بُت پروشیں بادشاہ۔۔۔۔۔۔۔

سول حمزہ توف کِسہ کنت۔۔۔۔۔۔۔۔۔۔

”است اَت بادشاھے۔۔۔سکیں زوراکیں بادشاھے اَت۔ ھرکس ءَ تُرس اِت۔ بادشاہ ءِ ھلاپ ءَ کس ءَ توار چِست کُت نہ کُت۔ ندکاراں ، لھتے ءَ پہ تُرس ءُ لھتے ءَ پہ لالچ بادشاہ ءِ ستاہ ءُ توصیف کُت۔۔شاعراں بادشاہ ءِ ساڑاہ ءَ شعر پِر بست۔۔۔ دراجیں شعر ۔۔۔۔۔۔۔۔۔۔۔وھد روان اَت۔ بادشاہ ءِ زلم ءُ زوراکی برجاہ۔۔۔۔ کاسگ چٹانی ستاھاں بادشاہ گیشتر گنوک کُتگ اَت۔۔۔۔۔۔۔بلے دیر نہ گوست مُلک ءِ ھالتاکانی تھا بادشاہ ءِ زلم ءُ زوراکیانی ھلاپ ءَ شعری شنگ بوت۔۔۔ شاعر زانگ نہ بوت کہ کئے اِنت۔۔۔بادشاہ پریشان بوت۔۔۔۔ چیاکہ چِد ءُ پیش ھرکس ءَ بادشاہ ءِ توصیف ءُ ستاہ کُتگ اَت۔۔۔۔۔ دپ چٹیں وزیر ءَ بادشاہ سلاہ دات ءُ گُشت کہ مُلک ءِ سرجمیں شاعراں لوٹائین ءُ شعر گُشگ فرمائے۔۔۔۔فوج دیم دیگ بوت ۔۔۔سرجمیں شاعر بادشاہ ءِ دربار ءَ آرگ بوتاں۔۔۔۔ سئے سد ءَ گیش شاعر اِتاں۔۔۔ ٹوھیں ٹوھیں شاعر۔۔۔۔درستیں شاعراں شعر ونت ءُ بادشاہ ءِ تعریف کُت۔۔بس سئے شاعر پشت کپت۔۔۔۔ اے سئیں بادشاہ ءَ جیل ءَ دیم دات اَنت۔۔۔ سئے روچ ءَ پد بادشاہ ءَ پدا سئیں شاعر لوٹائینتاں۔۔۔ نو دو شاعر ءَ شعر ونت ءُ بادشاہ ءِ تعریف کُت۔۔۔ بلے یکے ءَ نہ ونت۔۔۔۔بادشاہ ءَ یکیں شاعر جیل ءَ دیم دات۔۔۔ پدا سئے روچ ءَ رند یکیں شاعر لوٹائینگ بوت ۔۔۔۔ بلے شاعر ءَ شعری ونت۔۔۔۔چونیں شعری ؟؟؟؟ بادشاہ ءِ تعریفی نہ کُت۔۔۔بلکیں انچیں شعرے کہ بادشاہ ءِ زلم ءُ زوراکی ئے ایر جتاں۔۔۔۔۔دپ چٹیں وزیر برانز گِپت۔۔۔ گُشتی واجہ چیا داشتگ۔۔ اے مئے دیم ءَ مئے ایماندار ءُ ساپ ءُ سلھیں بادشاہ ءَ ایر جنگ اِنت۔۔۔۔۔۔۔۔۔۔۔بلے بادشاہ ءَ گُشت۔ ”مرد ءَ ھچ مہ کن یے۔من دِلجماں کہ دانکہ منی سر زمین ءَ چوشیں راست گُشین انسان است اَنت تہ اے قوم زندگ اِنت”۔۔۔۔۔ بادشاہ ءَ حکم دات کہ آدگہ دوسد ءُ نود ءُ نوھیں شاعراں گوں وزیر ءَ پاھو بِدیے ءُ بس ھمے یکیں شاعر ءَ وئیل بہ کن یے۔۔۔۔چیاکہ راجانی نگھپان بس انچیں شاعر بنت”

بلے مرچی ما اگاں بچاریں تہ ناں چوشیں راست گُشیں شاعر گندگ ءَ کئیت ءُ ناں چوشیں راست گوشداروکیں بادشاہ۔۔۔۔۔۔ بلکیں بُت ءُ سُجدہ کنوک پشت کپتگ اَنت۔۔۔۔۔۔۔۔۔۔۔۔

...................................................................

بُت پروشیں رھشون۔۔۔۔۔۔۔۔۔۔۔۔۔۔

یہودی ندکار”مائیکل ھارٹ” گُشیت ”من وھدی وتی عالمی ٹوھیں انسانانی سرا نبشتہ کُتگیں کتاب ءِ کماتگیں لڑ ءَ اسلام ءِ پیغمبر محمد (ص) اولی نمبر کُتگ تہ یھودی ملا ءُ مرشد منی سرا سک زھر بیتگ اَنت۔۔۔ بلے من مجبور بیتگ اَنت کہ من محمد (ص) ءَ دُنیا ءِ سد ٹوھیں انسانانی سرپ ءَ اولی مردم بہ کناں۔۔۔ چیاکہ محمد مذھبی ءُ سیاسی تکاں روایتانی پروشگ ءَ سوب مند بیتگ۔ دگہ ھچ کس ءَ چوشیں سوب مندی نہ رستگ۔ وھدی کہ اے لڑ ءَ دومی مردم سائنسی دُنیا ءِ روایت پروشیں آئن اسٹائن یا نیوٹن انت۔۔۔اسلام ءِ ٹوھیں پیغمبر ھاک ءِ بُتانی پروشگ ءَ ھوار سیاسی ءُ چاگردی بُتانی پروشگ ءَ ھم سوب مند بیتگ۔۔۔۔۔۔ ھرکس ءَ”اظہار رائے” ءِ آزادی دیگ بیتگ۔۔۔ پمیشا اسلام ءِ تاریخ ءَ سئے جاہ ءَ حضرت محمد (ص) ءَ ابئید حضرت عمر ءِ گپ زورگ بیتگ۔ حضرت محمد (ص) مرگ ءِ وھد ءَ سک گریت۔۔۔ منی وڑیں دپ نہ اوشتیں مردمی جُستے کنت کہ محمد (ص) تو دلیریں انسانی بیتگ یے، تہ آ جواب دنت۔۔

”اڈے نادان ،، من اے واستہ نہ گریواں کہ موت منی سرا ساھیل اِنت، (چیاکہ منی وڑیں ٹوھیں انساناں موت نہ کُشیت)، من پہ ھمے ھاترا گریواں کہ منی مرگ ءَ پد منی راج منی بُت ءَ جوڑ کنت”

بلے مرچیگیں دور ءَ ھاک ءِ بُت وا نیست، بلے سیاسی ءُ چاگردی بُت سک باز اِنت۔۔۔۔۔۔۔۔۔۔۔۔۔.....

........................................................................
بُت پروشیں حاکم۔۔۔۔۔۔۔۔۔۔۔۔۔۔۔

اسلام ءِ تاریخ ءِ تھا ابوبکر(رض) ءِ وڑیں راست گُش ءُ دلیریں حاکمی ءِ مرگ پہ مسلماناں باز تاوان باریں گپے اَت۔۔۔ ھزاراں دل پدرد ءُ چم ارسیگ بیتاں۔۔۔۔چوشیں حاکم انسانی راجدپتر ءِ تھا ھم نگواھیت۔۔۔۔ بلے بامرد ءُ دلیریں عمر (رض) مسلماناں وتی حاکم جوڑ کُت۔۔۔۔عمر اسلامی رھبندانی سرا بنیاد پرستی ءِ حدا جذباتی ایں  انسانی اَت۔۔ بلے بُت پروشی اَت۔۔۔۔۔۔۔۔۔۔حضرت عمر حاکم نامینگ بیت۔۔۔۔ آئی ءِ ایمانداری ءِ سرا کس ءَ شک نیست اَت۔۔۔۔۔۔۔عمر سکیں منصفی اَت۔۔۔۔آئی ءِ اے دانک تاں روچ ءِ مروچی تاریخ ءِ دِلبند ءَ نکش اَنت ”دجلہ کور ءِ لمب ءَ کُچکے چہ تُنّ ءَ بہ مِر ایت، من ءَ تُرسیت کہ اللہ آئی ءِ جست ءَ من ءَ کنت کہ من دور ءِ حاکم اَنت” دانکہ دجلہ کور تاں کرناں ھار اِنت ءُ اودا آپ ءِ کمی ھم نہ اِنت۔۔۔۔۔۔۔۔۔۔۔۔۔۔۔۔۔۔۔۔۔۔۔ایشی ءَ چہ ابئید عمر ٹوھیں بُت پروشی اَت۔۔۔۔۔۔۔۔۔

حاکمی ءِ اولی روچ ءَ کعبہ ءِ محراب ءَ سر کپت ءُ گُشتانک دیان ءَ گُشتے ، مردمانی دیم ءَ سوالے ایر کُت کہ

” اے مسلماناں : من اگاں محمدی ءُ ابوبکری راہ ءَ یک پِش ءِ ٹالے ءَ چہ گِسر بہ باں۔ انصاف مہ کناں تہ شُما چی کن یے”؟؟؟؟؟؟؟؟

کس ءَ ھچ نہ گُشت، چیاکہ عمر وھد ءِ حاکم اَت۔۔۔۔۔۔۔۔

آئی ءَ دوبر ھمے سوال کُت۔۔۔

تہ کس ءَ ھچ نہ گُشت۔۔ چیاکہ آھانی نظر ءَ عمر زوراک اَت۔۔۔۔۔۔۔۔۔

سیمی بر ءَ پدا ھمے سوال ءِ کنگ ءَ گوں یک ورناھی چِست بوت ءُزھمے کَش اِت ءُ دیمی گوں عمر ءَ کُت ءُ گُشتے۔۔۔۔

”اگاں چہ بنکی رھبنداں ءَ گِسر بہ بئے گُڑا من اے زھم ءَ زیراں ءُ تئی سرا سِنداں”

آ وھد ءَ ھم چو مئے وڑیں بُت جوڑ کنوک باز اَت، آ پاد اَتک اَنت ءُ ورناہ ءِ تیلانک دیان کُت کہ چہ ماڑی ءَ ڈَنّ ءِ کشیں ءُ سزائی دئیں کہ وھد ءِ حاکم ءَ چو گُشگ اِنت۔۔ اے مزنیں بد تمیزیں ورناھی۔۔۔۔

گُڑا حضرت عمر ءَ دیم گوں ھمے بُٹ جوڑ کنوکاں کُت ءُ بیھار دیان ءَ گُشتے

”وئیل کن یے ورناہ ءَ۔۔۔تاں منی راج ءِ تھا چوشیں ورناہ  است اَنت تہ من دل ءَ جزماں کہ منی راج زندگ اِنت”۔۔

ھمیش اِنت عمر ءِ بُت پروشی ءِ جوانیں مثال کہ نوکیں دور ءِ مسلماناں پراموش کُتگ۔۔۔۔۔۔پمیشا بقول حضرت عمر اے مردگ اَنت۔۔۔۔۔۔سجدہ کنوکاں۔۔۔۔۔۔۔۔۔۔۔۔۔۔۔

.......................................................
بُت پروشیں آشوبی۔۔۔۔۔۔

چے گویرا میان استمانی جھد کاری بیتگ۔ جنگولی بیتگ ۔۔۔۔۔ بُت پروشیں آشوبی ئے بیتگ۔۔راستی اِش اِنت کہ شُما چے گویرا ءِ اے راستی آں چہ آئی ءِ اے نمدی ءَ بچاریے کہ آئی ءَ فیڈل کاسترو ءِ سرا نبشتہ کُتگ۔ اے پہ ھر بُت جوڑ کنوکیں آشوبی ءَ سبقے۔۔۔۔۔۔

””دوستیں فیڈل،،

اے وھد ءَ من ءَ تئی گُما مھر ءُ دوستیانی بابت ءَ ھر چیز گیر آیگ اِنت،من ءَ ھما روچ یاد آیگ ءَ اَنت کہ وھدی "ماريا انتونى"ءِ گس ءَ ما ءُ تو دوچار کپتیں،،وھدیکہ تو من ءَ آشوب ءَ ھوار بیئگ ءِ سکین دات،،پہ آشوب ءِ ھاترا ساڑی بیئگ ءَ ھما سرجمیں مشکلان کہ ما دوچار بیتگاں آ سرجم گیر آیگ ءَ انت،،یکے ھما دور بیتگ کہ اے جُست دیم ءَ اَتکگ کہ ساہ کندن ءِ وھد ءَ چون یکے دومی ھال دیگ بہ بیت،،چیاکہ آشوب ءِ وھد ءَ مارا درستاں مرگ ءِ گورامبازگ ءِ گُمان بیتگ،،رندا مارا ھمے مارشت رستگ کہ آشوبیاں سوب مند بیئگی انت یا مرگ گورامباز کنگی اِنت،،( اگاں آ آشوب یک راستیں آشوبی بہ بیت) او مئے بازیں سنگت گوں مرگ ءَ ھمگرنچ بیتتگاں،،

نو وھدیکہ ما ورناھے ءِ بازیں سیمسری گوازینتگ،جاور چو پیشی وڑا دلساچ نہ اَنت۔ بلے راستی اِش انت،کہ من آ سرجمیں کرد پہ واھگے پیلہ کُتگ انت کہ آ کیوبا ءُ آشوب ءِ درگت ءَ منی سرا فرض بیتگ انت،،نو من ترا ءُ وتی آشوبی سنگتاں ءُ کیوبا ءِ الس ءَ چہ موہ لوٹگ ءَ انت۔۔من سرپداں من ءُ کیوبا ءِ الس اشوبی ھمسفر بیتگیں۔ مرچی من گل ءِ رھشونے ءَ، وزارت ءِ اگدہ ءَ ، فوج ءِ تھا میجرے ءِ بستار ءَ کیوبا ءِ نیشنلٹی ءَ دزکش بیئگ ءَ اَنت۔۔نو قانونی ردا چہ کیوبا ءَ من ءَ ھچ وڑیں سیادی نیست،،،بس نوں گوں کیوبا ءَ منی سیادی دگہ نوکیں دروشمے ءَ برجم مان اَنت۔۔۔

وھدیکہ من گوست ءَ وتی چمان شانک دیاں تا من ءَ مارشت بیت کہ من آشوب ءِ سوب مندی ءِ ھاترا بازیں جُھد ءُ مھنت کُتگ۔منی بس یک ردی ئے بیتگ کہ من اولسرا تئی سرا بھیسہ نہ کُتگ ،،من ءَ تئی آشوبی ءُ سرمچاری بستار ءِ سرپد بوئگ ءَ باز وھد لگ اِتگ۔۔۔من تئی ءُ کیوبائی الس ءِ گُما بازیں یاتگاریں روچ گوازینتگاں،،،من آشوبی جُھد ءَ ھوار بئیگ ءِ سرا باز پھر بنداں،،،اے دگہ گپے کہ مارا "كريبيين"  گپچل ءِ وھد ءَ بازیں گم ھواریں روچ گندگ ءَ اَتکگ،،اے جنجالانی وھد ءَ ھم تو الس ءِ باز جوانیں وڑی ءَ رھشونی کُتگ ءُ من تئی رندگیری کُتگ ءُ تئی ھمک پیغام ءُ رھبند گوں دلے جُھلانکیاں قبول کُتگ انت،،،نو من ھمے سرپد باں کہ جھان ءِ مُلکاں (راج) منی ضرورتیں،،تو اے سفر ءَ منی ھمراھداری ءَ کُت نہ کنئے،،،چیاکہ تئی راج ءِ آیوکیں وھد ءِ ذمہ واری ئے بار تئی کوپگانی سرا ایر اِنت،،من نوں ( چرے ذمہ واریاں) آجو آں، پمیشا چہ ترا موکل لوٹاں

من ءَ اے راستی ھم منگی اِنت کہ من اے گامگیج ءَ گوں جزبگ ءُ مارشتاں چست کنگ ءَ اَنت۔ منی دل ءَ وشی ئے جزبگ ھم ردوم زیرگ ءَ اَنت ءُ من باز دِلرنجاں ھم،،،من آیوکیں وھد ءِ واستہ وتی یاداں ، وتی واھگ ءُ مارشتاں ءُ وتی دوستاں پہ شُما وئیل کنگ ءَ اَنت،، من اے سرڈگار ءِ ھما مردماں وئیل کنگ ءَ اَنت کہ اے من ءَ وتی زھگ سرپد بیتگاں،،، من ءَ باز دلرنجی بیت،،تو من ءَ ھما جنگ ءِ رھبنداں چہ پوہ کُتگ،،،من اے جنگ ءَ نوکیں میداناں سر کنگ لوٹاں،،،من ھمے آشوبی ارواہ ءَ دومی راجانی تھا ھُپ کنگ لوٹاں،، من زُلم ءُ زوراکی ( استعماریت) ءِ ھلاپ ءَ جنگ ءَ وتی بُنکی ءُ پاکیں فرضے سرپد باں،،، من وھدیکہ اے جُھد ءَ گوں ھوار باں تا منی آزگیں ٹپانی سرا واد ایر ریچگ بیت،، من اے گپے راستی ءَ پدا مناں کہ نوں کیوبا منى کردانی ذمہ وار نہ اِنت،، وھدیکہ ساہکندن ءِ وھد ءَ من دگہ آزمانے ءِ چیر ءَ بہ باں بلے الم کیوبا ءُ آئی ءِ الس ءِ گُما منی دلے واھگ ءُ آھانی گُما منی ھمگرنچی ئے جزبگ برجم مان اَنت””””

چے گویرا کیوبا ءِ نیشنلٹی ءَ دز کش بیت۔۔ اگدہ ءَ وئیل کنت۔۔۔ اے پہ آئی ءَ ھچ نہ اَنت۔۔۔بس مقصد پش کپیت۔۔ آ گُشے منی مقصد بس کیوبا ءِ آشوب نہ اِنت۔۔۔ بلکیں دُنیا ءَ ھمے آشوب ءَ سر کنگ اِنت۔۔۔ اے درگت ءَ آ وھدی کیوبن نیشنل بینک ءِ سروکے ءِ اگدہ ءِ سرا بیت تہ زر ءَ وتی دست نشان ءَ نہ جنت ، چیاکہ آئی ءَ بُت جوڑ بیئگ ءِ شوق نیست۔۔۔۔بلے آئی ءِ مستریں بُت پروشی ءِ مثال اِش اِنت کہ۔آ ھمے نمدی ءِ تھا فیڈل کاسٹرو ءَ کلوہ دیم دنت ءُ گُشیت

”منی بس یک ردی ئے بیتگ کہ من اولسرا تئی سرا بھیسہ نہ کُتگ ،،من ءَ تئی آشوبی ءُ سرمچاری بستار ءِ سرپد بوئگ ءَ باز وھد لگ اِتگ”

بلے من گُشاں اے آئی ءِ ردی نہ بیتگ ، بلکیں آئی ءِ بُت پروشی ءِ مستریں سپت بیتگ۔۔۔

...............................................................................
بُت پروشیں کواس۔۔۔۔۔۔۔

جھان ءِ راجدپتر ءِ تھا بازیں بُت پروشیں کواس ودی بیتگ اَنت۔۔۔۔۔ ایشانی تھا ھمیکہ من ونتگ اَنت آ ایش اَنت، لیون ٹراٹسکی، اروندھتی رائے، خلیل جبران، جان پاؤل سارتر، انتیو نیو گرامچی، او دگہ بازیں ۔۔۔۔۔۔۔۔ بلے من ءَ کہ آ سک باز پسند بیتگ آ لیون ٹراٹسکی اِنت کہ آئی ءَ بنیاد پرستی ءِ حدّ ءَ بُت پروشی کُتگ۔۔۔۔ ھمے ھاترا آ عھد ءِ جوڑینتگیں بُت ”اسٹالن” ءِ دپ چٹیں ایجنٹاں ماں امریکا ءَ تیرگواری کُت ءُ شھید کُت۔۔۔۔۔۔۔۔۔۔۔۔۔۔۔۔ بلے بلوچی ادب ءِ تھا ھما بُت پروش کہ من ءَ دوست بیت آ ”واجہ شئے رگام” اِنت۔۔۔۔۔۔۔۔1980 ءِ دھک ءَ وھدی اے بزگیں راج  ءَ سیاسی ءُ چاگردی تکاں بازیں بُت جوڑ کُتگ اِت اَنت۔۔۔۔بزاں ھمے نعرہ کہ اے راج ءِ دپ ءَ دیگ بیتگ اِت اَنت کہ ”آشوب ءِ سئے نشان ءُ پلانی ءُ پلانی ءُ پلانی جان”۔۔۔۔۔۔۔۔۔۔۔آشوب ءِ نام ءِ سرا ورناہ میڈینگ بیتاں۔۔۔ایشاں گوں بے سریں تراناں ھما کُت کہ ھمے تاواناں تاں روچ ءِ مروچی ھم اے بزگیں راج در نئیت۔۔۔۔۔۔۔۔۔ سنگتی گپ جنت کہ من ءَ سیمی جماعت ءِ کلاس ءَ پنجابی مارکسی ندکار”سبط حسن” ءِ کتاب لانک ءَ بیتگ ، بلے من نہ زانتگ کہ اے کتاب ءَ چی نبشتہ اِنت ءُ ندکار چونیں مردمے۔۔۔۔۔۔ بلے بس ھمے کتاب ءِ شرپ ءِ ھاترا من اے کتاب ھرجاہ لانک ءَ کُتگ۔۔۔۔ چیاکہ من ءَ ھمے انقلاب ءِ نشاناں ھمے کتاب داتگ۔۔۔۔۔۔۔۔۔۔۔ چوشیں ھالتاں ھمے بُتانی (آشوب نشان) پروش ءِ سرا قلم ءِ چِست کنگ وتی مرگ ءِ دعوت دیگ بیتگ۔۔۔۔۔۔۔۔۔ گُڑا ھمے سھتاں شئے رگام گوں نپت گواریں رگاماں ھمے بتانی سرا گوارگ ءَ لگ اِت۔ بُت پرشتاں ، بلے ھمے بُتانی نشانی تاں انگت بلوچستان ءَ جاھے جاھے پشت کپتگ۔ آ وھد ءِ وت گڑیں سیاسی بُتاں بگر تاں تنگ نظریں مذھبی بُتاں ،اے سرجم واجہ ءِ دُشمن بیتاں۔ پہ آھانی ردا شئے رگام مئے سیاسی ءُ مذھبی جوڑینتگیں بُتاں لُرینگ لوٹیت،، پمیشا راج دُشمنے۔۔۔۔۔۔۔۔۔۔۔۔۔۔۔۔
 بلے ھمے بُتاں رند ءَ دیست کہ اے مرد ءَ مارا پاشک کُت ، نو ما مھلوک ءِ دیم ءَ رُسوا ءُ ٹینڈر بئیں۔۔۔۔۔۔۔۔۔۔ گُڑا ایشاں وڑ وڑیں بھتام بست واجہ ءِ سرا۔۔۔۔ لھتے ءَ گُشت کافرے۔۔ لھتے ءَ گُشت کہ راج دُشمنے۔۔۔۔۔۔۔۔اے سرجم بُت پروشیں شئے رگام ءِ دُشمن بیتاں۔۔۔ چیاکہ اے منافق اِت اَنت۔۔۔ دو تل ءُ پوستی ایشاں ھیل کُتگ اَت۔۔۔۔۔۔۔۔۔۔ ھمے شوپچ ءَ ایشاں بلوچ راج ءَ را ھمے سکین دات کہ ”ماھتاک بلوچی” ءَ بائیکاٹ بہ کن اِت کہ ایشی ءَ شئے رگام ءِ نبشتانک چاپ بنت۔۔۔۔۔۔بلوچاں ھم اے کار کُت۔۔۔۔ بلوچستان ءُ مزن ھور ءِ بازیں ھنداں ”بلوچی” بائیکاٹ کنگ بوت۔۔۔۔۔۔۔۔۔
بلے مرچی ھر یک بلوچی اے گپ ءَ سرپدیں کہ بُت پروشیں شئے رگام راست بیتگ ءُ مئے جوڑینتگیں بُت دروگ بند ءُ گوچل بیتگ اَنت۔۔۔۔۔۔۔۔۔۔
....................................................................

بُت پروشیں مُلّا۔۔۔۔۔۔۔

بلے افغانی مُلایاں ھمے بُت پروشی نوکیں رنگے دات۔۔ اے تنگ نظراں نہ بیتگیں کارے کُت۔۔۔۔ ھما بمب ءُ ٹوپ کہ راجدوستیں نجیب ءِ ھلاپ ءَ کارمرز بیتگ اِتنت۔۔۔ رند ءَ واجہ گوتم بدھ ءِ بے ساھیں بُتانی سرا گرندگ ءَ لگ اِتنت۔۔۔ دانکہ اے بُت تاں کرناں ھمے سرزمین ءِ دامن ءَ مِک اِت اَنت ءُ امن ءُ مھر ءِ نشان اِت اَنت۔۔۔۔۔ ملایاں اے گپ نہ زانت کہ اے بُت ھما عظیمیں انسان ءِ عکس اَنت کہ ایشی ءَ وتی زند ءَ موری ھم نہ کُشتگ۔۔۔ ایشی ءِ لیکھانی ردا سلاہ ءِ جوڑ کنگ ھم بلاھیں گناھی،، چیاکہ سلاہ انسان ءِ کُشگ ءِ سوب جوڑ بیت۔۔۔۔۔۔۔۔۔۔۔۔۔