم ءِ نفسیات اِنت کہ وھدی بے وس بیت۔ تہ وتی بزگی ءُ لاچاری ءِ چیر دیگ ءِ ھاترا انچیں کار کنت۔ وتی گوست ءِ نازیکناں گیر کاریت ، دانکہ آ دُنیا ءِ دیم ءَ ھمے گپ ءَ بہ منارینیت کہ من زندگاں۔۔۔۔۔۔۔۔۔۔۔۔۔۔۔بلے منی مزن پاگ ءُ  ریشمی دزمال پھازیں سنگت ءِ کِسہ چو گُشئے کمے دگہ وڈیں، اے چو کمو نام کشی ءُ دوتل ءُ دوپوستی یے بیماری ءَ گور جتگ۔۔۔ پہ ایشی ءَ قربانی دیگ ءُ شھید بیئگ جوانیں کارے ، بلے پہ دگر ءِ زھگ ءَ۔۔۔۔۔۔۔ سُھریں سلام جوانیں ، بلے منی برات ءُ زھگ شھید مہ باں کہ دنیگہ قوم آ وڑا تیار نہ اِنت۔۔۔۔۔ پدا ھمے سُھریں سلام ءِ دود ھم بلوچی دودی نہ اِنت۔۔۔ اے ھما رشین سِنچیں درمیانہ طبقہ ءِ لیڈرانی آؤرتگیں دودی اَت کہ دنیگہ پہ لاشعوری ما ھمے دود ءَ گوں گلائیش ایں ءُ ما اے مرچاں بلوچی دودی جوڑ کُتگ۔۔۔ بلوچی ءَ گُشنت کہ پلانی شھید بوت ءُ آئی ءَ وتی مات ءِ شیر پھل کُت۔۔۔ بزاں قمبری ماتی شیر پھل کنی ءِ دود ءِ جاہ ءَ مرچاں ھمے سوویت یونین ءِ ”ریڈ لشکر ” ءِ سُھریں سلام ءِ دود ءَ جاہ کُتگ۔۔۔۔۔۔۔۔۔۔۔

منی ریشمی دزمال سرمچار ءِ کِسہ چو اے وڑیں۔ کمو تھل اِنت ءُ ایر برگے گران اِنت ۔۔ ھؤ یک روچی من ءَ سنگتی ھال دات کہ زِروان ءِ سنگتے چہ مُلک ءَ اَتکگ ، بی۔آر۔پی ءِ ممبرے ، چارگ ءِ روئیں۔۔ من تیار بیت آں ءُ سُھب ءِ چاڑ ءَ دیم پہ ودارجاہ ءَ۔۔۔۔۔۔۔۔گُڑا ھو مرد اَتک۔ مرد ءَ بلاھیں پاگے بستگ اَت ءُ ریشمی دزمالے بڈا بستگ اَت، پہ شانے مارا دراہ ءُ دراہ بات بوت۔ من گوں مرد ءِ گِندگ ءَ گوں ھمے گمان کُت کہ من چاکر ءُ گوھرام ءِ کِسہ ءَ وانگایاں ءُ جاڑو جلب منی راستی کش ءَ نِشتگ۔۔۔ ھو آ روچ ءَ ما درانڈیھ ءِ دو ٹوھیں سرمچار دوچار کپتگ اِنیں ءُ بلوچ جنز ءِ بابت ءَ باز بلاھیں گپ جت۔۔ چوش کنیں ءُ اے وڑ کنیں ۔۔۔ بلے من دل ءَ زانت ما ھچ کُت نہ کنیں۔۔۔ بلے چوں کناں ، درانڈیھ سرمچاری ءِ دود وا زندگ کنگی اِنت۔۔۔۔ پدا ما دو سئے برا پدا دوچار کپتیں۔ پدا ھما سرمچاری گپ ءُ تران، مرد کارا لگ اِت ۔ پدا دیر نہ گوست کہ مرد ءَ منی عرب نیشنلٹی والا سنگتی گما کلوہ دیم دات آئی ءَ پہ کندگ من ءَ ھال دات پلانی ءَ گُشتگ تو منی گورا کایے بیا کہ ترا عربانی پاسپورٹ گون اِنت۔ ترا کس ھچ نہ کنت بلے شپچراگ ءَ بہ گُش کہ میا کہ تو باز سیاست کن یے ءُ اے ملک ءَ من ءَ چہ سیاست ءَ تُرسیت۔۔۔۔۔۔ من ھما سنگت ءَ گُشت کہ واجہ ءَ بہ گُش کہ منی دپ ھچ جاہ بند نہ بیت۔۔ بلے تئی گپ پیش ءَ دگہ بیتگاں، اے رسول نماسگ عربانی  ملک ءَ بلاھیں بلاھیں پیشہ وریں دُز ءُ مالوار نِشتگ اَنت۔۔ ادا واجہ منی وڑیں تتکگیں مردمی ءِ گپاں کس اِش نہ کنت کہ ادا ایشاں منی گپانی گوشدارگ ھم تھنبل نہ کنت۔۔ بلے تو دل ءَ ڈڈ کن کہ تو بلوچی زھگے یے ءُ ساہ پہ ھُرجنگ دارگ نہ بیت۔۔۔۔۔۔۔۔۔

پدا من ءَ اے رسول ءِ نماسگیں عربانی سرا تُشے ھم بھیسہ نہ کنت۔۔ اگاں پاکستان بہ لوٹیت گُڑا اے عکسی ءُ ریشمی سرمچار ءِ گرگ ءَ یک سھتی ھم مھتل نہ بنت۔۔۔ بلے پاکستان مئے وڑیں بے دلانی ھاترا چیا وتی ڈالاں زوال بہ کنت؟۔۔۔۔۔۔۔ پاکستان ھم زانت کہ اے چوشیں کوہ پروشیں مرد نہ اَنت۔۔۔ھال نئیت کہ ایشاں ”سُھر ءِ سُنٹ ء آوار ترینتگاں”۔۔۔۔۔۔ بلے منی دومی ریشمی دزمال سرمچار ءِ کِسہ چو اے وڑ اِنت۔۔ ھمے درانڈیھیں سرمچار ءَ چہ دومی عرب ملک ءَ وتی زھگ ءِ سرا مسیج دیم داتگ اَت کہ منی چُک ملک ءِ رؤگ ءِ واھشت ءَ چہ دل ءَ کش ، دنیگہ قوم آ وڑا تیار نہ اِنت کہ شما وت ءَ بہ کوشارین یے۔۔ انو شمئے وانگ ءِ دور انت،  اے مسیج منی گنھگاریں چماں دیست ءُ من ھیران بیتاں ، بلے دپ داشت۔۔ پدا ھمے چُک ڈن ءَ وانگ ءَ نہ اِنت۔۔ بلکیں کار ایں۔۔۔۔۔۔۔۔۔۔

دگہ کِسہ باز منی سرا کپتگ۔ بلے درست بیان کنگ نہ باں۔وھد کم اِنت ۔۔ بلے مسکت سرمچار کہ فوج ءَ کار اِنت۔۔ فیس بک ءَ ”بولان بلوچ” ءِ نام ءَ نِندیت۔۔ آ وتی دل ءَ جزمیں کہ من آئی ءَ نہ زاناں، بلے من زانت کہ اے ھما مرد اِنت کہ دریا ءِ لمب ءَ گوں من دوچار کپت ءُ وتی قُربانیانی کِسہے آؤرتاں۔۔ اے مرد ءَ یک روچی من ءَ ماں فیس بک ءَ پہ ھمے ھاترا زاہ ءُ بد کُتگ کہ تو چیا ستار، سلیم ءُ جگو آں زاہ نہ دیے۔۔۔