شپ وداریں ساھت کہ شھید راج بچ ءِ مرگ ءِ ھال ءَ کار اَنت تہ گُشئے دلوں پاھار کنت۔ چماں ارس گُلگُل بنت۔ ارواہ موتک کاریت۔  گمان کناں، گریواں کہ   ندکار آیوکیں مرگ ءِ بئیم ءَ  ڈیھ ءَ کَشتگ ءُ ھمینکہ دیر آؤرتگ کہ شھید راج پُل ءِ شھیدیں ھونانی وشبو ھم آئی ءِ نصیب ءَ نہ بیت۔ پہ راج پُل ءِ گُڈی دیدار ءَ ھم دِل تلوسیت۔ دلوں گُشیت کہ ”ساہ پہ ھُر جنگ دارگ نہ بیت” ، او ”ناکہ  چہ حضر ءَ کاگدی گِپتگ مردم ءَ” بلے بُزدلیں مردم ءَ اگاں شیری دلے لاپ ءَ بہ بیت تہ ھما اِنت ءُ ھما، ءُ او پہ ڈیھ ءِ ھاترا شھادت کزا یک وش بھتی یے نصیب ءَ بہ بیت ناکہ منی وڑیں سر سِستگ ءُ شھید ءِ مرگ ءِ سرا موتک آروکیں شوم ءُ شانزدھی یے۔۔ ھمے ھیالاں کہ من ءَ نیم شپے پاساں تورین اَنت ءُ واب ءَ نئیل اَنت۔ منی کِسہ وا ھمیش اَنت، راستی ھم ھمیش اِنت۔ باریں آدگہ درانڈیھیں راج سرمچاری  ءِ دعوادار ھم وت ءَ ھمے شاھیم ءَ تور کن اَنت ءُ وتی بابت ءَ راستیں فیصلہ ءَ دات کن اَنت۔

اگاں ناں گُڑا آ واجہ ”مارٹن لوتھر کینگ” ءِ اے ھیالانی سرا کمے دِلگوش بہ دینت کہ آ گُشیت۔

”شما آجوئی ءَ تاں ھما وھد ءَ پوہ بیت نہ کن یے ، تاں وھدی کہ شما مرگ ءِ بئیم ءَ ایر جیگ مہ کن یے”

اکبر خان گُشیت ” گپ جنوک بازیں ، بلے عمل کنوکیں سنگتانی ضرورت اِنت”

دگراں وا من نہ زاناں بلے من وت کدی کدی ھیال کناں کہ باریں من ھمے پیرُک اکبر خان ءِ ڈس اِتگیں نشانانی لڑ ءَ نیایاں۔ من ءَ یادیں نواب شھید ءَ انٹریو دیان  ءَ انچیں منی وڑیں درانڈیھیں گپ جنوکی ءِ سرا زھر گران ءَ گُشت کہ ”واجہ گپ مہ جن ، سوال مہ کن، میدان ءَ بیا دُراھیں راستیاں پوہ بئے”

بلے مرچاں ھمے وڑا گمان بیت کہ سنگر بدل کنگ ءِ کِسہ ھم لیکہے جوڑ بیتگ۔ مئے ٹوھیں ٹوھیں راجی باسک ھم چرے سنگر بدل کنگ ءِ کزا ءَ نہ رکّ اِتگاں۔( اللہ تیاب زِروان ءِ بُت پروشیں  ندکار ءَ سلامت کنات کہ سنگرے بدل کُتگ، بلے سک دیر نہ شُتگ)۔۔۔۔۔۔پمیشا تنیگہ آ مئے وڑیں بے دلیں سنگر بدل کنوکانی لڑا آرگ نہ بیت۔ ۔۔۔

بلے بائد منی دوستیں بیل ءُ ھمگنگل منی بے سر ءُ گنوکی گپاں دل ءَ میار اَنت۔ چیاکہ من پیش ءَ کُلیں سنگت ھال داتگ اِتاں ، ھرچی منی دل ءَ کئیت من گُشاں۔۔۔ او من ھما درانڈیھیں سرمچاراں ھم میار بار نہ کناں کہ آ ھمے سنگر بدل کنگ ءِ شوپچ ءَ پیسر ھمدا بیتگ آں۔ راج شاعر ءُ ندکار ھم بائد اے ردا آرگ مہ بیت کہ آ وتی کار ءَ بقولِ ھما ھمدا ھم کُت کنت۔۔ بلے چو کناں ”شھید قندیل” ءِ ڈس اِتگیں راہ ھمے سکین ءَ دنت۔۔۔ بلے گوں بیل ءُ سنگتاں منی دگہ ھم گلگے اَست کہ شما اگاں سنگر بدل کُتگ اَت گُڑا سُھریں انگریزانی ملک ءَ بہ رپتین یے،، اے گوجداریں  عرب وا ساہ ءِ کَشّگ ءَ ھم نئیل اَنت ءُ پاکستان ایشانی دوست اِنت۔ اے باندا شمارا پدا دیم دینت ۔۔۔۔

کس دل ءَ میاریت، من وت ھم ھمے سنگر بدل کنگ ءِ کزا ءَ نہ رک اِتگاں، او پدا من وا گنتر کہ ھمے سنگر بدل کنوکانی اول سری لڑا گوں ھواراں، پدا راستی یے گوشدارگ دگرانی بابت ءَ وش اِنت ، بلے وھدیکہ راستی وتی بابت ءَ بیت تہ مردم گُشئے ایر بُرتے نہ کنت۔۔۔۔بلے راستی الم سگگ لوٹیت۔۔ راستی ءِ سگگ ءُ پدا ھمے راستی ءَ گوں وت ءَ ھمدپ کنگ ءُ منگ انسانیت ءِ مستریں سپت اِنت۔۔۔راستی تھل اِنت۔ بلے سگگ لوٹیت ۔رسول حمزہ توف ءِ اے ھیالاں ما وتی ارواہ ءَ نکش بہ کنیں ءُ بہ جیڑیں تہ راستی ءَ سر بوت کنیں ءُ وتی بابت ءَ ھم ایشی ءَ برداشت کُت کنیں ءُ راستی ءِ اجتماعی نپاں ھم پوہ بیت کنیں۔۔۔

سول حمزہ توف کِسہ کنت۔۔۔۔۔۔۔۔۔۔

”است اَت بادشاھے۔۔۔سکیں زوراکیں بادشاھے اَت۔ ھرکس ءَ تُرس اِت۔ بادشاہ ءِ ھلاپ ءَ کس ءَ توار چِست کُت نہ کُت۔ ندکاراں ، لھتے ءَ پہ تُرس ءُ لھتے ءَ پہ لالچ بادشاہ ءِ ستاہ ءُ توصیف کُت۔۔شاعراں بادشاہ ءِ ساڑاہ ءَ شعر پِر بست۔۔۔ دراجیں شعر ۔۔۔۔۔۔۔۔۔۔۔وھد روان اَت۔ بادشاہ ءِ زلم ءُ زوراکی برجاہ۔۔۔۔ کاسگ چٹانی ستاھاں بادشاہ گیشتر گنوک کُتگ اَت۔۔۔۔۔۔۔بلے دیر نہ گوست مُلک ءِ ھالتاکانی تھا بادشاہ ءِ زلم ءُ زوراکیانی ھلاپ ءَ شعری شنگ بوت۔۔۔ شاعر زانگ نہ بوت کہ کئے اِنت۔۔۔بادشاہ پریشان بوت۔۔۔۔ چیاکہ چِد ءُ پیش ھرکس ءَ بادشاہ ءِ توصیف ءُ ستاہ کُتگ اَت۔۔۔۔۔ دپ چٹیں وزیر ءَ بادشاہ سلاہ دات ءُ گُشت کہ مُلک ءِ سرجمیں شاعراں لوٹائین ءُ شعر گُشگ فرمائے۔۔۔۔فوج دیم دیگ بوت ۔۔۔سرجمیں شاعر بادشاہ ءِ دربار ءَ آرگ بوتاں۔۔۔۔ سئے سد ءَ گیش شاعر اِتاں۔۔۔ ٹوھیں ٹوھیں شاعر۔۔۔۔درستیں شاعراں شعر ونت ءُ بادشاہ ءِ تعریف کُت۔۔بس سئے شاعر پشت کپت۔۔۔۔ اے سئیں بادشاہ ءَ جیل ءَ دیم دات اَنت۔۔۔ سئے روچ ءَ پد بادشاہ ءَ پدا سئیں شاعر لوٹائینتاں۔۔۔ نو دو شاعر ءَ شعر ونت ءُ بادشاہ ءِ تعریف کُت۔۔۔ بلے یکے ءَ نہ ونت۔۔۔۔بادشاہ ءَ یکیں شاعر جیل ءَ دیم دات۔۔۔ پدا سئے روچ ءَ رند یکیں شاعر لوٹائینگ بوت ۔۔۔۔ بلے شاعر ءَ شعری ونت۔۔۔۔چونیں شعری ؟؟؟؟ بادشاہ ءِ تعریفی نہ کُت۔۔۔بلکیں انچیں شعرے کہ بادشاہ ءِ زلم ءُ زوراکی ئے ایر جتاں۔۔۔۔۔دپ چٹیں وزیر برانز گِپت۔۔۔ گُشتی واجہ چیا داشتگ۔۔ اے مئے دیم ءَ مئے ایماندار ءُ ساپ ءُ سلھیں بادشاہ ءَ ایر جنگ اِنت۔۔۔۔۔۔۔۔۔۔۔بلے بادشاہ ءَ گُشت۔ ”مرد ءَ ھچ مہ کن یے۔من دِلجماں کہ دانکہ منی سر زمین ءَ چوشیں راست گُشین انسان است اَنت تہ اے قوم زندگ اِنت”۔۔۔۔۔ بادشاہ ءَ حکم دات کہ آدگہ دوسد ءُ نود ءُ نوھیں شاعراں گوں وزیر ءَ پاھو بِدیے ءُ بس ھمے یکیں شاعر ءَ وئیل بہ کن یے۔۔۔۔چیاکہ راجانی نگھپان بس انچیں شاعر بنت”

بلے مرچی ناں رسول ءِ وڑیں ندکار پشت کپتگ ءُ ناں بادشاہ سِنچیں سنگر بدل کنوک۔ پمیشا من یک گپے ءَ دِل ءَ جزماں کہ اگاں من اے نبشتانک ھمے راجدوستی ءِ نام ءِ سرا پناہ گیرانی (کہ ایشانی تھا منی جِند ھم ھوار اِنت) پلہ مرزی ءَ نبشتہ بہ کُتیں، او بہ گُشتیں واجہاں شما شر کُتگ وتی جان رکینتگ، تہ من ءَ لائک ھم گیشتر رستگ اَت۔۔۔بلے اے منی دست ءَ نہ بیت۔۔۔۔۔ چیاکہ عرب ڈکٹیٹر شپ ءِ کرد من چماں وت دیستگ اَنت ءُ کِر ءُ کش ءِ عرب سرزمین جاہ نند ءِ بزگی ءِ داستان ھم من اِش کُتگ۔۔ من جیڑاں، وتی دل ءَ جُست کناں کہ اے ڈولدار ءُ دِلساچیں کلات باریں چِنکہ مظلومانی ھونانی سرا بندگ بیتگ؟ ھما راجدوست کہ اودا پہ ھمے ھاترا جَستگ اَنت کہ ما تپنگ بَڈا کُت نہ کنیں۔۔ باریں ادا کئے پلہ مرزی ءَ تپنگ ءِ بَڈا اِنت ءُ کئی حق ءَ جنگ ءَ اَنت ؟؟؟؟؟

او حمید شھید ءِ کِسہ ءَ کئے شموشکار اِنت؟

بلے ما درانڈیھ انگت نِشتگ ءُ لیاری یے بلوچاں شگان جنیں کہ آ میدان ءَ گوں دُشمن ءَ دیم پہ دیم اَنت ءُ جنگ ءَ اَنت۔۔ بلے من ءَ بژن بیت پہ بے سمائی شھید بیئگ ءَ اَنت۔۔ من ءَ چہ بلوچستان ءِ ورناھانی شھادت ءَ لیاری ءِ ورناھانی شھادت گیشتر توریت۔ چیاکہ بلوچستان ءِ ورناہ پہ حاصیں مقصدے ءَ مرگ ءَ گورامباز کنگ ءَ اَنت ءُ لیاری ءِ دلیریں راج ورناہ پہ بے سمائی دَشمن ءِ تیراں سینگ ءَ زیرگ ءُ مرگ ءَ گورامباز کنگ ءَ اَنت۔۔۔۔ یکے راجدپتر ٹھینگ اِنت ءُ یکے بس شھید بیئگ اِنت۔ سردار پھازی ءِ دیناں روگ اِنت۔۔۔ بلے اے گپ ءَ لیاری ورناہ ءَ من ھچ میاربار کُت نہ کناں، میاریگ ھما رھشون اِنت کہ آئی ءَ لیاری ورناہ راستیں ڈائرکشن دات کُت نہ کُتگ۔