اگاں بلوچی یک نابود ءُ نِزور ءُ کم مجال ءُ بے ھِچیں زبانے بوتیں، گُڑا اے رنگیں کرد ءُ کاردربری پہ آئی ءَ بود ءُ زور، کجال ءُ آبادی ءِ جوانتریں نیمون ءُ یا کہ بیگواھی ءِ جوانتریں راھبندے بوتگ اَت۔ بلے ادا گپ دگہ دروشمے ءِ واجہ اِنت ءُ جاور دگہ سرھالے دینت۔ چیاکہ بلوچی پہ زبانے ءِ باندات ءَ یک سرجمیں زبانے کہ اے زبان بزاں بلوچی چہ دُنیا ءِ سرجم ءُ برجم ءُ الم تریں زباناں یکے، بلوچی زبان ءِ جند چہ وت ھمینچو سرجم اِنت کہ ایشی ءَ دگہ ھچ زبان ءِ مدت ءُ کمک پکار نہ اِنت۔ البت اے گپ ءِ من ھم نہ منّوک نیاں کہ اے زبان ءِ ادب ءِ شنگیں شدر ءُ مروارد ھزاری نہ چن ءُ مُچ کنگ ءُ گچن ءُ تراش ءُ سُمب ءُ کید ءُ کمایگ ءِ رھچار ءُ چمدار اَنت۔ ءُ دانکہ زبانے نبشتگ ءِ رنگ ءَ کسی دیم ءَ مئیت، آئی ءِ جوانی ءُ شری زانگ نہ بنت، انگت ھم چِد ءُ مستریں گپ اِش اِنت کہ اے زبان ءِ جوان ءُ پُرانداز ءُ زیبدارتریں گال ءُ گالبند کہ یک زبانے ءِ ساہ ءُ ارواہ اَنت ، ماں وپتگیں سسّاھانی بے سمائیں سیاھیں چادرانی تھاریں تَل ءُ توکاں چیر ءُ اندر اَنت۔ ءُ ھمے بے دروریں گال ءُ گالبندانی جاگہ ءَ ھما ونتگ ءُ دربُرتگیں درآمدیں زبان ءِ گال ءُ گالبند پہ بے اِنانی ءُ بے اجامی کارمرز بنت ءُ اے رنگ ءَ ھر چنت کہ وھد گوزان بیت ، بلوچی ءِ ھمے گال ءُ گالبند چو وھد ءُ کدیمی ھما بے واجھیں بان ءُ ماڑیاں بنت کہ زمانگ ءِ سرد ءُ گرم ءِ ترندیں شھپول ءُ شھمات ایشاں چو شرتگ ءَ ماں بنداں کنت ءُ کم کم ءَ چیر ترّان ءَ آسر ءَ گار ءُ بیگواہ بنت، اگاں بھت ءَ دوبر یاری کُت۔۔۔۔۔۔گُڑا چو کہ ھما بے نامیں بادشاھانی ھزانگ ءَ چیر زمین بیئگ ءَ رند نزان یے تاکد پَٹ ءُ پولیانی پیشکانڈ ءُ دَرّوپانی رھچاری ءَ چو وداری واھگدار ءَ تلوس اَنت ءُ ھما پٹ پول کاریں سرمچارانی وداری بنت۔ کہ پہ اے رنگیں ھزانگانی شوھاز ءَ وتی دوستیں ساہ ءُ ارواہ ءِ ھم ھچ نہ پھریز اَنت۔۔
مراد ایش اِنت کہ در بلوچی پارسی۔ تازی یا دگہ زبان ءِ دربُرتگیں ھما مردم کہ ماں وتی گپ ءُ تران ءَ ، نبشتگاں ھما ونتگیں زبان ءِ ھرچ گال ءُ گالبندے کہ کارمرز کنگ ءَ اَنت کہ ایشانی مٹ ءُ بدل ءُ درور ماں بلوچی ءَ پیسر ءَ است ءُ دسکپت اِنت ، اگاں آ گال ءُ گالبند کارمرز کنگ بہ بنت گُڑا بزاں سر بُر ءَ گوشتگیں نیمون ءِ منّ ءِ پدا ایشانی نابود ءُ بیگواہ بیئگ ءِ راہ جوان رپتگ ءُ جریدگ اِنت۔۔۔۔۔۔۔۔۔۔۔۔۔۔۔۔
وھدے کہ ما اے بلوچی گالاں گوں در بلوچی آب ءُ گالواراں پھک ءَ دور چنڈ ءُ دور شانک ءُ دور دار کنیں ، گُڑا ایشانی جاگہ ءَ ابئید بلوچی ءِ وتی جند ءِ بُندری ءُ زگریں گالانی کارمرز کنگ ءَ دگہ ھچ راھے پہ ما پشت نہ کپ ایت۔ اے رنگ ءَ بلوچی گوں وتی بے کچ ءُ زگریں گالاں بے پولنگ بیت ءُ چہ درآمدیں زبانانی سیدگ ءُ لیتاراں لیگار ھم نہ بیت، چہ بازیں کارمرز ءَ اے بلوچی زگریں گال ءُ گالبند پہ بے سمائی البار بنت ءُ بلوچ ایشانی وانگ ءُ زانگ ءَ بے سمائی ءَ باج بر اَنت۔ راستیں گپ اِش اِنت کہ بے جُھد ءُ بے کوشست ءُ وت سر ءَ وت ھر بلوچ وانندگے چہ بلوچی ءِ زگریں ءُ بے کچیں گالاں زانتکار بنت کہ چہ ایشاں زانتکار بیئگ ءَ رند درآمدیں لاڑامی گالانی کار پکار نہ بیت۔ ءُ اے رنگ ءَ زبان وتی ابدی رنگ ءَ پشت کپ ایت۔۔۔
