انسانی سماج ءَ وھدی فرد ءَ آزادیں چار ءُ بچار ءِ موہ دیگ مہ بیت، اظہار رائے ءُ تنقید ءِ گنجائش مہ بیت تہ چاگرد اوشت ءِ آماچ بیت۔ تخلیقی بودشت ءِ جاہ ءَ تقلید پسندی گیپت۔ سیاسی ، چاگردی ، مذھبی ءُ علمی تکاں نوکیں تخلیق ردوم زُرت نہ کناں ، اگاں پہ راستی بچارے کسانیں نقطہانی سرا چار ءُ بچار ءَ مزنیں تخلیقی ردوم دیم ءَ کاینت۔ پہ انسان ءَ سوت مند بنت۔.........................................نیوٹن گُشئے امب چیا چہ درچک ءَ سدیت ءُ زمین ءَ کپیت؟ آئی ءِ وھد ءِ ناباوراں بلکیں ھمے گپ جتگ کہ اے مرد گنوکیں۔ اگاں مُلائی بیتیں وا ھمے امبے وارتگ اَت ءُ ھمے گپے جتگ اَت کہ اے من ءَ خدا ءَ داتگ، بلے نیوٹن ھمے امب ءِ جھل ءَ کپگ ءِ راز ءَ زانگ لوٹیت۔ گُڑا Gravity ءِ قانون ءَ دیم ءَ کاریت ، ھمے قانون ءِ بنیاد ءَ انسان ریسرچ کنت ءُ ماہ ءُ مریخ ءِ سرا سر بیت۔۔۔۔ نیوٹن وا یکے اَت۔ آئی ءِ لیکہ ءَ انسانی زند ءِ تاریخ بدل کُت۔ بلے مرچی کئے اِنت کہ اے آزادیں چار ءُ بچار ءِ موہ ءَ بہ دنت۔ ادا وا بنی آدم لیکہانی بندیگ کنگ بیتگ۔ ھرکس ھمے مذھبی ءُ سیاسی لیکہاں سرگوز بہ کنت تہ بزاں خدا ءَ نواھِتگ۔ یا وا کافر جوڑ بیت یا غداری یے نام ءَ توار جنگ بیت۔ انسان مذھبی ءُ سیاسی لیکہانی غلام کنگ بیتگ۔ پمیشا دیمروئی ءِ در بند اَنت ءُ انسانی سماج جہنم جوڈ بیتگ۔
اوشو گُشیت اے وتگڑیں لیکہ دروگ اَنت۔ بائد انسان وتگڑیں لیکہانی بنیاد ءَ غلام دارگ مہ بیت۔ زھگ ءَ وئیل بہ کن۔ وتی فیصلہ ءَ وت کنت، بلے امریکا آئی ءَ چہ ملک ءَ کشیت کہ غداری، انسانی زند ءِ بنکی لیکہاں لُڑینگ لوٹیت، کافری۔۔۔۔۔۔۔۔۔۔۔۔۔۔۔۔۔۔
سلمان رشدی ھما کہ آئی ءِ دل بہ لوٹیت ھمایاں گُشیت، ایرانی مُلا آئی ءِ سر ءِ قیمت ءَ ھپتاد کروڈ ڈالر ایر کن اَنت۔۔۔۔۔۔۔۔
سقراط زھر دیگ بیت ءُ عیسیٰ پاھو ءَ درنجگ بیت۔
ھمے انسانی سماج ءِ تنگ نظری ءُ اظہار رائے ءِ سرا بندش ءِ مثال اَنت کہ انسانی چاگرد جہنم جوڑ کُتگ اِت۔۔۔۔۔۔۔۔ رواداری ءُ برداشت ھتم اِنت۔ ھرکس لیکہانی غلام اِنت۔ انسانی زند ءِ تخلیقی دروازگ بندگ بیتگ اَنت۔ اگاں نوکیں دؤر ءِ انسان اے سرجمیں راستیانی سرا چار ءُ تپاس مہ کنت تہ بازیں راجانی تھا بازیں غدار ءُ کافر پیدا بنت ءُ انسان چہ مزنیں تباھی ءَ رک اِت نہ کنت۔
انسانی چاگرد، فردانی ذاتی لوٹ ءُ سسا ءُ واھگ راجی ءُ میان استمانی تکاں بندیگ کنگ بیتگ۔ ذاتی واھشت گُٹگیر انت۔وتگڑیں لیکہانی نام ءِ سرا انسان غلام کنگ بیتگ۔ جاھے مذھب ءِ نام ءِ سرا، جاھے جدیدیت ءُ سکولرازم ءِ نام ءِ سرا۔۔۔۔۔۔۔۔ اخبار ءَ ھمے ھال ونت کہ ”فرانس ءَ بُرقعہ ءِ سرا پابندی جتگ، اگاں ھر زالبول برقعہ سرا بہ کنت آ یا وا جیل ءَ برؤت، یا جرمانہ بہ دنت، شھدربرجاہ ءَ کشگ بیت، من جیڑ اِت کہ پیش ءَ ما اِش کُتگ کہ مُلاھاں سردریں زالبول سنگسار کُتگ اَنت۔ بلے نوکیں گپے، یورپ گُشئے مُلائی نظام ءِ تھا زالبولانی ذاتی لوٹانی سرا بندش جنگ بیتگ۔ بلے من ءَ ھمے گپ ءَ ھیران کُت کہ برقعہ سرا کنگ وا ھما زالبول ءِ ذاتی لوٹ ءُ واھگے، آیا یورپ ءِ اے کرد زالبول ءِ ذاتی لوٹانی سرا بندش جنگ ءِ درچ ءَ نئیت؟؟ پمیشا برے برے من ءَ انسانی جدید ذھن ءِ سرا ھم کندگ کئیت۔۔۔۔۔۔۔۔۔
مارکسسٹاں گُشت کہ انسانی سماج وتگڑیں مذھبی لیکہانی غلام اِنت۔ طبقاتی نظام ءِ غلام اِنت۔ آھاں ھمے وتگڑیں لیکہانی پروش دیگ ءَ آشوب آؤرت۔ بلے انسان چہ یک غلامی ءَ دراَتک ءُ بدتریں غلامی ءِ تھا شُت۔ روسیی آنی ذاتی واھگ گُٹگیر کنگ بیت اَنت، اسٹالن ءَ وتی یازدہ لکھ ھلاپ کار کُشت اَنت۔ روسی ندکار ٹراٹسکی تیرانی آماچ کنگ بوت چیاکہ آئی ءَ اسٹالن ءِ وتگڑیں نظام ءِ سرا ایراد گِپتگ اَت۔ قذافی ءَ ھما کُت کہ آئی ءِ دل بہ لوٹیت۔ بزاں ھر دور ءُ ھر زمانگ ءَ انسان ءِ اظہار رائے ءُ ذاتی لوٹانی سرا بندش جنگ بیتگ۔ انسان چہ ھمے لیکہانی غلامی ءَ چہ کدی آجو نہ بیتگ ءُ تہ انگت ھم نہ اِنت۔ اگاں کسے ءَ اے وتگڑیں مذھبی ءُ سیاسی ءُ چاگردی لیکہانی ھلاپ ءَ توار چست کُتگ تہ کافر ءُ غدار کُشگ بیتگ۔
راجی تکاں ھم ما مرچی باندا بچاریں تہ مارا راجی زند ءَ ھم وڑی ناں وڑی ھمے عملاں تاوان بار کنگ ءَ اَنت۔ بزاں ھچ عمل یا رھبند ءِ سرا ھچ وڑیں ایراد گرگ ءِ گنجائش پش نہ کپتگ۔ فردانی ذاتی رائے ءَ قوم دُژمنی ءُ راج فروشی گُشگ بیت۔ دومى نيمگ ءَ سیاسی ءُ ادبی صورت ءَ فردانی ذاتی رائے ءِ بالادستی گندگ ءَ کئیت، ھرجاہ فرد مسلط اِنت۔ نہ ایراد بہ گِر، نہ دومی ءِ ایراد گیری ءَ برداشت کن، رسانک کہ وت ءَ آزاد گُشنت ،بلے آ ھچ چوشیں نبشتانکے شنگ نہ کن اَنت کہ آ نبشتانک آھانی جوڑینتگیں رھبند ءُ یا دلپسندیں رھشون ءِ بابت ءَ تنقیدی چھرگے بہ جنت۔ بزاں ھما لیکہ کہ من شون داتگ ھما چو قُرآن ءَ پاک اِنت۔ آئی ءِ سرا ھچ وڑا دزمانجی کنگ مہ بیت۔ منی گپ ءَ قبول بہ کن، منی جوڑینتگیں رھبند ءِ سرا ھچ وڑیں رائے زنی مہ بیت۔ من ءَ ھچ کس گوں ایرادی چماں مہ چاریت۔ منی ھچ کرد ءِ سرا تنقید مہ بیت۔ پمیشا چر ایشی ءَ چہ راجی چاگرد یک انچیں نادراھی ءَ مان پتاتگ، اودا ھچ کسے لوٹانی سرا دلگوش گور کنگ نہ بیت۔ چر ایشی ءَ راجی چاگرد بیمار اِنت۔ تنقید ءِ جاگہ ایر جنگ ءُ کلاگ ءُ چیواہ ءَ گِپتگ ءُ ھر یکے دومی ءِ سرا دنتان دُرشیت۔ یکے راج دوست ءُ دومی غدار اِنت ءُ یکے ردِانقلابی ءُ دومی انقلابی جوڑ بیتگ۔ ھمے عدم برداشت، جوڑینتگیں رھبندانی سرا ایراد ءِ گُنجائش نہ بیئگ اِنت۔ کہ ایشی ءَ راجی زند شِینز بستگیں آپے جوڑ کُتگ ءُ وت منی ءُ وت گلائی ءِ آماچ کُتگ۔ پمیشا تنقید ءَ ردانقلابی کرد گُشگ بیت ءُ اظہار رائے ءَ راج فروشی۔۔۔۔۔۔۔۔۔۔۔
ھمیش ءُ دگہ بازیں درور اَنت کہ ایشاں راجی زند اندری صورت ءَ غلام داشتگ، راج اگاں ھمے اندری غلامی ءِ تنداں در بئیت تہ ظاھری راجی غلامی ءِ سانکلانی پروشگ اِنچو مشکلیں کارے نہ اِنت۔ پمیشکہ اکبر بارکزئی گُشیت
”راج ءِ آزادی ءَ پیسر بیائے وت ءَ آزاد کنیں”..
