درمُلک پہ ندکار ءَ درامد اِنت۔ نہ مھر ءُ مھروانے ، نہ مونس ءُ دوزواہ۔ چو ھما آھوگ کہ رم ءَ سر سِستگ۔ بس یکیں راز اِنت کہ شپ آگھیں ارواہ گوں ماہ ءَ ھمتران بیت۔ پہ ندکار ءَ زند ءِ درانڈیھیں ساھتاں آزمان گندیں ماہ یکیں ھمراز اِنت کہ آئی ءِ نپس گیریں شپانی ھمراہ اِنت۔ ھمے کہ شپ مانشانیت تہ ندکار چو ھمروچیگیں وڑا بازار ءِ چپی نیمگ ءِ پِڑا نندیت ءُ گوں ماہ ءَ گوازی کنت۔ پہ آئی ءَ ماہ ءِ دو بستار اَنت۔ یکے ماہ ءَ ھم چو اگول ءُ درانڈیھیں بلوچی ءَ جاہ ءُ میتگ نیست۔ آ شپ جاہ ءُ روجاہ اِنت۔ دومی ماہ ءِ دیرمانیں سفر ھم چو بلوچ ءِ راجدپتر ءَ کوھن اِنت۔ ماہ ءَ ھم چو بلوچ راج ءَ اے زند ءِ سفر ءَ بازیں وھد ءُ کرن گوازینتگ۔تہ انگت ماہ ءِ نہ اوشتوکیں سفر چو بلوچ ءَ برجاہ اِنت۔ بلے منزل نیست۔ پمیشا ندکار ءَ ماہ ھم چو بلوچ ءَ دوست بیت۔۔۔۔۔۔۔۔۔.

"ماہ ندکار ءَ سک دوست بیت، چیاکہ ماہ ءِ دگہ ھم جوانیں بستاری کہ آ چہ زمین ءِ ھر چیز ءَ جُتا اِنت۔ ماہ ءِ مھراں حد ءُ سیمسر نیست۔ ماہ وتی رُژن ءَ پہ ھرکس ءَ تالان کنت۔ نیک ءُ بد ، دوست ءُ دُشمن، آئی ءِ مھر پہ ھرکس ءَ اِنت۔ ماہ بنی آدم ءِ وڑا بد نیت نہ اِنت۔ لب دوستی نہ اِنت۔ ھمے مزن دلے اِنت کہ ماہ ءَ چہ زمین جاھمننداں جُتا کنت۔ پمیشا پہ ندکار ءَ ماہ درانڈیھیں زند ءِ جوانتریں ھمراھے.............

پہ شاعر ءَ ماہ چے یے شبین ءَ دنت ؟۔۔۔۔ ھمے ماہ نیاد ءِ سیادی اِنت کہ گُلزمین جاہ نندیں راج شاعر ءَ ”عاقبت بخشیں مادری لولیانی” مارشتاں بخشائیت۔۔۔۔پمیشا پہ عطا ءَ ماھکان لال ءِ شنگ اِتگیں ”شار” ءِ شبین ءَ دنت ءُ ماہ نیادیں کلکشان مات ھاک ءِ مھرانی ابدمانیں لسھیں گیوار۔۔۔۔۔

پدا درانڈیھ موتک کاریت۔۔ ماہ ندکار ءِ سیادی ودّان کنت۔۔ شپ ءِ آھری پاس ءَ شاھگانیں آزمان ءِ دِلبند ءَ ماہ ءِ شررنگیں پیشانیگ ھوناک بیان کنت۔۔۔ چو گُشئے ماہ گوں گیمرانکیں چماں گوں من ھمتران بیت۔۔۔پہ من ماہ گُشئے کِسہ کاریت۔۔۔ ھمے کِسّہ اَنت کہ منی ارواہ ءِ دامن ءَ نکش بنت۔۔۔درانڈیھی ءِ نیم شپے پاساں من ءَ ٹوھین اَنت ءُ واب ءَ نئیلنت۔۔۔۔۔۔۔۔ھؤ ماہ کِسہ کاریت۔۔ ھمے کِسہ اَنت کہ منی ارواہ ءِ موتک جوڑ بنت۔۔۔ راج ُپلانی سنج بستگیں ھونانی کِسہ۔۔۔گُلزمین نہادی یے سوداگرانی کِسہ۔۔۔۔۔۔۔۔۔۔۔۔۔۔۔۔۔

عطا ھنکین ءَ مرچاں راج سوداگریں قحبگ ءُ لِٹکیں میر ءُ مُلا ءُ برکت دروشمیں شَپُک ، دُزّ ءُ ڈُنگاں جاگہ کُتگ۔۔۔ دُزیں رِند گروپ ءُ نوکیں عھد ءِ لِٹک گونگیں حمل ، ”بامرد حمل زِرگنج” ءِ مڈیانی لُٹ ءُ پُل ءَ کنگ ءَ اَنت۔۔۔۔(عوامی) سِنچ ءِ راج سوداگر یک رندی پدا رُپت ءُ روپ ءِ چِن ءُ لانچ ءَ اَنت ءُ نوکیں نام گِپتیں الیکشن یا سلیکشن ءِ تیاری ءَ کنگ ءَ اَنت۔۔۔گھنٹہ لوٹوکیں اُلس راج پُلانی ھونانی سِنچ ءَ ناپوہ ءُ وت ءَ بھا کنگ ءَ اَنت۔۔۔۔۔۔ ہر گور ءَ کاسگ چٹانی لڑے گندگ ءَ کئیت۔۔۔مائی کلاچی ءِ ھنکین ءَ آس ءُ آسگواری اِنت۔۔۔۔ ھر کس سوداگر جوڑ بیتگ۔۔۔۔۔۔۔۔۔ بلے ماہ ءِ مرمرانکیں رُژن ءِ تھا من عطا ارواہ ءِ چیھانٹ ءَ گنداں کہ ھنکین الس ءِ ناپوھی ءِ غماں ”مُرگاپ شھید بچانی” مرگ ءِ سرا موتک کاریت ءُ گُشیت۔۔۔۔۔۔۔۔

              دور سریں ڈیھ ءِ جاھمنندیے تو
              راج ءِ ھِچ سکّی ءَ مہ گندیے تو
              زندگیں مرچی بے تو بے زنداں
              زندگیں مُردگانی زندیے تو

              تئی ھمراہ استمان ھاریں
             ظلم ءِ زمزیل ءَ بہ سندیے تو
             گیمریتِ، چوں تئی جتائی ءَ دِل
             مئے گُلیں واھگانی جِندیے تو

             راست مِنزل پدا گِسر کَپتگ
             حق ، راہ گار کُرتگ ما
            اچ وتی کم بزانتی ءِ جُرم ءَ
            بار بے باورانی زُرتگ ما

           مارتگ کُچل ءَ را ما شَکّل
           داتہ تریاک ، مار مُرتگ ما
            لکھی ئیں ساہ ما کُتگ ایر جیگ
            ما گل ءُ بال باج بُرتگ ما

            وائے کونجانی سِستگیں ٹولی
           گیر کاینت تئی شیرکنیں بولی
            گوانزگی دعا ءِ پُلگُدیں ورنا
            عاقبت بخشیں مادر ءِ لولی

            گُلزمین اِنت پدا توار ترا
            جی ، منی مھر ءِ سرمچار ترا
            چم چیر گیج پہ تئی راہ ءَ
           دامن اِنت دِل پہ تئی سر ءُ ساہ ءَ

           مات اے لکھی ئیں زھیریگ اَنت
           اچ تئی رفتن ءَ پُرسیگ اَنت
           بنگویں برات ءُ تنگوئیں بچیگ
            تئی وداریگ ، دروھی ءِ بندیگ

           سبزگیں تَل ءُ سُرمہ بندیں کوہ
           تئی راھچار شیشگیں شھجو
                ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بلے دوشی ماہ ءِ شررنگیں بالاد گُشئے زوراکیں جمبراں مانپوش اِتگ اَت۔ ندکار ءِ چماں گُشئے ماہ ءِ درپشناکیں پیشانی ءَ سُھری ءَ مانشانتگ اَت ، چو منی ڈیھ ءِ شر رنگیں پیشانی ءِ وڑا۔ پہ منی چماں یا راستی گُشئے ماہ ءِ دلبند ءَ ھم منی راج شھیدانی ھونانی رنگ تالان اَت۔ ماہ دل زدگ اَت۔ گوں ملوریں چماں چہ ندکار ءَ پُرسگ ءَ اَت۔

”بے دل، تاں کدین ءَ چو بے سمائی نندئے ءُ وتی راج شھیدیں بچانی مرگ ءِ سرا موتک کار یے؟”