صیہونیت (Zionism) ءِ بنکی لیکہ ءَ یہودی راجی، مذھبی ءُ سیاسی  پجار ءِ گار ءُ بیگواہ بیئگ ءِ پژگرد ءَ پہ ھمے وتگڑیں ھیال ءِ دیمگیری ءِ ھاترا ردوم زُرتگ کہ یہودی سِل ءُ سِلگتیں راجی، خدا ءَ یہودیانی سرا لعنت دیم داتگ، پمیشا یہودیاں اے زمین ءِ سرا زندگ بئیگ ءِ حق نیست۔ یہودی بے تعلیم اَنت۔ یہودی گندگیں راجے، ھمے لیکہ بیتگ اَنت کہ ایشانی پژگرد ءَ صیہونیت ءِ زرمبش ءَ ردوم زُرتگ۔

یہودیانی وار ءُ بزگی ءِ کِسہ سک دراج اِنت۔ رومی بہ بنت یا عرب مسلمان ، ایشاں وتی وتی خدایانی نام ءِ سرا وتگڑیں دروگانی بنیاد ءَ اے بزگیں راج جتگ ءُ چُپتگ ءُ غلام داشتگ۔ وتی پِت ءُ پیرکی سر زمین ءَ کَشّ اِتگ ءُ سراں ولی کُتگ۔۔۔۔ یہودی کُشت ءُ کوش ءِ بنیاد ھمے لیکہ ءِ سرا بیتگ کہ یہودی ھرابیں راجے۔۔ خدا جتگیں راجے۔ ایشاں اے زمین ءِ سرا نِندگ ءِ حق نیست۔۔ پمیشا ھمے وتگڑیں لیکہ ءِ بنیاد ءَ عرب بہ بنت یا عیسائی ، ایشاں پہ ھمے راج ءِ کُشت ءُ کوش ءُ پُلیں فلسطین ءِ مال ءُ مڈیانی دست ءَ آرگ ءِ ھاترا ھما کُتگ کہ ایشانی دل ءَ لوٹ اِتگ۔۔ بلے ایشاں میار نیست ، جھان ءِ راجدپتر زَلم ءُ زوراکی ءِ چوشیں داستاناں پُر اِنت۔۔۔ تاں روچ ءِ مروچی زالم پہ دومی راجانی ایردست کنگ ءَ ھمے وڑیں مذھبی بنیاد در گیجیت۔۔۔۔۔۔۔۔۔۔

بلے ایشانی سازتگیں دروگاں ناں  یہودی گار ءُ بیگواہ کُت اَنت ءُ ناں آھانی راجی پجار ھتم کُت۔ تاریخ ءِ ٹوھیں پیغمبر حضرت اسرائیل (یعقوب) ءِ چُک ءُ نماسگ تہ انگت ھمے سر زمین ءِ دِلبند ءَ زندگ اَنت ءُ آھاں وتی راجی پجار برجم داشتگ۔۔بلے پہ پلیں فلسطین ءِ وارث ءُ بنی اسرائیل ءِ نماسگاں  تاریخ ءِ گران تریں دور ھما اَت کہ یورپی بازیں ھنداں ”اینٹی یہودیت” ءِ لیکہ ءَ ردوم زُرت۔ نوزدھمی کرن ءِ گُڈ سر ءُ بیستمی کرن ءِ اول سر پہ بنی اسرائیل ءِ نماسگاں سک گران اَت۔ آھانی راجی پجار خطرہ ءِ تھا اَت۔ یک نیمگے جرمن راجدوست ھٹلر ءَ بزگیں یہودیانی کُشت ءُ کوش بنگیج کُت۔۔ پہ ھٹلر ءَ بنی اسرائیل ءِ نماسگ ھرابکاریانی بُنزہ اِتاں۔ آئی ءَ ھمے لیکہ ءِ بنیاد ءَ اللہ ءِ دست ءَ ”من و سلویٰ” وارتگیں بنی اسرائیلی آنی کُشت ءُ کوش کُت کہ اے ھر ھرابکاریانی بُنزھاں۔۔ ھٹلر ءِ مشھوریں گُشتنے کہ ھرابے ھر کُجا بہ بیت ھتم کنگی اِنت۔۔ دومی نیمگ ءَ روس ءُ دگہ بازیں مُلکاں یہودی دُشمن لیکہ ردوم گرگ ءَ اَت۔۔۔۔۔۔۔۔۔۔ ھمے پشگرد ءَ بنی اسرائیل ءِ نماسگاں جیر اِت کہ مئے پجار گار ءُ بیگواہ بیئگ اِنت۔۔۔ آ وتی پِت ءُ پیرکی ڈیھ ءِ ترانگاں کپتاں، آھاں پہ پُلیں فلسطین ءَ اومان کُت کہ بقول واجہ شئے رگام کہ فلسطین ءِ سنگ سنگ ءِ سرا آھانی پِت ءُ پیرکانی نام نبشتہ اِت اَنت۔۔۔۔۔۔۔۔۔۔۔۔۔۔۔

ماتیں ڈیھ ءِ درداں ھما زھگ بہ زانت کہ آئی ءَ وار ءُ بزگی ءُ بے وسی ءِ روچ گوازینتگ اَنت۔۔ آ چہ ڈیھ ءَ بے ڈیھ کنگ بیتگ۔۔۔غلام کنگ بیتگ۔۔۔۔ درانڈیھی ءِ ھمے درد ءُ دور اِت اَنت کہ ایشاں بنی اسرائیل ءِ نماسگاں نمیرانیں احساسے بخشات۔۔۔۔۔ھمے مارشت ءُ احساس صیہونیت(Zionism) ءِ بُن ھِشت  جوڑ بیتاں۔۔۔۔۔۔صیہونیت(Zionism) بنیاد لھتے رھبندانی سرا ایر کنگ بیتگ۔۔

1۔ بنی اسرائیل ءِ ڈیھ یہودیانی پِت ءُ پیرکی ھنکین بیتگ۔۔ آھاں وتی ماتیں گُلزمین ءِ سرا دوبر نندگ ءُ یک مُلکی ءِ جوڑ کنگ ءِ حق است اِنت۔۔۔۔۔۔

2۔راجی وتواکی ءِ بنیاد ءَ کجام راجی ءَ کہ یک جتائیں زبانے، کلچرے یا جتائیں مذھب ءُ راجی پجارے بہ بیت ، تہ آ راج ءَ جتائیں ملکے ءِ جوڑ کنگ ءِ حق است اِنت۔۔۔ بزاں صیہونیت(Zionism) ءِ بنکی رھبند سرجمیں راجانی وتواکی ءِ لوٹانی منوک اِنت

3۔صیہونیت زرمبش ءِ بنیاد "non violance" ءِ بنیاد ءَ یہودی راجی حقانی پلہ مرزی ءَ کنت ءُ تاریخی لوٹانی بنیاد ءَ یہودیانی ریاست ءِ جوڑ بیئگ ءِ پلہ مرزی ءَ کنت۔۔۔۔۔۔۔۔۔۔

بلے مرچاں ھنچو کہ پیش ءَ یہودی ھر گندگی ءِ بُنزہ گُشگ بیتگ اَنت، نو ھمے گالبند (Zionism) ءَ وھد ءِ مُلا ءُ نام گِپتیں خدا دوست ھرابکاری ءِ بُنزِہ گُشنت۔۔۔۔۔بلے سد سلام اِنت بنی اسرائیل ءِ نماسگاں کہ آ ھمے ابدمانیں گالبند ءُ نمیرانیں مارشت ءِ بنیاد ءَ نوکیں بنی اسرائیلی استان ءِ جوڑ کنگ ءَ سوب مند بیتاں۔۔۔آھاں ابئید ءِ جنگ ءُ چوپ ءَ ابیئد ءِ کُشت ءُ کوش ءَ بلکیں علم ءُ عقل ءِ بنیاد ءَ وتی استان دوبر چہ زوراکاں پچ گِپت۔ نوکیں اسرائیل ءِ جوڑ بیئگ ءَ پیسر عبرانی زبان ءِ کارمرز کنوک ھشتاد مردم بیتگ اَنت نو ھشتاد لکھ ءَ سر بیتگ اَنت۔۔۔ چیاکہ خدا مدام راستی یے ھمراہ اِنت۔ بلے بلوچاں ھم چہ بنی اسرائیل ءِ نماسگاں سبق زیرگی اِنت۔۔ مارا آھانی تاریخ ءَ پوہ بیئگی اِنت۔۔۔ مارا اے گپ زانگی اِنت کہ آھاں وتی ڈیھ چون پچ گِپتگ۔۔۔۔۔ مارا اے راستی ھم منگی اِنت کہ اسرائیل حضرت یعقوب ءِ چُک ءُ نماسگانی پِت ءُ پیرکی ھنکین بیتگ۔۔ مارا (Zionism) ءِ راستی زانگی اِنت کہ اے لیکہ نیشنلزم ءِ بنیاد ءِ سرا ایر کنگ بیتگ۔۔ مارا وت ءَ مُلائی بے سریں ترانانی تھا مان گیشینگی نہ اِنت۔۔۔۔۔۔۔ مُلا وتی ذاتی نپانی ھاترا ھر لبز ءُ گالبند ءَ وتی تب ءِ مطابق ءَ معنیٰ دینت۔۔۔۔۔۔۔۔۔۔۔۔۔۔۔۔۔
.....................................................................................................
دِلگوش: zionism ءِ گالبند  یہودی لبزانکی گالبندے۔۔۔ لبز Zion یروشلم ءِ ھما دو بُرزیں کوھانی ٹُلّانی میان ءِ ھما ھند ءِ شبین ءَ دنت کہ یہودی زانتکارانی گُشگ ءِ ردا ھما جاہ ءَ یہودی پیغمبر ”یہودا” یا David ءَ یہودی ریاست ءِ بُن ھِشت ایر کُتگ۔(بائیبل2 سموئیل 5:6:7:9)۔۔۔۔۔۔ ھمے تاریخی پشگرد اِنت کہ ایشی ءِ بنیاد ءَ یہودی راج وتی تاریخی استان ءِ جوڑ کنگ ءِ حق ءَ دار اَنت۔۔۔۔۔۔۔۔۔۔۔۔۔۔۔۔۔۔۔۔۔