"آ وتی رھبندانی سرا ھمینکہ ”انتہا پسند” اِنت کہ گنوکی ءِ سیمسراں سر بوتگ"
"آ ھیال پرستے، آ نبشتہ کنت رواج زُرتگیں ”اخلاق” تھا فساد ودی کنگ ءَ نبشتہ کنت"
"اگاں سور کُتگیں ءُ سور نہ کُتگیں بچک ءُ جِنک سور ءِ جیڑہ یے سرا جبران ءِ رھبند ءَ بہ زور اَنت تا چاگردی زندگی یے گرنچ شِنگ ءُ شانگ بیت، انسانی زندمان ءِ بُنیاد لُڑ اَنت، اے دُنیا دوزہ ءُ ایشی یے جاہ منند شیطان جوڑ بنت"
”ایشی ءِ ازمی شررنگیانی ریپکاں چہ وت ءَ پھریز اِت کہ اے انسانیت ءِ دُشمن اِنت”
” اے انارکشٹے، کافرے، بے دینے، ما اے ”کوہ لبنان” ءِ جاہ مننداں دزبندی کنیں کہ ایشی (ردوم) داتگیں لیکھاں لَگت بہ جن اَنت، آئی ءِ نبشتگیں سیاھگاں آس ءَ دور بِدینت، چوش مہ بیت کہ ایشی ءِ کافرے لیکہ ایشانی دلاں وتی نیمگ ءَ بہ ترّین اَنت"
”ما ایشی ءِ گِدار ”پُرشتگیں بانزُل” ونتگ تا باز زھر آپ اِنت"
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔
اے ھمے گپانی لھتے دروشم اَنت کہ ایشاں مردم منی بابت ءَ گُشنت۔ اے راستی کہ منی انتہا پسندی گنوکی ءِ سیمسراں سر بوتگ۔ جوڑشت ءِ ردا پروشگ ءِ پلہ مرزی ءَ کناں، من ھما چیزاں چہ نفرت کناں کہ دُنیا آھانی شرپ ءَ کنت، ھما چیزاں گوں مھر کناں کہ دُنیا آھاں سرگوز کنت، اگاں لیکہ، دودءُ ربیدگ ءُ عادت ءُ خصوصیتانی لُڑینگ منی وس ءَ بیتیناں تا من یک ساھتے ھم دیر نہ کُتگ اَت،، بلے لھتے مردم ھمے گُشنت کہ منی سیاھگ ”زھر مینتگیں آپ” اَنت۔ اے راستی ءَ وا زاھر کنت بلے بزیں فردگ ءِ پُشت ءَ،،،،،،،،،او پدریں راستی اِنت کہ من آپاں بس زھر ھوار نہ کناں بلکیں آھاں پیالہ آنی تھا ایر ریچاں، ھاں اے گپ الم اَست اِنت کہ ھما پیالہاں کہ من ایر ریچان یے آ باز ساپ ءُ سلّہ اَنت،
او پش کپتاں ھما کس کہ آ منی نیمگ ءَ وتی دلاں ھمے گُمان ءَ دار اَنت کہ ”من ”ھیال پرستے” آں۔ جمبرانی دُنیا ءَ بال کناں” اے ھما مردماں کہ آ ھمے پیالہانی درپشناکی سرا وتی چماں ایر کن اَنت ءُ ھمے پیالہانی تھ ءِ ھما شراباں آ سرگوز کن اَنت کہ پر آھاں آ زھر مینتگ اَنت، پمیشا آھانی سگندان ایشاں ایر بُرت نہ کنت،
اے سرھال یک تھلیں گُستاخی ءِ گُمان ءَ گیجیت۔۔۔۔ بلے تھلیں گُستاخی چہ دو پوستی ءُ ریپکاری ءِ شیرکنی ءَ جوانتر نہ اِنت ؟؟ گُستاخی وت ءَ گوں وتی اسلیں دروشم ءَ زاھر کنت ، بلے دوپوستی پوشاک گورا کنت ءُ تئی دیم ءَ کئیت۔۔۔
..................................
رودرتک ءِ جاھمنندانی واھشت اِنت کہ لبزانکار چو ھما بینگ مکسک ءِ درور بہ بیت کہ آ مُکّ ءِ جوڑ کنگ ءَ باگاں پُلانی شیرگاں چِنت ءُ مُچ کنت۔
رودرتک ءِ جاھمنند لوٹ اَنت کہ شاعر وتی ارواہ ءَ آھانی بادشاہ، خاکم ءُ مُلاھانی دیم ءَ ( آھانی دوت دیگ ءِ ھاترا) چو ”عود ءُ لوبان ءَ بہ سوچیت، دانکہ روکپت ءِ گوات، دربار، قُربان جاہ ءُ قبر چہ سُتکگیں ”عود ءُ لوبان” آنی دوتاں چکار اَنت۔ بلے انگت آ ایمن نہ اَنت۔ ھمے سوب اِنت کہ مرچیگیں وھد ءَ ”منبنی” وڑیں نازینک کار۔۔۔۔۔۔ لوقیں ءِ وڑیں موتک جنوک صفی الدین حلی ءَ چہ مستریں وتگڑ گندگ ءَ کاینت۔۔۔۔
رودرتک ءِ جاھمنندانی واھگ اِنت کواس آھانی دیم ءَ بس بیدبا، ابن رشد، افرام سریانی ءُ یوحنا دمشقی ءِ گُشتگیں دانکاں ورد بہ کن اَنت ءُ وتی سیاھگانی تھا چہ ھمے بے پرکیں سوج ءُ سراں، بے معنیٰ ایں گُشتن ءُ دانکاں ءُ ھمے کِسہ ءُ آیاتاں گیشی میار اَنت کہ ایشانی سرا کار بند بیئگ ءَ چہ انسانی زند ءِ مثال چو ھما کاہ ءَ بیت کہ ساھگ ءَ رُدیت ءُ آئی ءِ ارواہ تریاک مینتگیں رُمبوکیں آپ ءَ گوں ھم دروشم بیت۔
چوشکہ رودرتک ءِ جاھمنند گوست ءِ آرام جاھاں زند گوازینگ ءَ اَنت۔آ دروگیں اوست ءُ بے سریں پِت ءُ پیرکی رھبنداں گوں دلچسپی دار اَنت۔ بلے آ نوکیں زانت ءُ یک ءُ ٹِکّیں رھبنداں چہ تَچ اَنت کہ اے آھاں ڈنگ جن اَنت ءَ آھاں چہ دِلساچیں وابانی جُھلیں زر ءَ (در کن اَنت) آگاھی دینت۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رودرتک نادُراہ اِنت، آ یک شلیں نادراھیاں ھمینکہ گور جتگ ءُ ھیل داتگ کہ آا ے نادراھیاں یک ابرمی صفت ءُ وتی تب ءِ بھرے سرپد بیت۔ ھما کہ جان دُراھیں بدن ءَ پُرشانیں ارواہ ءَ گوں ھمگرنچ اَنت پر آھاں ھما کہ چر اے نادراھی ءُ محنتاں چہ رک اِتگ تا بزاں آ بے کار اِنت ءُ خدا ءِ چر اے داد ءُ سوگاتاں چہ زبھر اِنت۔۔۔۔
رودرتک ءِ بازیں طبیب اَنت کہ آھانی چار ءُ تپاس ءَ کن اَنت۔ آھانی نادراھیانی بابت ءَ وت ماں وت ءَ شور ءُ سلاہ کن اِنت بلے وھدی علاج ءِ باریگ کئیت تا آ ایشاں ھما نشہ ایں درماناں دینت کہ ایشانی نادراھیاں ودین اِیت بلے ھتم نہ کنت یے۔۔۔۔۔۔۔۔۔۔۔۔
اے وسریں درمانانی بازیں قِسم ءُ بازیں دروشم ءُ بازیں رنگ بیت۔ اے یکے چہ دومی ءَ ھمے وڑا جوڑ کنگ بنت کہ یک نادراھی یے چہ دومی نادراھی ءَ او یک جنجالے چہ دومی جنجال ءَ پیداک بیت۔۔۔پمیشا روکپت ءَ وھدیکہ نوکیں نادراھی یے زاھری دنت تا رودرتکی طبیب پر آئی ءِ ھاترا نوکیں درمانے جوڑ کن اَنت۔۔۔۔۔۔
بلے ھما ساز ءُ سامان کہ آھانی سوب ءَ ھمے درمان جوڑ کنگ بنت ھِساب ءَ ڈن اَنت۔ ایشانی تھا مستریں سوب نادراہ ءِ قضا ءُ قِسمت ءِ سرا ایمان آرگ ءِ مشھوریں فلسفہ اِنت، او ھمے طبیبانی بزدلی ءُ رنجانی تُرس آماچی ایشی ءَ گیشتر سبز ءُ میزرانیں میتاپاں سر کنت۔۔۔۔
نو من ھمے دوا ءُ درمانانی بازیں دروراں دیاں کہ اے رودرتکی طبیباں نیکراھی، السی ءَ چاگردی نادراھیانی ھاترا جوڑ کُتگ اَنت۔۔۔۔۔۔۔۔۔۔۔۔۔۔۔۔۔۔۔
زال ءِ دل ءَ پہ مرد ءَ ، مرد ءِ دل ءَ پہ زال ءَ چہ بازیں زندگ ءُ پدریں سوباں نفرت سر کَشّیت، تا آ مِڑ اَنت ءُ جنگ ءُ چوپ کن اَنت ءُ یکے چہ دومی ءَ جُتا بنت۔ بلے بیست ءُ چار ساھت نہ گوزیت کہ مرد ءِ سیاد ءُ مردم آئی جنین ءِ سیاد ءُ مردمانی گورا سر بنت ءُ ساپ ءُ دِلساچیں لبزاں گوں گپ ءُ تران بیت ءُ ایشی ءَ پد درست ھمے گپ ءِ سرا تپاک کن اَنت کہ جن ءُ مرد وشّان کنگ بہ باں،، پدا ھمے گلگ زال ءِ گورا کاینت ءُ گوں دروگ ءُ راستیں گپاں آئی ءِ دل ءَ تریناں، آ آئی ءَ شرمندگ وا کن اَنت بلے ایمن کُت نہ کناں۔۔۔ ایشی ءَ چہ پد آ مرد ءَ توار جن اَنت ، جوانیں گپ ءُ شیرکنیں مثالانی لڑ پدا برجاہ بیت۔ چر ایشی ءَ چہ آئی ءِ ھیالانی تھا نرمی وا کئیت بلے آ آئی ءَ بدل کُت نہ کن اَنت۔ ھمے وڑا آ مرد ءُ جن کہ پہ دِل یکے چہ دومی ءَ نفرت کن اَنت ,,,,,سِلاہ۔۔۔۔ ادارکی سلاہ ءِ فرض وتی سرا چُٹینگ بیت،،،،،،،،،، نو آ مرد ءُ جن وتی تب ءِ ھلاپ ءَ یکے دومی ءِ گورا نندگ ءَ بندات کن اَنت۔ دانکہ (دلانی) نرمی آسر بیت ءُ ھما درمان ءِ تاثیر پدا ھتم بیت ، کہ سیاد ءُ مردماں کارمرز کُتگ۔دانکہ مرد ءِ دل ءَ پدا نفرت ءُ بے چاڑی سر کشیت۔ زال پدا وتی بد قسمتی ءِ پوشاکاں چاک دنت۔ بلے ھما کس کہ آھاں پیش ءَ تپاک کُتگ اَنت پدا وتی اے جوانیں فرض ءَ پیلہ کن اَنت۔۔۔۔۔ پش کپتاں مرد ءُ جن ، اگاں کسے درمانانی یک قطرھے بہ نوشیت تا یک پُرییں پیالہے ءِ نوشگ ءَ ھم دزمانجن نہ بیت۔۔۔۔۔۔۔۔
راج زالم ءُ زوراکیں خاکم یا کوھنیں رھبند ءِ ھلاپ ءَ پاد کئیت ءُ ”جمعیہ اصلاحی” ءِ بُن ھشت ءَ ایر کنت ءُ دیمروئی ءُ آجوئی ءِ نیمگ ءَ گامگیج زوریت۔۔ ترندیں گُشتانک دیگ بنت ءُ جوانیں نبشتانک نویسگ بنت ۔۔۔۔۔۔۔۔۔۔۔۔۔۔۔۔۔
”میزانیہ” ءُ بُن رھبند شنگ کنگ بنت۔ ( ھر دمگاں) ٹولی ءُ نمائندہ دیم دیگ بنت۔ بلے گیش ءَ چہ گیش دو ماہ نہ گوزیت کہ ھمے اش کنگ بیت کہ سرکار ءَ گل ءِ رھشون دزگیر کُتگ ءُ یا پر آئی ءَ لب ءُ لالچ ءِ منت کنگ بیتگ۔ ایشی ءَ چہ پد جمعیہ اصلاحیہ ءِ بابت ءَ ھچ اِش کنگ نہ بیت۔ چیاکہ آئی ءِ باسک درمان ءِ دو قطرہ نوش کن اَنت ءُ ایمن ءُ منوگر جوڑ بنت۔۔۔۔۔۔۔
گل، بُنکی رھبندانی پژدر ءَ وتی نیکراھی رھشون ءِ ھلاپ ءَ توار چِست کنت، آئی ءِ شخصیت ءُ کردارانی سرا ایراد گیپت ءُ گپ جنت ،،، آئی ءِ وتگڑیں ھیالانی ھلاپ ءَ رؤت۔ آئی ءَ نوکیں نیکراھی یے سرا کاربند بیئگ ءِ بیھار ءَ دنت۔۔۔ھما کہ گوں عقل ءَ نزیک ءُ وھم ءُ گمان ءَ چہ دور بہ بیت۔۔ بلے کمے وھد نہ گوزیت کہ ھمے گپ اش کنگ ءَ کئیت کہ مُلک ءِ عقل منداں نیکراھی رھشون ءُ آئی ءِ منوگرانی مخالفت ھتم کُتگ ءُ طلسمی داروانی تاثیرءَ مرشد ءِ شخصیت ءِ ھما بیم ءُ شرپ ءُ منوگرانی دل ءَ ھما پیشی اطاعت ودی کُتگ۔۔۔۔۔۔۔۔۔۔۔۔۔۔۔۔۔۔۔
کمزور ءُ ایردست، وھدی زالم ءُ زوراک ءِ زُلمانی گلگ ءَ کنت تا ھمساھگ گُشیت
”بے برمش بو، ھما چم کہ تیر ءِ دیم ءَ اوشتیت تا چُرّینگ بیت"
”بے برمش بو، ھما چم کہ تیر ءِ دیم ءَ اوشتیت تا چُرّینگ بیت"
کوچگ ءِ نندوک، مُلاھانی ایمانداری ءُ پھریزگاری ءَ گوں شکی ایں چماں چاریت تا گُشیت
”وھدیکہ کتاب ءَ اَتکگ کہ ” پنت ءِ مُلا بہ زور ءُ راہ ءِ مُلا مہ رو"
”وھدیکہ کتاب ءَ اَتکگ کہ ” پنت ءِ مُلا بہ زور ءُ راہ ءِ مُلا مہ رو"
نودربر ، بصرہ ءُ کوفہ ءِ ملاھانی ”نحو” ترانانی یات کنگ ءَ چہ انکار کنت تا اُستاد گُشیت
”کار دُز، سُستیں مردماں پہ وت اَنچیں توجیل ساز اِتگ کہ گُناہ ءَ چہ گیش قابل نفرت اَنت"
”کار دُز، سُستیں مردماں پہ وت اَنچیں توجیل ساز اِتگ کہ گُناہ ءَ چہ گیش قابل نفرت اَنت"
ورناھیں جنک چہ جنوزامی زندگی گوازینگ ءَ چہ در آیگ لوٹاں تا آھانی مات گُشیت
”جنک چہ وتی مات ءَ شرتر نہ اَنت، پمیشا ھما رھبند کہ تئی مات ءَ گپتگ تو ھم ھما رھبند ءَ برو"
”جنک چہ وتی مات ءَ شرتر نہ اَنت، پمیشا ھما رھبند کہ تئی مات ءَ گپتگ تو ھم ھما رھبند ءَ برو"
نوجوانين جنک، وتگڑیں نیکراھی دودانی بابت ءَ جُست کنت تا مُلا گُشیت
”ھما کس کہ گوں ایمان ءِ چماں نہ چاریت آئی ءَ ماں اے دُنیا ءَ دنز ءُ مُج ءَ ابئید دگہ ھچ میم نئیت"
”ھما کس کہ گوں ایمان ءِ چماں نہ چاریت آئی ءَ ماں اے دُنیا ءَ دنز ءُ مُج ءَ ابئید دگہ ھچ میم نئیت"
یک زمانگے ھمے وڑا گوست بلے رودرتک ءِ انسان وتی نرمیں بسترانی سرا وپتگ ءُ وشواب اِنت۔ وھدی سُنٹو ئے گِٹے پاچیت تا یک سھتے ءَ بُست کنت پدا دوبارہ ھمے درمانانی اثر کہ آئی ءِ جان ءِ رگ ءُ بنداں گوں ھوار کپتگ اَنت وابے گیجیت۔۔۔۔۔۔۔۔۔وھدی یک کسے پاد کئیت ءُ وپتگیناں ٹوھینیت ، آھانی گِساں، عبادت جاھاں ءُ آمیدگساں گوں وتی بُرزیں آواز ءَ جکسین اِیت تا آ گرانیں واب ءَ چہ بُست کن اَنت ءُ جان کَشّنت ءُ گُش اَنت
”چونیں بد تمیزی اے ورناہ, نہ وت وپسیت ءُ نہ دومی ءَ وپسگ ءَ کِل اِیت”
ایشی ءَ پد آ پدا وتی چماں بند کن اَنت گوں وتی ارواہ ءَ تران کنان ءَ گُش اَنت
”آ کافرے، بے دینی ، رواج زُرتگیں ”اخلاق” (ءِ پد گرد ءَ) فساد ودی کنگ لوٹیت۔ راجانی بُنیاد ءَ لُڑینگ لوٹیت۔ انسانیت ءِ دلبند ءَ گوں شِل سریں تیراں دوچگ لوٹيت"
.................................................................
”وھدیکہ من ھما آگہہ ءُ سرکشیں مردماں گوں ھوار کپتاں کہ آ وت ءَ چہ ھمے دوا ءُ درمانانی نوشگ ءَ دور دار اَنت ،گُڑا من ھر وھد چہ وتی ارواہ ءَ جُست کُتگ ات تا منی ارواہ نادید ءُ شکی ایں لبزاں گوں من ھمتران بیتگ , بلے وھدیکہ من اِش کُتگ کہ مردم منی نام ءِ سرا لعنت کن اَنت ءُ منی رھبنداں تُک جن اَنت تا من ءَ وتی راستیں آگھی سرا بھیسہ بیت۔ او من اے گَپ ءَ پوہ بوتاں کہ من آ کساں چہ نہ آں، کہ آ وشیں واب ءُ دلکشیں ھیالانی دامن ءَ زندگ اَنت، بلکیں ھما یکوی پسند(وحدت پسند) آں گوں ھوار اَں ، کہ آ زندگی ءَ ھما تنکیں راھانی وسیلت ءَ گواز کن اَنت کہ آھانی پُل ءُ کُنٹگ تالان اَنت، آھانی چاریں نیمگاں وروکیں گرک ءُ وش تواریں بُلبُل اَنت۔۔۔۔۔
اگاں ھمے آگھی تھا مزن شانی اَست تا منی حیا من ءَ چہ ایشی ءَ دیر داریت، بلے آ مزن شانی یے نہ اِنت بلکیں ھیران ءُ ھبکہ کنوکیں راستی ئے، کہ وحدت پسندیں مردمانی جبین ءَ بے تواری ءُ بے برمشی ءِ تھا زاھری دنت ءُ دیم ءَ روان کنت۔ او آ وت ءَ گوں ایشی ءِ چیریں تاراں بندوک کنت ءُ بیمناکیں مولانی سرا چماں شانک دیان ءُ گوں آئی ءِ ھمراھی ءَ جُنزان کنت۔
۔۔۔۔۔۔۔۔۔۔۔۔۔۔۔۔۔۔۔۔
باندا وھدی لبزانکار ءُ کواس منی ھیالاں(سساسراچ) واننت تا گوں نفرت ءُ بیزاری ءَ گُش اَنت
” آ انتہا پسندی کہ زندگی ءِ تھاریں تکاں گندیت ءُ تھاری ءَ چہ ابئید دگہ ھچ آئی ءِ نظر ءَ نئیت، ھمے سوب اِنت کہ آ یکشلا مئے سرا گریوگ اِنت ءُ مئے جاورانی سرا موتک آرگ اِنت”
من ھمے لبزانکار ءُ کواساں گُشگ لوٹاں
” من رودرتک ءِ سرا موتک کاراں، چیاکہ مُرتگیں لاش ءِ سرا ناچ کنگ گنوکی ءِ گُڑی سیمسریں”
من رودرتک ءِ جاھمنندانی سرا گریواں، چیاکہ نادراھیانی سرا کندگ مزنیں جاھلی یے۔۔۔۔
من ھمے دوستیں مُلک ءِ سرا موتک كاراں، چیاکہ ٹوھیں جنجالانی دیم ءَ صوت گُشگ کوریں جاھلی یے۔۔۔
من انتہا پسندی اں، چیاکہ ھما کس راستی یے درنگازگ ءَ نیم شلونگی کنت، آئی ءِ نم بھر ءَ درنگازیت ءُ نیم ءَ پہ ھمے ھاترا چیر دنت کہ چر ایشی ءَ مردمانی تھا بد گُمانی ,ھیال پرستی ودی بیت۔۔۔۔۔۔۔۔۔۔۔۔۔۔۔۔
من سڑتگیں لاش ءَ گنداں تا منی دل ھمے وڑا نفرت کنت ءُ منی ارواہ ھمینکہ بے تاھیر بیت کہ من آئی ءِ دیم ءَ نِشت نہ کناں، دانکہ منی چپی دست ءَ شراب ءِ پیالہ بہ بیت ءُ راستی دست ءَ شیرکنیانی تالی۔۔۔۔۔۔۔۔۔۔۔۔۔۔۔۔۔
ھمے وڑا اگاں کسے منی موتکاں، گوں کندگاں،،،، منی نفرت ءَ گوں مھر ءَ،،،،، منی انتہا پسندی ءَ گوں اعتدال پسندی ءَ ترینگ لوٹیت تا آ من ءَ ماں رودرتک ءَ یک انچیں خاکمے ءِ ڈس ءَ بِدنت کہ آ نیکراہ ءِ پابند بہ بیت، او راستیں راہ ءِ راھی بہ بیت، یک انچیں مُلائی پیش بِداریت کہ آئی ءِ زانت ءُ کرداں یکوی بہ بیت،،، من ءَ انچیں مردے ءِ بابت ءَ بہ گُشیت کہ آ وتی زال ءَ گوں ھما چماں چاریت کہ وت ءَ چاریت۔۔۔۔۔۔۔
اگاں کسے لوٹیت کہ منی ناچاں بچاریت ءُ چہ من ڈُھل ءُ زیملانی شیرکنی ءَ گوش بہ داریت، تا من ءَ سور ءِ شادھانی مراگاھاں بہ لوٹائینیت، نہ کہ ماں قبرستان ءَ بہ بارت ءُ بہ اوشتارینیت،،،،،،،،،،
..................................................................................
