اگاں ما دُنیا ءِ کُلیں نیکراہ (مذھب) آنی بُنکی تاریخ ءَ بِچاریں ، گُڑا دُنیا ءِھچ مذھب ءِ تھا ھچ وڑا مُلائیت ءِ گنجائش نیست۔ بلکیں دُنیا ءِ کجام مذھب بہ بیت آھاں ملائیت ءِ پد گرد ءَ ردوم زُرتگ۔ بلے انسان ءِ بد قسمتی ایش اِنت ھر مذھب ءَ ابئید ءِ اے ملائیت ءِ بدیں رنگ ءِ ھتم کنگ ءَ بلکیں وت ھمے رنگ زرتگ۔
چوناھا مذھب ھما وھد ءَ وتی بنکی رنگ ءَ بدل کنت ءُ بُنیاد پرستی ءُ ملائیت ءِ رنگ ءَ زیریت کہ آ مذھب اوشت ءِ آماچ بہ بیت۔ تخلیقی فکر ءِ جاہ ءَ تقلیدی فکر دیما بئیت۔ اعتماد ءُ اعتقاد ءِ ھچ وڑیں فرق پش مہ کپیت۔ علمی مردمانی جاہ ءَ بے علم ءُ تقلید پرستیں مردم دیما بیا اَنت۔ ھمدا چہ آ مذھب یک انچیں بدیں رنگے زیریت کہ پہ بنی آدم ءَ زھر قاتل جوڑ بیت ءُ بنی آدم ءِ تخلیقی بستار ءَ ھتم کنت ۔ چر ایشی ءَ چہ بنی آدمی چاگرد ءِ تھا تنگ نظری۔ عدم برداشت ءُ مذھبی گپچل ودی بنت۔
چوناھا ما اگاں دُنیا ءِ کُجام مذھب ءِ تاریخ ءَ بچاریں گُڑا ھمے راستی دیم ءَ کئیت کہ ھر مذھب ءَ ھمے تنگ نظری ءُ ملائیت ءِ ھلاپ ءَ ردوم زُرتگ۔ مرچی ءَ چہ دو ھزار ءُ شش سد سال پیش وھدی ماں ھندوستان ءِ چاگرد ءَ مذھبی تنگ نظری ءُ ملائیت ردوم زیریت، ھندو ازم گوں بدیں رنگے ءَ انسانی چاگرد ءَ چو رمیز ءَ وران کنت ۔ ھندو ازم ءِ ھمراھی ءَ انسانی چاگرد بازیں ذات ءُ پاتاں گوں بھر بیان بیت۔ بُرزی طبقہ ءُ جھلی طبقہ چہ ھندوازم ءِ کمک ءَ دیم ءَ کاینت تا یک نوجوانی کہ ”سدھارتھ” آئی ءِ نام بیت ۔ ھمے تنگ نظری ءُ ملائیت ءِ ھتم کنگ ءُ چاگردی نابروبری ءُ تنگ نظری یے گر ءُ دار ءِ ھاترا دیم ءَ کئیت۔ بزاں حضرت گوتم بُدھ کہ وتی شاھی تھت ءُ تاجاں یل کنت ءُ ھمے چاگردی نابروبری ءُ ملائیت ءَ گر ءُ دار ءَ وتی جھداں دیم ءَ بارت ءُ بدھ ازم ءِ بُنیاد ءَ ایر کنت۔ مرچی اگاں بدھ مت وتی اسل دروشم ءَ پش نہ کپتگ بلے روچ ءِ مروچی ھم آئی ءِ تھا وڑی ناں وڑی ھما رنگ است اِنت۔۔۔۔۔
دومی نیمگ ءَ حضرت عیسیٰ ھم پاد کئیت ءُ ھمے ملائیت ءِ ھلاپ ءَ توار چست کنت ءُ وتگڑیں ملاھانی جوڑینتگیں راھبندانی سرا ایراد گیپت ، تا مُلا گوں عھد ءِ زوراک ءِ کمک ءَ آئی ءَ پاھو ءِ ساد ءَ درنج اَنت ءُ شھید کن اَنت بلے اے اللہ تعالیٰ ءِ وتی مزن شانی اِنت کہ عیسیٰ ءَ زندگ نمیران کنت۔ ایشی پد عیسائی مذھب ھمے بدیں ملائی رنگ ءَ زیریت۔ تنگ نظری ءُ پادری ازم ردوم زیران کنت۔ لھتے کرن ءَ پد ھمے ملائیت ءِ ھلاپ ءَ یک رندی پدا اصلاح پسند دیم ءَکاینت ءُ آ رومن کیتھولک ءِ ملائیت ءِ ھلاپ ءَ پروٹسٹنٹ لیکہ ءَ دیم ءَ برگ ءِ جھد ءَ کن اَنت بلے بے سوب بنت۔
بلے اگاں ما اسلامی تاریخ ءِ سرا چماں شانک بِدئیں گُڑا مارا بنکی ملائیت ءُ بنیاد پرستی ءِ دروشم ھما وھد ءَ دیم ءَ کئیت کہ حضرت امام حسین عھد ءِ زوراک ءِ ھلاپ ءَ آواز چست کنت۔ پیغمبر ءِ نماسگ حسین (رض) ترقی پسند ءُ سوشلسٹ ذھن ءِ ورناھے بیت کہ آ عھد ءِ زوراک ءُ بدیں ملائی رھبند ءِ ھلاپ ءَ توار چست کنت۔ گُڑا عھد ءِ زوراک چہ حسینی فکر ءَ لپرزگ بیت۔ پمیشا آ ملاھانی کمک ءَ حسین ءِ شھید کنگ ءِ توجیل ءَ کنت۔
آ ھما دور ءَ ھشتاد ءُ نود ملا لوٹائینیت ءُ آھاں چہ حسین ءِ کُشگ ءِ فتویٰ ءَ گیپت۔ ملا پہ حلوہ ءَ زر اَنت۔ آ مُلاھاں گوں زر ءُ سُھراں تور کنت، پمیشکہ ایشانی تھا سرجمیں مُلا ھمے فتؤیٰ ءَ دینت کہ حسین ءِ چہ بنکی مذھبی رھبند ءَ بر گشتگ ، پمیشا اسلامی رھبندانی تھا آئی ءِ کُشگ روا اِنت۔ بس یک ایمانداریں مُلائی کہ ”ابن شیبا” آئی ءِ نام بیت آ حسین ءِ بے دردیں کوش ءَ نہ من ایت ۔ پمیشا یزید ءِ حکم ءِ پدا ”ابن شیبا” زندان ءَ دیم دیگ بیت۔۔ حسین ءِ ءُ آئی ءِ زھگ ءُ زالبولانی شھادت ءَ پد ھمے ملائیت گوں بدیں رنگے ءَ دیم ءَ کئیت۔۔۔۔۔۔۔۔۔۔۔۔۔۔
نو ھمے مُلائیت اِنت کہ ھزاراں سالاں زوراکانی پلہ مرزی ءَ کنگ اِنت ءُ زالم ءُ زوراک ءِ ھمک بد ءُ ردیں کرد ءَ نیکی ءِ نام ءَ دات، چیاکہ مُلا ءَ مذھب ءِ سلاہ گون اِنت۔ آئی ءِ ھمے کردانی ھلاپ ءَ اگاں کسے آواز چست بہ کنت گُڑا بزاں خدا ءَ نواھِت۔ آ یا چو عیسیٰ ءِ وڑا کافر گُشگ بیت یا چو حسین (رض) ءَ بر گشتہ، یا چو عرب کواس خلیل جبران ءَ چاگرد ءِ جوڑینتگیں دود ءُ ربیتانی پروشوک ءِ لقب ءَ زیریت۔ پمیشا ”واجب القتل” منّینگ بیت۔۔۔۔
ایشی ءِ پدریں مثال ھمیش اِنت کہ ھمے مُلا لھتے مدت پیش ھمک راجدوستیں ءُ انسان دوستیں مردم ءَ کمیونسٹی ءِ نام ءَ دینت ، امریکا ءِ کمک ءَ ، خدا ءِ نام ءِ سرا ، وتی ھمک بدیں کرداں جہاد ءِ نام ءَ دینت۔ بلے خُدا ءِ گرگ ، وھدی امریکا ایشانی بدیں نیت ءَ زانت ءُ پدا ھمیشانی گُٹ ءَ لوپ بیت۔ نو ھما ملا آں کہ ھمک جوانیں مردم ءَ امریکی ایجنٹے ءِ نام ءَ پِر بند اَنت۔ چیاکہ پہ ایشاں ھچ عیب نہ اِنت۔ پہ ایشاں خُدا ءِ نام ءِ سرا دروگ بندگ ءُ دوپوستی کنگ ھم عیب نہ اِنت۔ ایشاں امام حسین ءِ ھلاپ ءَ قتل ءِ فتویٰ دات ، پہ ایشاں عیب نہ اَت۔ ایشاں عیسیٰ کافر گُشت ، پہ ایشاں روا اَت۔ ایشاں ماں بنگلہ دیش ءَ مسلمان مات ءُ گھارانی شرپ لگتمال کُت، پہ ایشاں خُدا ءِ نام ءَ جنگے اَت۔ ایشاں ماں افغانستان ءَ راجدوستیں نجیب پہ بے دردی پاھو ءِ ساد ءَ درتک ءُ شھید کُت، کس ءَ ھچ گُشت نہ کُت اَنت، چیاکہ اے خُدا ءِ نام ءَ جنگ ءَ اِتاں،
بلے من وتی اسل بُنگپ ءِ نیمگ ءَ کایاں، بزاں ھمے مُلائیت نوکیں رنگے ءَ ھما وھد ءَ دیم ءَ اَتک کہ سوویت یونین زور ءَ اَت۔ ایشی ءِ نوک تریں شکل ماں مصر ءَ ”اخوان المسلمین” ماں پاکی استان ءَ جماعت اسلامی اَنت۔ بلے ”اخوان المسلمین” جمال ناصر ءِ مزن مردی ءُ دلیری ءَ داں کرنے ءَ ودگ ءَ نہ اِشتگ، دانکہ ایشاں ھمے ابدالیں مرد کافر ھم گُشتگ۔ بلے اے انگت وڑی ناں وڑی مصری الس ءِ سرا چٹی اَنت۔
بلے ”جماعت اسلامی” ءِ بدتریں رنگے ، ایشی ءَ پاکی چیریں دست آئی۔ایس، آئی ءِ کمک گون اِنت۔ بلکیں آئی۔ایس۔آئی ءِ ادارہ ءِ جند ھمیشانی دست ءِ چیر ءَ کار ءَ اِنت۔ پدا جماعت اسلامی ءِ بازیں دگہ کسانیں کسانیں ونگ است اَنت ، وتی نپانی ھاترا اے مدام یک دست بنت ءُ ھما کار ءَ کن اَنت کہ پہ ھمک غیرت مندیں انسان ءَ عیبے۔۔۔۔۔۔۔۔۔ ھمے جماعت اسلامی ءَ کہ ایشاں وتی نپانی ھمے ناپاکیں استان ءِ بُن ھشت ایر کُت۔ ایشاں وتی ذاتی نپانی ھاترا ماں بنگلہ دیش ءَ مسلمان مات ءُ گھارانی گُما ھما کُت کہ دنیگہ انسانیت ءِ ارواہ لرزگے زیریت۔ ایشانی زلم ءُ زوراکی ءِ کسہ سک دراج اِنت۔ اے خدا ءِ نام ءِ سرا ھما کار ءَ کن اَنت کہ ایشانی دست ءَ بیت۔ ایشاں بلوچ راجدوست کمیونسٹ ءُ کافر گُشت اَنت۔ ایشاں بلوچستان قبضہ کُت ءُ ماں بلوچستان ءَ مذھبی تنگ نظری ءُ ملائیت ءِ ردوم دیگ ءِ بے سوبیں جُھد کُت۔ بلے اے خدا ءِ وتی شان اِنت کہ اے ھرجاہ ءَ رُسوا ءُ ٹینڈر اَنت۔
نو گپ اِش اِنت کہ مُلا ءُ زوراک ءِ سیادی چی اِنت۔؟ بلے اگاں راستی بچار ئے گُڑا زانگ بیت کہ مُلا ءُ زالم یکیں آدینک ءِ دو دیم اَنت۔ زالم پمیشکہ ھر دور ءُ ھر زمانگ ءَ مذھب ءَ کار مرز کنت کہ مذھب پر آئی ءَ ٹوھیں سلاھے ءِ بستار ءَ داریت۔ آ مذھب نام ءِ سرا دومی ملکاں ایردست کنت۔ خدا ءِ نام ءِ سرا دومی راجانی مال ءُ مڈیاں پُلیت کہ ”مالِ غنیمت” اَنت۔ آ مذھب ءِ لٹ ءَ کارمرز کنت ءُ ایردست ءُ بزگیں راجاں کافری ءِ نام ءَ دنت۔ اے خدا ءِ نام ءِ سرا بمب تراکیننت ءُ ھزاراں زھگ ءُ زالبولانی کُشت ءُ کوش ءَ کن اَنت۔ اے مذھب ءِ نام ءِ سرا ھما کار ءَ کن اَنت کہ ایشانی دل بہ لوٹیت۔
جی په راج ءِ سرمچار و جهدکار
***************************
رَسترانی بادشاهی مُلک ءَ زُرت
جون و لاش انت مئی شهیدانی هزار
کـَپتگ انت کوه وگـَر و پَٹــّاں ماں
بُرتگ انت شَهر و چه لوگ و مَلگزار
رَستران انت دین ءِ مَنـّوک و سروک
سیه بَزیں پَئوجانی واهُند ، پـَهره دار
په بلوچانی بَرَگ مُلک و زمین
وَس کنان انت ، هونریچ انت هونوار
شِدّت انت کپتگ بلوچ ءِ چُکّ و پیر
راج ءِ ورنا ، جه جتگ هست سرمچار
په سرانی ندر کنگ نے چَک و پـَـد
تاں که آجو بات بلوچانی ڈگار
کس گـُلامی په نه بیت آبات و سیر
ماں گـِلامی ءِ تـَنـد ءَ نِندیت نئیکه سار
جَهجَتگ راج ءِ تـمردیں نــوگـُلاں
تاں نبیس انت وتی تقدیر ءَ بهار
تاں بلوچستان به بات شات و گـَلیں
گار به بات انت هم گـُلامی ءِ مَهار
جی په راج ءِ سرمچار و جهدکار
جی په زانتکاراں که بـُرّ انت گَٹ تلار
کریم بلوچ - تـَهـل
******************