مرچی باندا ما بازیں مردمانی، یا سیاسی گلانی نیمگ ءَ ھمے گپ ءَ اِش کنگ ءَ اِنت کہ باید رسانکدر آجو بہ بیت ءُ ھر کس ءُ ھر پارٹی ءِ لیکہ ءُ ھبراں وتی تھا جاہ بِدنت۔ ھر ھندءُ دمگ ءِ جاور ءُ وئیلاں پہ راستیں دروشمے ءَ دیم ءَ بیاریت۔ پیشا لھتے بلوچ سیاسی گل چہ پاکستان ءِ بے پرک ءُ سامراجی نپانی پلہ مرزیں رسانکدر ءَ چہ ھمے اُمیت ءَ دار اَنت ءُ ھمے لوٹ ءَ کن اَنت کہ پاکستانی رسانکدر چیا بلوچستان ءِ جاوراں گوں راستی ءِ آدینک ءَ پیش نہ داریت؟ پاکی رسانکدر چیا بلوچ سیاسی گل ءُ لیڈرانی ھالتران ءُ بلوچستان ءِ جاورھالاں چیا کوریج نہ دنت ؟ من گوشاں اے پدنبودیں ھیالے۔۔۔۔۔۔۔آ وتگڑیں سامراجی استان کہ تئی راجی آجوئیں بستار ءِ منّگ ءَ تیار نہ اِنت ، گُڑا آئی ءِ جوڑ کُتگیں رسانکدر چون تئی پلہ مرزی ءَ کنت؟ آ چون بلوچستان ءِ جاوراں گوں راستیں رنگے ءَ دُنیا ءِ دیم ءَ پیش داریت۔ وتی پاداں وت چون تپر جنت۔۔۔
پاکی رسانکدر بہ بیت یا دُنیا ءِ کُجام رسانکی ادارھے۔۔آ ھما قوماں وتی لوٹ ءُ گُزرانی ھاترا جوڑ کُتگ اَنت۔ آ ھچ چوشیں ھالے یا راستی یے دُنیا ءِ دیم ءَ آرگ نہ لوٹاں کہ آھانی نپانی ھاترا تاوان بار بہ بیت۔۔ ایشی ءَ ابئید ھما رسانکی کارگس (ھالتاک، روتاک، ٹی وی چینل) کہ لھتے مخصوصیں پارٹیانی لیکہ ءِ پلہ مرزی ءِ بُن رھبند ءَ ٹھینگ بیتگ اَنت۔ آ ھچ چوشیں گپ ءُ ھالے ءِ شنگ کنگ ءَ تیار نہ اَنت کہ آھانی لیکہ ءِ ھلاپ ءَ برؤت۔۔ پمیشا ما گُشیں کُجام وڑیں رسانکدرے (ھالتاک، ریڈیو یا ٹی وی چینلے) بہ بیت۔ الم یک مخصوصیں لیکھے ءِ پلہ مرز بیت۔ آ ھچ وڑا آجو بیت نہ کنت
دومی نیمگ ءَ مرچی باندا رسانکدر ءِ بستار ءَ ھم کس سر گوز کُت نہ کنت۔ مرچی راجی ءُ چاگردی شعور ءُ سرپدی دیگ ءِ مستریں وسیلہ ھم رسانکدر اِنت۔ نو گپ اش اِنت کہ ھما رسانکی کارگس یا سوشل نیٹورکے کہ بلوچ راجی آجوئی ءِ لیکہ ءِ پلہ مرزی ءِ بُنیاد ءَ ٹھینگ بیتگ اَنت ،ایشانی لوٹ ءُ گُزر چی بہ بنت؟ باید ایشانی لوٹ ءُ گُزر ھمے بہ بیت کہ اے بلوچ راجی آجوئی لیکہ ءِ پلہ مرزی ءَ او بلوچ ورناہ ءُ زھگانی تھا راجی ءُ چاگردی سنچ ءُ زانت ءِ ودّینگ ءُ راجی آجوئی لیکہ ءِ عام کنگ ءَ پہ جانبداری کار بہ کن اَنت۔ بلکیں دُژمن رسانکدر ھر ھما توجیل ءُ سازشے کہ بلوچ راجی آجوئی یے لیکہ ءِ ھلاپ ءَ کہ کنگ اِنت۔ ھمنچو کہ مئے وس رؤت ما اے سازش ءُ توجیلانی دیم ءَ چو دیوال ءَ بہ اوشتیں۔۔۔ کُجام یک فکر ءُ لیکہے کہ مئے راجی آجوئی لیکہ ءِ ھلاپ ءَ برؤت ما آئی ءِ کنڈم کنگ ءِ جُھد ءَ بہ کن ایں۔۔
پہ بلوچ راجی بستار ءُ راجی آجوئی یے لیکہ ءِ پلہ مرزی کنگ ءَ جانبدار بیئگ ءَ ناں کسے مارا میار بار کُت کنت ءُ ناں مئے گلگ ءَ کُت کنت۔
بلوچی ءُبلوچستان سبز ءُ میزران باتاں
