ھزام ءِ موسم ءِ گُبار گونگیں آزمان ءِ دلبند ءَ استال درپشگ ءَ اَنت۔ بے وت ءُ گیمرانک۔۔۔۔۔۔۔(دل ءِ)اُپّارانی آس ءَ گوں ارسانی رگام ءَ توسگ لوٹ اَنت کہ گُشئے اے راج ءِ بزگی ءِ سرا دلرنج ءُ بے تاھیر اَنت کہ ایشی ءِ آجوئی ءِ حق دل آزاریں جاتوگاں پُل اِتگ۔
بلے بیت کنت۔۔ بیت کنت کہ اے آزمانی تاکچھاں کدی آجوئی ءِ شر رنگیں ”پری” سر بہ کشّیت۔او اے غم زدگ ءَ بندیگیں انساناں وتی دروشم ءَ پیش بِداریت۔۔۔کہ ایشی ءِ پُر زیملیں تار اندوھاں پروشتگ اَنت،کہ ایشانی ارواہ غلامی ءِ گرانیں بار ءَ چیر ترینتگ ءُ کہ ایشانی دل نہ سگوکیں پُر کینگی مارشتاں چُنڈ چُنڈ کُتگ۔۔۔۔۔
وھدیکہ ھر سیاہ پوشیں جمبر ءِ پُشت ءَ درپشناکیں روچے چیر اِنت تا اے بیمناکیں شپ تا کدین ءَ؟
او اے گیدی ساچیں پُردردیں چیھال؟۔۔۔انچو کہ سروز ءِ پرشتگیں تاراں چہ شنگیت۔۔۔۔۔۔۔۔۔۔
سر شمی جُھلانکیاں چہ بام شِنگ ایت۔ نوکیں زندی یے مستاگئیں گوربام۔۔۔۔۔۔۔۔۔۔
نو سیاہ تھاریں آزمان چہ سیاہ پوشیں جمبراں وت ءَ رکیننت ءُ غلامی ءِ ترسناکیں پنجگانی آھنی بند نزور ترّانت ءُ او او وھدی ڈیھ ءِ واھگانی مارشت آجوئی ءِ نیمگ ءَ گام جنان کنت۔۔۔
روچ ءِ اولسری برانز گیدی ءِ رنگاں گوں نوکیں رنگے ءَ رجگ ءَ اَنت، باگ ءِ بُلبل ارواہ ساچیں سوت گُشگ ءَ اَنت ءُ ھر چیز تاجگ ، ءُ گَل ءُ گُلساچ۔۔۔۔۔۔۔
اے پاکیں خدا، اے آجوئی ءِ برانز نہ اَنت ؟
اے روچ ءِ اولسری برانز ::::
