من کئے آں؟ من بلوچی آں۔ منی بے سمائی ءِ کِسہ یے آرگ ءَ پیسر گوست ءَ چماں شانک دیے ءُ بچار کہ من کئے آں۔.......او منی پُل ءُ سوغاتیں راج رھشون وتی ردیانی پولنگاں منی دامن ءَ مہ مُش کہ من بلوچی آں۔ گوں راستی ءِ چماں من ءَ بچار، منی گوست ءَ بچار کہ چونیں کِسہ ساچیت...............................من مائی کلاچی ءِ جاھمنند آں کہ اے شھر ءِ سنگانی سرا من وتی نام گوں دِل ءِ ھوناں نبشتہ کُتگ۔۔۔۔ واجہ من ءَ مہ ڈوبار کہ بے سما تو بیتگ یے۔۔۔۔۔۔دیر مرؤ ، سید سرچمگانی رنگاں واجہ گیر بیار۔۔۔۔اے ھما رنگیں کہ منی دِلبند ءَ کِشگ بیتگ کہ آئی ءِ سنج رنگیں شبین مرچی راج زھگ ءِ ارواہ ءِ تھا نکش اِنت۔۔واجہ اے سرچمگانی والینوک من بیتگ اَنت ءُ سید منی اُستاد..............................
واجہ بے سما تو بیتگ یے۔۔تئی بے سمائی ءَ من ءَ لاچار کُتگ ءُ دژمن سوب مند..................واجہ ساحر رنگاں مہ شموش کہ اے رنگ ساچ منی چاگرد بیتگ.........................واجہ اے ھم من بیتگاں کہ ھمے زمین ءِ دِلبند ءَ ”ورناھیں وانندھانی گل” ءِ بُن ھِشت ایر کُتگ۔۔۔او منی واجہ من ءَ مہ ڈوبار۔۔۔
واجہ اے یوسف نسکندی ءِ جاھمنند بیتگ۔ واجہ اے ھما ھاک اِنت ادا ”آجوئی ءِ قندیل” ودی بیتگ..............................واجہ اے ھما ھند اِنت کہ ادا واجہ غلام محمد ءَ وتی عمر ءِ گُڈی روچ گوازینتگ اَنت ءُ ما وتی دلانی تھا جاہ داتگ ءُ من ھما زھگاں کہ اکبر شھیدی ءِ وھد ءَ پاکی لشکر ءِ تپنگ وتی سینگ ءَ داشت ءُ گُشت آس بِدیے..................واجہ من تہ انگت ھما زھگاں، بلے رھشون بیگواہ۔۔۔۔ ناں سید پشت کپتگ ءُ ناں غلام ءُ شیر۔۔۔ پمیشا مرچی منی رھشونی ءَ ”للی پوتین” کنگ ءَ اَنت..................................اے منی لاچاری ءُ تئی بے سمائی اِنت۔۔ من ءَ مہ ڈوبار کہ بے سما تو بیتگ یے واجہ
