ھالتاکاں ھمے گپ ونت کہ امریکا ءَ پاکستانی ملا حافظ سعید ءِ سر ءِ قیمت ءَ دہ میلین ڈالر ءِ جار جتگ۔ حافظ سعید ھما ناشرکاریں کہ آ ھندوستان ءِ بمب ارشاں زمہ وار نامینگ بیتگ۔ دومی نیمگ ءَ پاکی استان ءَ ھم اے گپ جتگ کہ حافظ سعید ءِ بابت ءَ ھچ وڑیں ثبوت نیست کہ آ ناشرکاری ءِ کرداں ھوار اِنت۔ او حافظ سعید ماں لاھور ءُ اسلام آباد ءَ پہ آزادی تریت ءُ پچیں جلسہ آں بھر زوریت، اے گپ ءَ چہ ھمے پدر بیت آئی ءَ آئی۔ایس۔آئی کمک الم گون اِنت۔ نو ادا ابکہی گپ اِش اِنت کہ امریکہ ءَ یک انچیں مردمی چار مزنیں ناشرکارانی لڑا ھوار کُتگ کہ آ ماں پاکستان ءَ سرعام گردیت۔ امریکا ءَ اے گپ ھم جتگ کہ منی گورا کاملیں ثبوت ھم است اَنت کہ حافظ سعید ناشرکاری ئے کاراں ھوار اِنت ءُ پاکستان ھچ وڑا اے گپ ءِ منگ ءَ تیار نہ اِنت۔ امریکا چون ثبوت دنت۔ اے رند ءِ گپے۔ بلے مردم ءِ ذھن ءَ اے گپ الم ردوم زوریت کہ امریکا ءِ ثبوت ھما دروشم ءَ بنت کہ آئی ءَ ماں افغانستان ءَ اسامہ ءِ بابت ءَ طالباناں دات اَنت۔ پدا دومی نیمگ ءَ ماں پاکستان ءَ مذھبی لیکہ چہ پیش ءَ گیشتر ردوم گِپتگ۔ مغرب اے کرداں ھچ وڑا برداشت کت نہ کنت۔ امریکی کانگریس ءَ بلوچ راجی وتواکی ءِ بابت ءَ قرار داد ءَ پد امریکا ءَ ماں پاکستان ءَ اے بنیادی پرستی جزبگ شریں وڑی ءَ مارتگ اَنت۔

دومی نیمگ ءَ اگاں ما بچاریں تہ ایرانی ملاھانی بدماشی ھم مغربی ملکانی برداشت ءَ ڈن بیتگ اَنت ءُ آ چِد ءُ گیشیں بدماشی برداشت کُت نہ کناں۔ آ پُر امن زندگی گوازینگ لوٹاں ، آ الم وڑی ناں وڑی اے بدماشیاں دارگ لوٹ اَنت۔۔۔۔

سیمی نیمگ ءَ اگاں ما بچاریں عرب دُنیا ھم تاریخ ءِ مستریں بدلی ئے نیمگ ءَ گام جنان اِنت۔ جاور ھال ھمے گمان ءَ پیشدارگ ءَ انت کہ آیوکیں ھپت ءُ ھشت سالانی تھا اے ھنداں بلاھیں بدلی سدلی ئے ودی بیئگ اِنت۔ عرب ڈکٹیٹر شپ رک اِت نہ کنت۔ ادا بلاھیں تباھی ءَ پد انتقال اقتدار بیت۔ یازدہ دوازدہ ملک  آیوکیں سالاں چر اے کزا ءَ رک اِت نہ کنت ۔اے سرجمیں کردانی باپشت ءَ کئی ءُ چونیں دستی ھوار انت، اے فیصلہ ءَ آیوکیں وھد کنت۔ بلے الم بنت۔ کوھنیں نظام ارتقا ءِ آخری سیمسراں سر بیتگ۔ بدل بیوک اِنت۔ اے چاگردی ءُ سیاسی رھبندانی جدلی ضرورت اِنت۔۔۔۔۔

اے سرجمیں راستیانی بنکی کڑیاں اگاں ھوار بہ گیج اِت تہ مردم الم ماریت کہ اے دمگ آیوکیں وھد ءَ  بلاھیں پرشت ءُ پروش ءُ بدلیانی آماچ بیت۔ چنکہ سیمسر پُرش اَنت ءُ چنکہ نوکیں سیمسر پہ کئی واھگانی پدا جوڑ بنت ، اے راستی ءَ آیوکیں وھد پدر کنت کہ ھمے وھد اِنت کہ ھمے جدلی راستیانی بن شون اِنت۔ اے بنت ، الم بنت۔ کسی من ایت یا نہ من ایت ، بلے بنت۔۔۔۔۔۔۔۔۔۔۔۔۔

دومی نیمگ ءَ چین کہ آ چیر ءُ اندری  ءَ گوں پاکی طالباناں ھچ وڑیں دژمنی نہ داریت۔ چیاکہ دشمن ءِ دشمن دوست اِنت۔۔۔۔۔ چیاکہ چائنا ءِ واھگ پہ امریکا ءَ نیک نہ اَنت، ناکہ امریکا گوں چائنا ءَ وش اِنت۔ اے ھبر ھم رد کنگ نہ بیت کہ ماں سلامتی کونسل ءَ شام ءُ سوریا ءِ ھلاپ ءَ پیش بیتگیں منگ نامہ چائنا ءَ بضدِ امریکا ءَ ویٹو کُتگ۔۔۔۔ چیاکہ یکے دومی نظر ءَ برائے نام سامراجی ءُ دومی سوشلسٹ ۔۔۔۔۔۔۔ اے گپ ءِ پدرائی امریکی سنیٹر ڈانا روھراباکر ءَ ھم کُتگ کہ پاکستان گوں سوشلسٹ چائنا ءَ نزیک اِنت۔۔ او ناکہ چائنا سوشلسٹ مُلکے۔۔ بلکیں پہ زور ھمے نام دیگ بیتگ۔۔۔۔۔ پدا پہ چائنا ءَ امریکا جوانیں ملکے نہ اِنت۔۔ امریکا ”تائیوان” ءَ ھما سلاہ ءُ ازباباں پجارینگ اِنت کہ آ مرچی چائنا ءِ برابری ءَ اوشتاتگ۔۔۔۔ چائنا تائیوان ءَ وتی بھری سرپد بیت۔۔۔ تبت آزادی ءِ نام ءَ گرگ اِنت۔۔ ”تبت” ءِ جاوراں امریکا نپ چست کُت کنت۔ پدا امریکا گوں انڈیا ءَ باز نزیک اِنت۔۔۔ انڈیا ءُ چائنا ءِ سیادی ھم جوان نہ اِنت،، سئے ماہ پیش چائنا ءَ ھمے نشوندھی پدا ماں ھندوستان ءِ سیمسراں مداخلت کُتگ ات۔۔۔۔۔۔۔۔۔۔

ادا نو آیوکیں وھد ءَ مزنیں سرپ بندی ئے بیت کنت۔ پاکستان ، چائنا ءُ ایران پہ ھما واجہ ءِ ھلاپ ءَ یکمشت بیت کن اَنت۔۔ عرب ھم وتی سیمسرانی پرشت ءُ پروش ءَ وش نہ اَنت۔۔۔ وھدیکہ دُنیا ءِ نوکیں سیمسری رھبندانی تھا عرب سیمسرانی پرشت ءُ پروش ءِ توجیل بیتگ۔ ھما واجہ ءِ نیو ورلڈ آرڈر اِنت۔۔۔۔آیوکیں وھد ءَ اے ھم بیت کنت کہ عرب خاکم وتی سیمسرانی پھریزگ ءَ وت ءَ نام گَپتیں سوشلزم(چائنا) ءِ پلو ءَ بدار اَنت۔ اے جاور پیدا بیتگ اَنت۔ آیوکیں وھد ءَ ٹوھیں جنگی بیت۔ جنگ ءَ کٹ ایت کئے؟ اے فیصلہ ءَ وھد کنت۔۔۔۔ بلے یک گپے ءَ من دِلجماں کہ جنگ ءِ میدان ”بلوچ زِر” بیت۔۔ بلوچ اے ھالاتاں چون وتی حق ءَ آؤرت کنت؟ بلوچ لیڈر میان استمانی لوٹاں چون وتی لوٹانی پدا ترینت کنت۔۔اے کار ھما لیڈرانی دست اِنت کہ آ راج ءَ تاں چنکہ ڈائرکشن دات کن اَنت۔ آیا ھما لیڈر کہ تاں انگت اے جاور ھالاں سرپد نہ اَنت ءُ پاکی استان ءِ ھمراہ اَنت۔۔۔آ ھوش کن اَنت۔۔ یا بلوچ سرجمیں رھشون اے راج ءِ سرا بزگ کن اَنت؟ ۔۔۔۔۔۔۔۔۔ آ پہ اے چیلنجانی دیمگیری ءَ یک مشت بنت۔۔ آ بلوچ راج ءَ چہ سِست ءُ سیدی ءَ کش اِت کن اَنت، ءُ گوں یکمشت ءُ تپاکی ءَ اے جاورھالانی دیمگیری ءِ ھاترا تیار کُت کن اَنت۔۔؟؟؟؟   اگاں ناں گُڑا آیوکیں وھد وتی فیصلہ ءَ وت شرتر دات کنت۔۔۔۔ بلے ادا ٹوھیں جنگی الم بیت۔۔۔۔۔۔۔۔۔۔۔۔۔۔۔۔۔۔۔۔