بی۔آر۔پی ءِ بنجاھی جارکش بلوچ راجدوست واجہ شیر محمد بگٹی ءَ یک رندی پدا اے گپ نشون دیان ءَ گُشتگ کہ ”ریفرنڈم” بلوچ جیڑہ ءِ گیشوار نہ اِنت۔۔۔ ریفرنڈم ءِ گپ بس یک جُستی یے پسہ ءَ گُشگ بیتگ۔ ایراد گرگ جوانیں عملے نہ اِنت۔ ”تنقید برائے تعمیر” ءَ جوانیں آسر در کاینت۔۔۔۔۔ ریفرنڈم ءِ گپ ھما وھد ءَ دیم ءَ اَتک کہ واجہ مھران بلوچ ءُ واجہ براھمدگ بگٹی ءَ ”قاتل مشرف” ءِ ھمے گپ ءِ پژگرد ءَ کہ ”بلوچ راج پاکستان ءِ ھمراہ اِنت بس لھتے مردماں آجوئی گپ ءَ جن اَنت” پسہ دیان ءَ گُشت کہ ”اگاں بلوچ پاکی استان ءِ تھا نندگ لوٹیت تہ یو۔این۔او ءِ چیر دستی ءَ ریفرنڈم کنگ بہ بیت، اگاں بلوچ راج ءَ پاکی استان ءِ گُما نندگ ءِ فیصلہ دات تہ آجوئی ءِ لوٹ ءَ چہ دست بردار بئیں” اگاں اے گپانی اسباب ءُ موقع و محل ءَ دیم ءَ بہ کن یے ءُ بچاریے تہ بلوچ رھشونانی مول ءُ مراد ریفرنڈم ءِ لوٹ نہ اِنت۔ بلکیں دُنیا ءِ دیم ءَ ھمے نشونداری کنگ اِنت کہ بلوچ راج پاکستان ءِ گُما نندگ ءَ تیار نہ اِنت ءُ وتی آجوئیں ءُ تاریخی بستار ءِ دوبر برجاہ کنگ ءَ جنگ ءَ اِنت۔۔۔۔۔۔۔۔۔۔۔۔۔۔۔
بلے دومی نیمگ ءَ ما بچاریں تہ ھمے سرپد بئیں مئے رسانکدر ءَ ھمے گپ ردیں رنگاں دیم ءَ آؤرتگ اَنت۔۔ ھمے گپ چہ اسباب ءُ موقع و محل ردا کش اِتگ ءُ انچیں رنگے ءَ دیم ءَ آؤرتگ اَنت کہ راج ھمے سرپد بیت کہ ادا ریفرنڈم ءِ لوٹ بیئگ اِنت۔۔۔ اے مئے رسانک ءِ چہ راجی لوٹاں ناپوہ بیئگ ءِ مستریں مثال اِنت۔۔رھشون یک فردی آ یک گپے جنت تہ بیت کنت کہ آ ھما سھت ءَ ھما گپ ءِ منطقی درچاں پدر کُت مہ کنت۔۔۔ اے راجی رسانکدر ءُ راجی ندکار ءِ کار اِنت کہ آ ھمے گپ ءِ دُرھیں پہلوآنی سرا تگ ءُ گیچن بہ کنت ءُ راج ءَ اے بہ ڈس ایت کہ اے کجام وھد ءَ کجام جست ءِ پسو ءَ گُشگ بیتگ ءُ اے گپ ءِ منطقی درچ چی اَنت ءُ پرچا گُشگ بیتگ۔ بلے اگاں پہ راستی بچارے نہ واجہ مھران ءَ اے گپ لوٹ ریفرنڈم بیتگ نہ راجی رھشون واجہ براھمدگ ءِ۔۔۔ بلکیں اے گپ پہ مثال۔۔ ھما گپانی جواب ءَ او دُنیا ءَ ھمے نشونداری کنگ ءَ جنگ بیتگ کہ بلوچ راج پاکی استان ءِ گما نندگ ءَ تیار نہ اِنت ءُ راجی آجوئی ءِ ھاترا جنگ ءَ اِنت۔۔۔۔۔ ناکہ ناپوھیں رسانکدر ءُ ندکاراں اے گپ ءِ اسل دروشم راج ءِ دیم ءَ پدر کُت ۔۔۔۔۔۔۔۔۔۔۔
گُڑا بگر کہ گیپتگ یے۔۔۔۔ بیان بازی ءِ لڑ پدا بندات بوت۔۔۔ گُشنت کہ گپ ءِ سرپد نہ بیئگ مستریں کفر اِنت۔۔۔ گُڑا رند ءَ رسانکدر ءَ ھمے ھبر شنگ بیت اَنت کہ ”ریفرنڈم” بلوچ جیڑہ ءِ گیشوار نہ اِنت ءُ درملکی رھشون بلوچ ءِ فیصلہ ءَ کُت نہ کن اَنت ءُ میان استمانی مراگشاں گُشتانک دیوک بلوچ ءِ نمائندہ نہ اَنت”۔۔۔۔۔
بلے گپ اِش اِنت کہ اگاں ریفرنڈم ءِ جیڑہ دیم ءَ بئیت تہ پاکستان ھچبر قبول نہ کنت۔اگاں چوشیں گپے میان استمانی گلانی نیمگ ءَ بئیت تہ مارا نہ منگ ءِ ھم ضرورت نہ اِنت ۔ چیاکہ من یک گپے ءَ دل ءَ جزماں کہ پاکستان مارا چہ پیسر ریفرنڈم ءَ ریجیکٹ کنت۔ چیاکہ ریفرنڈم اگاں میان استمانی گلانی چیر دستی ءَ بہ بیت تہ آ ریفرنڈم ءِ منگ ءُ نہ منگ پاکستان ءِ مرگ اِنت او اے گپ ءَ چہ پیش ما وت ءَ چیا گپچلاں چگل بہ دئیں ۔ او انو ریفرنڈم ھم مئے سر ءِ درد نہ اِنت۔۔ بلے وھد ءَ چہ پیش بلوچ راجدوستانی ریفرنڈم ءِ نہ منگ ءِ گپ ءَ من ءَ یک بلوچی کِسہے یاد کئیت۔۔۔۔
”مرد شُت زاماتی ءَ۔۔ گُڑا ناکو ءِ گس ءَ سر بیئگ ءَ گوں مرد ءَ دیست کہ منی نام گیپتیں دشتار گریوگ اِنت ۔ مرد ھیران بوت کہ چے گپے۔ آئی ءَ ناکو جست کہ منی ناز ءُ نایاپتیں دشتار چیا گریوگ اِنت؟ گُڑا ناکو ءَ درائینت کہ تئی دشتار پہ ھمے ھاترا گریوگ اِنت کہ من سور کناں، سور ءَ رند من ءَ چُکے بیت۔۔ منی چُک مزن بیت ءُ روت لئیب ءَ ۔ چات ءَ کپیت ءُ مِریت۔ اے ھما ھیالانی زر ءَ بُڑاِتگ ءُ وتی ھیالی چُک ءِ سرا موتک آرگ اِنت ءُ گریوگ اِنت۔۔ گُڑا مرد ھم وتی ھیالی زھگ ءِ مرگ ءِ سرا گریوگ ءَ لگ اِت”
من گُشاں وھد ءَ چہ پیش ریفرنڈم ءِ نہ منگ ءِ گپ جنگ ھمے دوئیں دشتارانی ھیالی زھگ ءِ مرگ ءِ سرا گریوگ ءِ مثال اِنت
