ند ءِ چِست کنگ ءِ وھد ءَ ندکار ءَ وتی ذات ھم ھتم کنگ لوٹیت۔۔راستی ءِ کجام وڑیں دروشمے کہ آ ندکار ءِ ذات ءَ گوں بندوک اِنت ، آئی ءِ درنگازگ جوانیں سپت ءُ انسانیت ءِ بُنزہ اِنت۔ پہ ندکار ءَ نندگ ءُ وتی جند یا ذات ءِ پلہ مرزی کنگ دوتل ءُ پوستی ءَ چہ کم نہ اِنت۔۔۔۔۔پمیشا ندکار قلم ءِ چست کنگ ءَ پیسر وتی ذات ءِ دریا ءَ ایر بہ کپیت ءُ بچاریت کہ آ ند ءَ پہ کجام مول ءُ مراد ءَ چست کنگ اِنت۔۔باریں آئی ءِ نبشتہ کنگ ءِ مقصد نام کشی ءُ وت ءَ ٹوھیں راجدوستی زاھر کنگ نہ اِنت۔۔۔یا آ پہ وتی بستار ءِ مزن کنگ ءَ واجہ سلامی ءُ بُت تراشی کنگ ءَ نہ اِنت۔۔۔۔۔۔۔
او کسے ءِ ذات ءِ سرا ایراد گرگ ءَ ھم من ٹوھیں راجی تاوانے سرپد باں۔۔۔۔ایراد گیری کرد ءِ سرا بہ بیت ناکہ ذات ءِ۔۔۔۔۔۔چیاکہ اے انسان ءِ ابرمے کہ راستی ءِ کجام وڑیں دروشمے ءَ آ وڑی ناں وڑی ایر بُرت کنت۔۔۔۔ بلے ھمے راستی ءِ تھا وھدی کہ آئی ءِ نام آرگ بہ بیت تہ آئی ءِ وت منی ءِ ابرم جاہ جنت ءُ جواب ءَ دیگ لوٹیت۔۔ ادا بقولِ اردو والایاں ”تنقید برائے تعمیر” ءِ جاہ ءَ ”تنقید برائے تنقید” گیپت۔۔۔۔۔۔۔پمیشا من گُشاں لیکہ ءُ کرداں ابئید آئی ءِ ذات ءِ سرا ایراد گرگ ءِ مقصد ھمیش اِنت کہ ندکار وتی ”تُرم خان” ئے ءِ زاھر کنگ ءِ واستہ دومی ءَ ایر جنگ لوٹیت۔۔۔۔۔
ایراد گیری ءِ وھد ءَ ڈنی لیکہ ءُ رھبنداں ابئید ترا وتی چاگردی تب، راجی نفسیات دیم ءَ کنگی اِنت۔۔چیاکہ راجی چاگرد ءِ سنچ ءِ تھا انچیں رھبند ءُ لوٹ ءُ روایت بنت کہ ھر راج ءِ جتا جتا بنت۔۔پمیشا ندکار اگاں ایشانی ھیالداری ءَ مہ کنت تہ آئی ءِ بے سریں داستان راجی چاگرد ءِ لوٹاں تاوان بار کن اَنت ءُ لِٹکی ءِ درچ ءَ کاینت۔۔۔۔۔۔۔۔۔۔
لبزانکی ایراد گیریں ندکاری ھم اے وڑ نہ اِنت کہ ذاتی ضد ءِ بنیاد ءَ آ ندکار دگہ کسے ءِ شعری سِنچاں پولنگ بہ کنت ءُ وتی ذاتی لوٹانی پدا رد معنیٰ بہ کش ایت۔۔۔ چیاکہ شاعری ھم آفاقی سِنچی داریت ءُ یک وھدی ءِ تھا بند کنگ نہ بیت۔۔۔۔ اگاں ناں گُڑا شما عطا شاد ءِ اے شعر ءَ کجام قالب ءَ ایر کن یے۔
”زیمیں دِل ءَ کجا براں تیر وتی، جگر وتی”
پمیشا من واجہ بیدار ءِ بابت ءَ واجہ مِستاگی ایراد گیری یے ھم منوک نیاں۔ اے من گُشاں آئی ءِ شعری سنچ ءِ پولنگ کنگ اِنت ءُ ندکار ءَ وت ءَ یک ٹوھیں راجکارے ءِ منارینگ ءِ جُھد اِنت۔۔۔۔۔
نو پمیشا، ھمے سرجمیں رھبندانی سرا چار ءُ ٹپاس کنگ ءُ دومی ءَ ملامت کنگ ءُ راجی ردیانی سرا موتک آرگ ءَ پد دِل ندکار ءَ ھم گُشگ اِنت کہ واجہ وتی اندر ءَ سرُک کن ءُ بچار کہ تو وت چِنکہ آپ ءَ یے؟؟؟ دگر ءَ چہ پیسر واجہ وتی ناپوھیں علمی سِنچ ءِ سرا چار ءُ ٹپاس بہ کن۔ وتی احتساب ءَ بہ کن۔۔۔ ھما راجی ”کینگ آس” ءُ وت ماں وتی جیڑہ ءُ پُرشت ءُ پروش کہ ردومی زُرت، ایشی ءِ بُنکی توم ءِ کِشگ ءَ وڑی ناں وڑی تئی وتی بے سمائی ءُ بے علمی ءُ سید رنگ ءِ مھراں چہ ناآشنائی یے سکین ھوار بیتگ اَنت۔۔۔ نو چیا وتی کِشتگیں توم ءِ رُستگیں درچک ءِ جیڑھانی سرا موتک کاریے۔۔۔ یک برے وتی وت منی ءِ قالب ءَ در کپ ءُ وتی احتساب ءَ بہ کن ءُ دیم ءَ جُنزان کن۔اگاں ناں تئی بے سریں سیاھگ پوچ اَنت ءُ کس ءَ نپ نہ دینت۔۔۔۔
بیا پدا شِتکیں تلارانی دِلاں ءَ دِرّاں کنیں
گران بھائیں دوستی ءُ مھراں پدا ارزان کنیں
گران بھائیں دوستی ءُ مھراں پدا ارزان کنیں
