اگاں ما بلوچ ءِ بلوچی سنچ ءُ ربیتانی گپ ءَ بہ جنیں تا بازیں کیلو ءُ رھبنداں کہ بلوچ ءَ چہ دگہ کش ءُ گور ءِ راجاں جتا ءُ گستا کن اَنت۔ بلوچ تاں ھما وھد ءَ بلوچ گُشگ بیت کہ آ زاھری ءُ باطنی صورت ءَ ھمے کیلو ءُ رھبندانی پابند بہ بیت۔ بلوچ تھنا آ نہ اِنت کہ آئی ءَ بلوچی نامے پِراِنت۔ بلوچی ءَ گپ جنت۔ بلکیں ھما اِنت کہ ھمے کیلو ءُ رھبندانی پابند بہ بیت ، آ ھمے کیلو ءُ قول ءُ کردانی پھازوک بہ بیت ، آئی ءِ مرگ ءُ زند گوں ھمے رھبنداں ھمگرنچ بہ بیت۔ اگاں نہ اے بلوچی نام ءَ ھرکس ءُ ناکس زُرت کنت۔ او بلوچی زبان ءَ ھرکس دربُرت کنت۔۔۔۔۔۔۔۔
بلوچی بنکی کیلو بلوچ ءِ گھگیری ، بلوچ ءِ بلوچی قول ءُ زبان، بلوچ ءِ راست گُشی ءُ دیم گُشی، عھد ءِ زوراک ءِ دیم ءَ پہ تمردی اوشتگ، ھمے بلوچ ءِ مھمان داری ءُ میار جَّلی، بلوچ ءِ بلوچی شان ءُ مڑاھداری ءُ نہ تُرسی کہ بلوچ ءِ راجی سنچ ءُ ربیتانی بھر اَنت کہ بلوچ ءَ اے راجدپتر وتی شکلیں ھونانی وشبو ءَ گوں زھمانی زِھاں نبشتہ کُتگ۔ ھمے بلوچی کیلو ءُ ربیت کہ ھمک سھت ءُ ھر دمان بلوچ ءِ مرگ ءُ زند ءِ ھمراہ اَنت۔
اگاں بلوچ ھمے کیلو ءُ رھبنداں درگوز بہ کنت ءُ ڈاکٹر مالکی، چیف آف جھلاوانی ءُ چیف آف سراوانی نام گیپتیں کردانی واھند بہ بیت، گُڑا نہ پر آئی ءَ بلوچی شان ءُ مڑاہ پشت کپیت ءُ نہ اے بلوچی نام آئی ءَ بلوچی بستارے دات کنت۔ ۔۔ ایشانی مثال چو ھما بے زندیں بُت ءَ اِنت کہ ایشانی سرا سر زاھری وا بلوچی یے مُھر جتگ، بلے پہ راستی ایش بلوچی مارشت ءُ شان ءُ مڑاہ ءَ زبھر اَنت۔۔
نو راستیں گپ اش اِنت کہ ھمے بلوچ راجی زانت، کیلو ءُ رھبند، بلوچی مڑاہ ءُ منگہ، میارجلی ءُ مھمان داری، قول ءُ کرارانی راستی، دیم گُشی ءُ گھگیری ءُ تمردی کہ بلوچ راجی سنچ ءِ اندری مارشتانی نام اَنت، ھمے بلوچ ءِ شان انت کہ آئی ءَ چہ جام یوسفی، مالکی، حاصلی، چیف آف جھلاوانی ءُ چیف آف سراوانی وتگڑ ءُ نامداتیں( برائے نام) کرد ءَ در کنت ءُ خیر بخشی، اکبرخانی، بالاچی ، غلام محمدی، اللہ نظری، براھمدگی ءُ خیربیاری گھگیری ءُ تمردی، مڑاھداری ءُ نہ تُرسی یے سنچ ءُ زانت ءَ بخشائیت، ءُ بلوچ ءَ بلوچی کیلوانی پابند کنت۔۔۔۔۔۔
ھمے بلوچیت اِنت، ھمے بلوچی یے نشان اِنت، ھمے بلوچ ءِ پجار اِنت کہ بلوچ ءَ گوں راجی دود ءُ ربیدگاں ھمگرنچ کنت۔۔۔
