یورپی راجانی سوب مندی ءِ یک جوانیں سوبے اِش اِنت کہ آ ھرچی کن اَنت پہ وتی مقصد ءَ سوب مندی ءِ ھاترا کن اَنت۔ مغربی راجانی ھالکاری بہ بیت یا ندکارے، سیاست کاری بہ بیت یا سائنسدانی، ایشاں گوں وتی مقصد ءَ ھمینکہ کمنت منٹ است کہ اے پہ مقصد ءَ مرگ ءُ زند ءِ سودایا کن اَنت۔ مہم جوئی کن اَنت۔ اے مقصد ءِ دیم ءَ آھانی ذات ءِ ھچ بسات پشت نہ کپیت۔ ذات نفی کنگ بیت ءُ بس مقصد پشت کپیت۔ فرد ءِ نام مقصد ءِ دیم ءَ بیگواہ بیت۔ بزاں ھرکار پہ مقصد ناکہ پہ نام ءِ ھاترا، پمیشا فرد ءِ نام مقصد ءِ دیم ءَ گار اِنت، او ناکہ آھانی چاگرد فردانی بُت جوڑ کنت۔ ناکہ فرد ءَ اینکہ بستار دنت کہ مقصد آئی ءِ دیم ءَ گار بہ بیت۔ چیاکہ آ فرد ءِ ھر عمل ءَ گوں چاگرد ءِ دیمروئی ءَ بندوک کنت، راستیں گپ اِش اِنت اودا فرد ءَ اہمیت ءُ بستار دیگ نہ بیت، پمیشا اودا نہ فرد وتی کَدّ ءَ بے ھال کنت ءُ ناکہ چاگرد بُت جوڑ کنت۔ ھمے راستی اِنت آھانی سوب مندی ءِ راز اِنت۔ ھمے گپاں چہ من ءَ سئے ھزار سال پیش ءِ رومی امپائر ءِ کسہے گیر آیگ اِنت۔”سیزر روم ءِ یک بلاھیں بادشاھی اَت، آئی ءِ سئے فوجی جنرل است اِت اَنت۔ آئی ءَ وتی جنرل ھر ھند ءَ جنگ ءَ دیم دات اَنت ، آھاں وھدی جنگ ءَ سوب مندی رست، گُڈا واتری ءَ ھر جنرل ءِ گورا یک چوکی داری نادینگ بیتگ اَت، ایشاں کار بس ھمے دیگ بیتگ اَت کہ پنچ منٹ ءِ سرا ایشاں جنرل ءِ گوش ءِ کِرا گوں ھلوت ءَ گُشت، واجہ وتی کّدّ ءَ بیھال مہ کن، اے سوب مندی یے سوب تئی بودناکی نہ اِنت، بلکیں رومی راج ءِ بھادری ءُ تمردی اِنت کہ مرچی ترا سوب مندی رستگ”
بلے مئے گورا چوش نہ اِنت۔ ادا ھالکاری بہ بیت یا سیاست کاری یا زند ءِ ھر پِڑاں چہ سیادی داروکیں مردمے۔ آ وت ءَ زند ءِ ھر تکانی سرا مسلط کنگ لوٹیت۔ فرد ءِ کمیں سوب مندی ءَ آئی ءِ تھا واجھی ءِ شوق ردوم زوریت، وتی کَد ءَ بیھال کنت۔ چاگرد ھم آئی ءَ بُتے جوڑ کنت۔ پمیشا مئے اولی سوب مندی ناسوبے ءِ نیمگ ءَ گام جنان کنت، مارا تاوان دنت۔
مئے گورا ھر کسے کہ پہ راجی ءُ چاگردی دیمروئی ءِ ھاترا کارے کنت، پدا ھمے کار آئی ءِ نام کشگ ءِ سوب جوڑ بیت۔ آ عمل ءَ بندات کنت پہ جوانیں مقصدی ھاترا ، بلے زوت آئی ءِ ھمے مقصد آئی ءِ نام کشگ ءِ شوق ءِ دیم ءَ گار بیت۔ وھدیکہ آ ھمے نام کشگ ءِ شوق ءَ سوب مندی حاصل کنت تہ چاگرد آئی ءَ بُتے جوڑ کنت۔ پدا آئی ءِ مثبت ءُ منفی کردانی سرا ھچ وڑیں تنقید ءُ ایراد ءُ شرگداری ءِ گُنجائش پشت نہ کپیت۔ مئے گورا سوال ءِ چِست کنگ ءِ ھم گُنجائش پشت نہ کپتگ۔ سوال جواب شوھاز کنت، پہ راجی زند ءِ دیمروئی ءَ تکنیکی رھبند بوجیت، سوال مہ بیت تہ ھچ کرد ءُ ھچ گپ ءِ آسر شوھازیں جواب در نئیت۔ ایراد سیاسی ءُ ادبی جنجال ءُ مانگیشتگیں رھبندانی گیشواری ءَ کمک کنت۔ اختلاف رائے راجی زند ءَ سائنسی رھبند دنت ۔۔۔۔زانتکاری گُشیت
””لھتے گپانی سرا ”اختلاف رائے” راجی زند ءَ شررنگی ءُ دیمروئی بخشائیت، او لھتے گپانی سرا تپاکی راجی زند ءَ مُھکم کنت، پمیشا اختلاف ءُ اتفاق یکیں وھد ءَ المی اَنت””
بلے مئے گورا دود دگر اَنت۔ ادا سیاست کار بہ بنت یا ادیب ، ایشانی ھر گپ ءِ سرا سوال چِست کنگ یا ایراد گرگ راج دُژمنی ءُ رد انقلابی یے درچ ءَ کئیت۔ ادا ندکاراں بُت جوڑ کُتگ، ذاتی پسند ءُ ناپسند ءِ دیم ءَ راستی ساھکندن ءَ سر بیتگ۔ لھتے پہ تُرس ءُ لھتے پہ نام۔۔۔۔ دانکہ جوڑ کُتگیں بُت ءِ دیم ءَ منی ھم عزت ءُ شرپے بہ بیت۔ شاعر بُت ءَ نازینیت۔ راجی مقصد جوڑینتگیں بُت ءِ دئیناں شُتگ۔۔۔۔پمیشا مئے لبزانک ذاتی ستا ءُ توصیف ءِ نادراھی ءَ گور جتگ۔ جوانیں تخلیق ردوم نہ زیر اَنت کہ آ راج زھگانی سنچ ءُ شعور ءِ دیمروئی ءَ کمک جوڑ بہ بنت۔ بلے چوشیں زوال آسریں کردانی ھلاپ ءَ اگاں کسے توار چِست بہ کنت تہ بزاں خُدا ءَ نواھتگ۔ چیاکہ ادا شاعر، ادیب یا سیاست کار ءِ گیشینتگیں رھبند ءِ سرا سوال چست کنگ۔ ایراد گرگ، تکنیکی ردیانی زاھر کنگ راج دُژمنی ءِ درچ ءَ کئیت ءُ ایراد گروک راج دُشمن گُشگ بیت۔ پمیشا مارا ءُ یورپی انگریزاں زمین ءُ آسمان ءِ فرق اِنت۔۔۔۔
