منی یک جُتائیں تبے کہ ھرچی دل ءَ کئیت نبشتہ کناں۔۔بس لبز بلوچی اَنت۔ ھیال ھر وڑیں بنت تہ نبشتہ کناں۔ من ءَ دوست بنت۔ نوشتانکانی اسٹینڈر چنکہ جوانیں یا چنکہ جھلیں ، من ءَ گوں اے کار ءَ ھم کار نیست۔ ناکہ من ننداں ءُ جوڑیننتگیں ھیالانی تھا بدلی سدلی کاراں۔۔۔ اے من ءَ ھم وش نہ بیت۔۔۔ پمیشا جاھی جاھی منی نبشتانک ترپل ءُ سبک اَنت۔ او ناکہ من اے پرشتگیں ھیالاں چو روایتی مردمانی وڑا تاکانی سرا نبشتہ کناں ءُ وتی پُتینکاں ایر کناں۔۔چیاکہ من ءَ چو روایتی شاعر ءُ ادیبانی وڑا کتاب ءِ کَشگ ءِ ھم شوق نیست۔۔۔اگاں بہ بیت تہ منی اے سیاھگ کئی کجام درد ءَ ور اَنت؟۔۔۔ اے پرشتگیں ھیال کیا دوست بنت یا کیا دوست نہ بنت، من ءَ گوں ایشی ءَ ھم کار نیست۔۔۔۔۔۔۔۔چیاکہ ھرکسی تب دگرے۔ دومی ءَ گوں ھمگرنچ بیت نہ کنت۔ او اگاں کسے ھمے ھیالانی پژگرد ءَ چِست بیت ءُ ایراد گیپت تہ من باز وش باں کہ منی راج ءِ تھا یکے انگت پش کَپتگ کہ ایرادی ذھنی داریت ءُ یاغی ایں۔۔ وتی تب ءُ میئل ءِ ردا چار ءُ بچار کنت۔۔ بلے چشیں مردم ھم کم اِنت۔۔۔۔ دگہ کسے اگاں ھمے سیاھگانی پژگرد ءَ چِست بیت ءُ من ءَ بَد ءُ رد کنت تہ من ھمے سرپد باں کہ بُت جوڑ کنوکی۔۔۔۔ من آئی ءِ بُت جوڑ کنگ ءِ قالب ءَ نیاھاں پمیشا من اینکہ دِل نہ کناں۔۔۔۔۔۔۔۔بلے دگہ ھم لھتے پش کپتاں کہ ھمے سیاھگانی وانگ ءَ پد گوں من ھمتران بنت ءُ منی ستاہ ءُ توصیف ءَ شروع کن اَنت۔۔۔ گُڑا من باز پدرد باں ، ءُ منی ھیالانی تھا ھمے گمان سر کشیت کہ من ھم بُتے آں۔۔۔۔ بُت مردگاں۔۔۔ پمیشا من وتی جبین ءِ اندر ءَ سر کشاں ءُ چاراں کہ باریں من نہ مُرتگ آں۔۔۔۔۔۔۔۔۔۔۔

 یک فلسفہ ئے کہ اے جھان ءَ ھچ چیز کامل نہ اِنت۔ مکمل نہ اِنت۔۔ انسانی زانت بہ بیت یا زند ءَ گوں سیادی داروکیں ھر چیز نامکمل اِنت۔۔۔۔ کاملے ءِ دعوا دار مُردگ انت۔۔۔ درچک رُدان کنت۔۔ سال ءُ سیم گوز اَنت۔ آ رُدان اِنت۔۔۔ بلے وھدی کہ مکمل بیت تہ مِریت۔۔۔ انسانی زانت ءُ شعور ءِ مثال ھم ھمیش اِنت۔۔۔۔۔منی سِنچ ءُ زانت ءِ ردا ھچ چیز مکمل نہ اِنت۔ ردوم ءِ تھا اِنت، اوشتانک نہ اِنت۔۔ سائنسی زانت ءِ ردا جھان ھم مکمل نہ اِنت۔ پراہ ءُ شاھگان بیان اِنت۔۔۔۔ اگاں مکمل بہ بیت۔۔ اوشت ءِ آماچ بہ بیت تہ مِریت۔۔۔ تباہ بیت۔۔ پشت نہ کپیت۔۔۔۔انسانی زانت بہ بیت یا زند ءَ گوں سیادی داروکیں ھر چیز ردوم ءِ تھا اِنت۔۔۔ اگاں اوشت ءِ آماچ بہ بیت چو شِنز بستگیں آپ ءَ بیت۔۔۔۔۔ھچ کار نہ دنت۔۔ چر آئی ءِ کارمرز کنگ ءَ نادراھی شنگ بنت۔۔۔۔۔۔مطلق (Absolute) مذھبی فلسفہ ئے۔۔۔ بلے گرورجنیش (اوشو) گُشیت خدا ھم مطلق(Absolute) گشگ نہ بیت۔چیاکہ مطلق اوشتوکیں بزانتے داریت۔ سرجم ءُ مکملیں بزانتے داریت۔۔۔مکمل آسر اِنت، انجام اِنت۔ آسر ءُ مکمل ءِ بزانت نیستی اِنت۔۔۔ کاری کہ آسرا رسیت ھلاس بیت۔۔ پش نہ کپیت۔مِریت۔۔۔۔۔۔۔۔۔۔

بلے زند ءِ بزانت ارتقا (Evolution) اِنت۔ انسانی چاگرد ءُ سنچ ءُ شعور ءُ زانت ارتقا ءِ تھا اِنت۔ پمیشا مکمل گُشگ نہ بیت۔ھچ چیز پیلہ نہ اِنت۔۔۔دگہ گپے ”چارلس ڈاروین” ءِ Theory of Evolution سائنسداناں رد کُتگ۔۔چیاکہ آھانی ردا چہ انسانی گوست ءُ دمبانی تھا چوشیں ھَڈ ءُ نشانی در نہ کپتگ کہ آ انسانی عبوری دؤر ءِ نشون ءَ بِدینت۔ بزاں شادو ءَ بگر تاں انسان ءَ انسان ھچ چوشیں عبوری دؤرے ءَ نہ گوستگ کہ چر ایشی ءَ چہ ھمے نشون بِرسیت کہ انسان ءَ چوشیں مزنیں دورے گواز کُتگ۔ بزاں بے دُمبیں شادوانی ھڈ دز نہ کپتگ اَنت۔۔۔۔۔۔ بلے ایشی ءَ اگاں ما انسانی سِنچ ءُ شعور ءِ حوالہ ءَ بہ زیریں تہ راست اِنت۔۔۔انسانی زانت ءُ شعور ءَ بازیں ارتقائی سفری بُراِتگ۔۔۔۔ڈاروین ءَ چہ پیش دگہ کافریں عرب تاریخ دانے ھم گوستگ کہ آئی ءَ ھمے لیکہ پیش کُتگ۔۔۔بزاں ارتقائی سائنس ءِ پیش کنوکیں اولی مردم ڈاروین نہ اِنت۔۔۔بلکیں عرب فلسفی ”ابن مسکویہ” اِنت۔۔۔ابن مسکویہ ءِ ردا انسانی شعور ءُ زانت ءَ سنگ ءِ دؤر ءَ بگر تاں انوگیں وھد ءَ بازیں ارتقائی سفری بُرِتگ۔۔۔مسکویہ ءِردا تاں انگت لھتے راج ھمے زانت ءُ شعور ءِ ارتقائی سفر ءَ چہ لھتے دگہ راجاں پشت کپتگ اَنت۔۔۔آئی ءِ اے گپ راست بیت کنت ، بلے آئی ءِ گیشینتگیں رھبند رد اِنت۔۔۔آ گُشیت اے زانت ءُ شعور ءِ سفر ءَ عرب اولی سرپ ءَ اَنت ءُ افریقی سیاہ آخری۔۔ بلے اے شعور ءُ زانت ءِ ارتقا ءِ سفر ءِ گیشوار راجانی بنیاد ءَ بیت نہ کنت۔۔ بلکیں فردانی بنیاد ءَ بیت کنت۔۔۔چیاکہ لھتے ایردستیں راجانی تھا انچیں مردم ودی بیتگ کہ آھاں راجدپتر ٹھینتگ۔۔۔ اے ردا خلیل جبران ءُ بلوچانی عطاشاد جوانتریں مثال اَنت۔۔۔۔۔۔۔۔۔بلے زانت ءُ شعور ءِ سفر مکمل نہ اِنت۔۔ مطلق نہ اِنت۔۔ چیاکہ مکمل مِریت۔۔ مطلق آسر اِنت۔۔۔۔۔۔۔۔

بلے انسان مرگ ءِ بیم ءِ آماچ اِنت۔۔۔ پمیشا آ مرگ ءَ دوست داریت۔۔۔۔۔۔وت ءَ کُشیت۔۔۔۔ وت ءَ مکمل ءُ سرجم گُشیت یا مطلق ((Absolute) ئے ءِ درگیجگ ءِ شوپچ ءَ کپتگ۔۔۔۔۔۔۔۔پاکستانی دربرجاہ ءُ مذھبی مدرسہ چِدو گنتر اَنت۔۔۔۔۔۔۔۔ پاکستانی دربرجاھاں ”مطلق العنان”(Absoluteness) ءِ گالبند باز جاہ ءَ مئے دیم ءَ گوستگ۔۔۔۔۔۔۔۔ھمے بیم آماچی اِنت کہ انسان ءِ دل ءُ ضمیرانی تھا جاھے کُتگ۔۔۔۔۔۔۔۔اے بیم آماچی ءِ نادراھی ءِ آسر ھمیش اِنت کہ وت ءَ مکمل ءُ سرجم بہ گُش یا مطلقے ءِ درگیجگ ءِ جھد ءَ بہ کن ءُ وتی مول ءُ مرادانی پیلہی یے دعا چہ ھمائی ءَ بہ لوٹ۔۔۔۔۔۔پمیشا انسان ءَ وت ءَ کُشتگ ءُ آ قبرانی زیارت ءَ کنت۔۔۔۔۔۔۔۔۔۔۔دومی آ لیکھی حساب ءَ وت ءَ سرجم ءُ مکمل گُشیت۔۔۔۔بلے اگاں پہ راستی بہ چاریے تہ انسانی سنچ ءُ زانت، علم ءُ یا چاگردی ءُ سیاسی راھبند ءُ لیکہ مکمل ءُ سرجم نہ اَنت۔۔۔۔۔۔۔۔چیاکہ مکمل مَرگ اِنت۔ انچوکہ زند گوں مرگ ءَ سرجم بیت۔۔ مَرگ ھر چیز ءِ آسر اِنت۔۔۔۔۔۔۔بلے انسان ھمائی ءَ کنت کہ آئی ءِ دِل بہ لوٹیت۔۔۔۔۔۔