دود ءُ ربیدگ (کلچر) راجی استی ءِ مستریں پجار اِنت۔ من گُشاں ھما گیش اِتگیں رھبند کہ یک قومی ءَ چہ دومی قوم ءَ گِستا دارنت، یک راجی یے پجار جوڑ بنت ، آ راجی زبان ءُ راجی کلچر اَنت۔ ھمیشاں کہ یک راجی یے ھستی یے نشوندھی ءَ کن اَنت۔ ایش پش مہ کپ اَنت نہ راج مان ایت ءُ نہ راجی زانت۔ بزاں زبان ءُ دود ءُ ربیدگ (کلچر) راجی پجار ءِ مستریں نشانی اَنت۔
پمیشا یک راجی اگاں دومی راج ءَ ایردست کنگ لوٹیت تا آئی ءِ مستریں جُھد ھمے بیت کہ آئی ءِ زبان ءُ دود ءُ ربیدگاں لگتمال بہ کنت، انسانی تاریخ ءِ یک پدریں مثالے کہ راج پہ کُشگ ءُ گار کنگ ءَ ھچبر گار ءُ بیگواہ نہ بنت، پمیشا راج ءَ اگاں گار کنگ لوٹ یے تا آئی ءِ زبان ءُ دود ءُ ربیدگاں گار ءُ بیگواہ بہ کن۔۔
پمیشا راجی جُھد ءِ کجام دروشمے کہ آ راج ءِ زند ءِ زندگ مانگ ءِ درچ ءَ کئیت تا آئی ءَ زوراک کدی ھم برداشت کُت نہ کنت، گُلیں وانوکاں من لھتے راستی شُمئے دیم ءَ پدر کنگ لوٹاں کہ منی سرھال ءَ گوں ھمگرنچ بیت کن اَنت۔
1: بنگالیانی بنکی جُھد کہ بندات بیت ، آھانی بنکی لوٹ ھیمش اَت کہ مئے زبان چیا پد منتگ کنگ بیتگ۔ مئے راجی زبان چیا ماں دربرجاھاں وانینگ نہ بیت۔ مئے سرا چیا درامدیں زبانے مُشگ بیتگ؟ آھاں زھرشانی کُت ، پمیشا وھد ءِ زوراک ءَ دیست کہ اگاں راجی زبان ءِ وانینگ ءِ لوٹ منگ بہ بیت ، گُڑا اے راج ءِ غلام دارگ پدنبودیں ھیالے، گُڑا پاکی فوج ءَ پہ ھمے ھاترا بنگالی نودربرانی سرا تیرگواری کُت ، چر ایشی ءَ چہ بازیں بنگالی نودربر شھید بیت اَنت۔ باز ٹپی ۔۔۔۔۔۔۔ ادا چہ بنگال آجوئی ءِ جُھد بندات بوت ،او مرچی ماں دُنیا ءَ ماتی زبانانی روچ برجم دارگ بیت ، اے ھمے بنگال شھیدانی جُھد ءِ برورد اِنت کہ ھمے روچ ءَ پاکی لشکر ءَ شھید کُتگ اَنت،
2: گوستگیں دوسال ءَ پیش ماں خضدار ءَ بلوچ نودربراں بلوچی دود ءُ ربیدگی مراگشے برجاہ داشتگ اَت، تا پاکی فوج ءَ وتی ھندی دلارانی کمک ءَ آ مراگش ءِ سرا بمب گواری کُت ، چر ایشی ءَ چہ دو نودربر شھید بیت اَنت ءُ دگہ لھتے نودربر ٹپی بیت اَنت۔ او انشاءاللہ آ وھد ھم دیر نہ اِنت دُنیا پہ راجی کلچر ءِ روچ ءِ دارگ ءَ مئے خضدار ءِ شھیداں گیر کاریت۔۔۔۔۔۔۔
ھمے مثالاں چہ زانگ بیت کہ کُجام وڑیں کردی کہ آ راجی پجار ءُ زند ءِ زندگ دارگ ءُھما راج ءِ اجتماعی ربیتانی پھازگ ءِ ھاترا بہ بیت تا زوراک ھچ وڑا آئی ءَ برداشت کُت نہ کنت۔ الم وڑی ناں وڑی آئی ءِ دارگ ءِ جُھد ءَ کنت ، چیا کہ پہ فردانی کُشگ ءَ تو راج ءَ ایرموش کُت نہ کنئے، اگاں راج ءَ کُشگ لوٹ یے تا آئی ءِ اجتمائی سنچ ءَ گار ءُ بیگواہ بہ کن۔ پمیشا زوراک درستاں چہ پیش زبان ءُ کلچر ءِ سرا ارش کنت۔
گُلیں وانوکاں۔من ادا لھتے گپ جناں ، بیت کنت لھتے مردم منی گپاں وش مہ بنت، چیاکہ اے بزگیں راج مرچی باندا پہ لاشعوری رسمی جوڑ بیتگ، اے راج ءِ لیڈر ءَ بہ گِر تاں ھر کس ءُ ناکس ءَ۔۔۔۔۔
مرچی بلوچ راج تاریخ ءِ گران تریں دور ءَ گوزگ اِنت۔ شست ءُ پنچ سال اِنت کہ بلوچ ءِ سرزمین پُلگ بیتگ۔ بلوچ پد منتگ کنگ بیتگ، چوناھا ھر راج ءِ غلام دارگ ءِ توجیل دگہ دگہ بنت، سندھی سیاسی تکاں پد منتگ کنگ بیتگ ءُ بلوچ اگاں جنگ بیتگ ، گُڑا مستریں ارش آئی ءِ زبان ءِ سرا کنگ بیتگ۔ ایشی ءِ مستریں مثال ھیمش اِنت کہ مارا ھمینکہ ذھنی غلام جوڑ کنگ بیتگ، او مارا ھمینکہ کم مارشتی یے آماچ کنگ بیتگ کہ مرچی مئے ورناہ اَنت ، آ بلوچی نبشتہ کنگ نہ زانننت، یا کہ بلوچی ءِ نیمگ ءَ آ ھچ دلگوش نہ دینت، آ پہ پھرے دومی زباناں یاد گر اَنت ، آ ھمینکہ کم مارشتی (احساس کمتری) یے آماچ اَنت کہ آ دومی زبان ءِ گپ جنگ ءَ وتی زانتکاری ءِ نشانی گُشنت ءُ بلوچی ءِ گپ جنگ ءَ کم علمی ،،، اے گپ ءَ پوہ نہ اَنت کہ انسانی زانت آئی ءِ راجی پجار اِنت ، پہ انگریزی ءُ اردو ءِ دربرگ ءَ کس زانتکار بیت نہ کنت۔۔۔
دومی نیمگ ءَ بچار ات تا بلوچ ھما سگ مریں راج اِنت کہ آئی ءَ تاریخ ءِ ھمک دؤر ءَ وتی دود ءُ ربیدگ برجاہ داشتگ اَنت۔ آئی ءِ سرا ھمینکہ زُلم ءُ زوراکی کنگ بیتگ ،زالمیں ایرانی نوشیروان ءِ زوراکی بہ بنت کہ آئی ءَ اے راج ءِ چُک چینی یے حکم داتگ یا عرب کہ ایشاں وتی وتگڑیں خدا ءِ نام ءِ سرا تاں بازیں کرناں اے بزگیں راج ءِ سرا زلم کُتگ ، یا پُرتگیزی ءُ انگریز، بلے بلوچاں وتی بنکی راجی سنچ ءُ دود ءُ ربیدگ ھر دور ءُ ھر زمانگ ءَ برجاہ داشتگ اَنت ، بلکیں من گُشاں اے راج ءِ پش کپگ ءِ مستریں سوب ھمیش اِنت کہ ایشان ھر دور ءَ وھدءِ وھشتانی دیم ءَ وتی راجی مڑاہءُ منگہ ءُ ربیت زندگ داشتگ اَنت، پمیشا بلوچ ھچ دور ءَ نہ مُرتگ ءُ زندگ مان اِتگ۔۔۔۔۔۔۔۔۔۔
بلے ادا من دگہ گپے ھم پدر کنگ لوٹاں کہ راجی دود ءُ ربیدگ ھما راج ءِ اندری احساس ءُ مارشت اَنت، بلوچ ءِ دود ءُ ربیدگ،بلوچ ءِ بنکی کیلو، بلوچ ءِ مڑاہ ءُ منگہ بلوچ ءِ مڑاھداری ءُ بلوچ ءِ مھمان جلّی ءُ بلوچی اندری مارشت ءُ زانت بیتگ اَنت۔ ھمیش اَنت کہ بلوچ ءِ میراث اَنت، ھمے بلوچی مڑاہ اِنت ، ھمے اندری بلوچی احساس ءُ زانت اِنت کہ بلوچ ءَ بلوچیت ءِ نامے بخشاتگ، ھمے راجی کیلو ءُ قدر کہ اے ھر دور ءُ ھر زمانگ ءَ بلوچ ءِ زند ءُ مرگ ءِ ھمراہ ءُ مڈی بیتگ اَنت، ناکہ کوھنیں دور ءُ چاکری عھد ءِ گیر آرگ، سواس ءُ تَکّل ءِ پاد ءَ کنگ، زنڈیں پاگ ءِ بندگ بلوچ راجی کلچر ءِ درنگازی اِنت ، اَنچو کہ بحرین ءُ 2 مارچ ءَ کنگ بیت، چیا کہ اے ھما عھد ءِ ضرورت بیتگ اَنت ، ضرورت کلچر ءِ بھر بیت نہ کنت، کلچر راجی زند ءِ اندری احساس ءِ نام اِنت، زاھری ناں۔۔۔
