منی وارث مُرت اَنت ءُ من زند ءِ قید ءَ بنديگ ، وحدت ءُ تھنائی ءِ تھا پر آھاں موتک آرگ ءَ اوں۔۔
منی دوست چہ من ھز اِتاں ءُ منی زندگی آھاں پد غم ءُ اندوھانی پچیں عکسے جوڑ اِنت۔۔۔۔۔۔
منی وارث ءُ دوست مرگ ءِ دامن ءَ واب کپتاں، او منی ڈیھ ءِ کوہ ارس ءُ ھوناں گوں میچلینگ بوتاں۔ بلے من ھمے وڑا ادا زند گوازینگ ءَ آں، ھمے وڑا زند ءِ منگہ ءُ روچ ءِ برانزاں گوں رُژنائیں کوھانی سرا تر ءُ گرد کنوکیں مھروان ءُ دوستانی گُما گوازینتگ۔۔۔۔۔۔۔۔۔۔۔۔۔۔
منی وارث شُد ءَ چہ مُرتاں، ھما کہ پش کپت اَنت آ زھمانی دپار بوتاں۔۔بلے من ھما مردمانی گُما گردگ ءَ اَنت کہ شاد ءُ شادمان اَنت۔ شر شریں ورگ ور اَنت۔ جوان جوانیں شراب نوش اَنت۔ساپ ءُ سلھیں گندلانی سرا وپس اَنت۔۔آ زندگی ءَ گوں وش اَنت ءُ زندگی چہ چر آھاں وش اِنت۔۔۔
منی دوست گوں وار ءُ بزگی یے مرگ ءَ کُشگ بیت اَنت۔بلے من ادا وش ءُ آرامیں زند گوازینگ ءَ آں۔ ءُ اے ھما تُرسناکیں ڈرامہ اِنت کہ منی ارواہ ءِ اسٹیج ءِ سرا لئیب دارگ بیئگ اِنت۔۔۔۔۔۔
اگاں من وتی شُدیکیں وارثانی گُما بیتیناں، یا وتی زُلم ءُ زوراکیانی آماچیں ایردستیں راج ءِ گورا تا اے دوئیں (دردانی) تیرانک منی سینگ ءِ سرا اینکہ تُرند نہ بوتگُ اَت، ءُ شپ منی چماں اینکہ سیاہ پوش۔۔۔۔۔۔۔۔۔۔۔۔۔۔۔پمیشا ھما کہ جنجال ءُ بے وسی ءِ وھد ءَ وتی وارثانی گُما بیت تا آ یک انچیں مھتریں وشی يے ماریت کہ پہ وتی وجود ءِ ھاترا شھیدی ءِ منت ءَ زریت ، بلکیں وتی ذات ءِ سرا پھر بندیت۔۔۔۔من بے گُناھانی گُما پہ بے گُناھی مِرَگ ءَ آں۔بلے من وتی شُدیگ ءُ ایردستیں راج ءِ گُما نہ آں کہ آ مرگ ءِ روانک ءِ ھمراھی ءَ شھیدی ءِ بُرزیانی نیمگ ءَ سر گپتگ اَنت۔۔۔۔بلکیں ادا ۔۔۔ ھپت زِرانی پُشت ءَ۔۔۔۔۔۔۔۔ایمنی یے ساھگ ءَ وشی ءِ منگیرانی چیر ءَ زند گوازینگ ءَ آں۔۔۔۔۔۔۔۔۔۔۔۔۔۔۔۔۔۔۔۔۔
ادا من چہ جنجال ءُ جنجال آماچاں دور آں۔ او پہ ھچ ءَ ،،،، دانکہ وتی ارسانی سرا ھم پھر نہ بنداں۔۔۔۔۔۔۔۔۔
یک درانڈیھی ، کہ چہ ڈیھ ءَ باز دور اِنت۔ پہ شُدیگیں وارث ءُ دوستانی ھاترا چی کُت کنت؟
دریگتیں من بِزانتیں کہ شاعر ءِ موتک ءُ چیھالانی آسر چی اِنت۔۔۔۔
”اگاں من گُلزمین ءَ گندیمے برے بوتیناں، تا شُدیگیں زھگے ءَ من ءَ پروشتگ اَت ءُ منی داناں چہ وت ءَ ملکموت ءِ دست ءَ رکینتگ اَت”
”اگاں من وتی ڈیھ ءِ باگانی نیوگے بوتیناں، تا شُدیگیں زالبولاں من ءَ وارتگ اَت ءُ وتی لاپ ءِ دوزہ توس اِتگ اَت”
” اگاں من وتی ڈیھ ءَ بالی مُرگی بوتیناں، تا شُدیگیں مردیناں من ءَ شکار کُتگ اَنت ءُ چہ منی بدن ءَ چہ وتی بدن ، قبر ءِ ساھگ ءَ دور کُتگ اَت”
بلے آہ۔۔۔ باز بے وسی ءُ بژن ءِ گپ اِنت کہ من نہ ششام ءِ کشارانی گندیم ءِ برے آں ءُ ناں ماں لبنان ءِ میتاپانی پشّ اِتگیں نیوگے آں۔۔۔۔۔۔۔۔۔
او اے ھما بے برمشیں بندات اِنت کہ ایشی ءَ من ءَ وتی جند ءِ، ءُ شپ ءِ برمشانی دیم ءَ کم شرپ کُتگ۔۔او اے ھما غمجتیں کِسہ اِنت کہ ایشی ءَ منی زبان ءُ دست ٹٹاتگ ءُ من ءَ انچیں جاوراں گوں دوچار کُتگ کہ نہ پہ من ”عزم ءُ ارادہ” پش کپتگ ءُ نہ کرد۔۔۔۔۔۔۔۔۔۔۔۔۔۔۔۔
”اگاں من گُلزمین ءَ گندیمے برے بوتیناں، تا شُدیگیں زھگے ءَ من ءَ پروشتگ اَت ءُ منی داناں چہ وت ءَ ملکموت ءِ دست ءَ رکینتگ اَت”
”اگاں من وتی ڈیھ ءِ باگانی نیوگے بوتیناں، تا شُدیگیں زالبولاں من ءَ وارتگ اَت ءُ وتی لاپ ءِ دوزہ توس اِتگ اَت”
” اگاں من وتی ڈیھ ءَ بالی مُرگی بوتیناں، تا شُدیگیں مردیناں من ءَ شکار کُتگ اَنت ءُ چہ منی بدن ءَ چہ وتی بدن ، قبر ءِ ساھگ ءَ دور کُتگ اَت”
بلے آہ۔۔۔ باز بے وسی ءُ بژن ءِ گپ اِنت کہ من نہ ششام ءِ کشارانی گندیم ءِ برے آں ءُ ناں ماں لبنان ءِ میتاپانی پشّ اِتگیں نیوگے آں۔۔۔۔۔۔۔۔۔
او اے ھما بے برمشیں بندات اِنت کہ ایشی ءَ من ءَ وتی جند ءِ، ءُ شپ ءِ برمشانی دیم ءَ کم شرپ کُتگ۔۔او اے ھما غمجتیں کِسہ اِنت کہ ایشی ءَ منی زبان ءُ دست ٹٹاتگ ءُ من ءَ انچیں جاوراں گوں دوچار کُتگ کہ نہ پہ من ”عزم ءُ ارادہ” پش کپتگ ءُ نہ کرد۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مردم من ءَ گُشنت
تئی ڈیھ ءِ بربادی (ءِ بستار) چی اِنت ابئید ءِ دنیا ءِ یک کسانیں بھرے ءِ بربادی۔۔۔۔ او ھما ارس ءُ ھون کہ تئی ڈیھ ءَ رِتکگاں (بستار) چی اِنت، ابئید ءِ ھما ارس ءُ ھونانی جو ءِ لھتے ترمپ کہ اے زمین ءِ پَٹ ءُ میداناں تَل اَنت۔۔۔۔۔۔۔۔۔۔۔۔
راست اِنت۔۔۔۔ بلے منی ڈیھ ءِ بربادی ، بے تواریں بربادی یے۔۔۔۔۔منی ڈیھ ءِ بربادی ھما گُناہ اِنت کہ آئی ءِ آسرا مار ءُ اژدھا ودی بنت۔۔۔منی ڈیھ ءِ بربادی ھما ٹریجڈی اِنت کہ آئی ءِ زیمل نادِلکش اَنت۔۔۔۔۔۔۔۔۔۔۔۔
اگاں منی راج بے ایمان ءُ دوپوستیں خاکمانی ھلاپ ءَ یاگی ءُ سرکشی ءِ بُھتام ءَ کُشگ بیت اِنت تا من گُشتگ اَت آجوئی ءِ ھاترا مرگ غلامی ءِ ساھگ ءَ زند گوازینگ ءَ شرتر اِنت۔۔۔۔۔۔ھما کس کہ گوں دست ءِ سگار ءَ مرگ ءَ گُلائیش بہ کنت آ حق ءِ ھمراھی ءَ پہ مدامی زندگ مانیت۔۔۔۔۔۔۔۔۔۔۔
اگاں منی راج ءَ آجوئی ءِ جنگ ءَ بھر بہ زُرتیں تا من گُشتگ اَت کہ منی راج یک ترند ءُ تیزیں لوڑ ءُ مُجے کہ وتی تاگت ءَ گوں حُشک ءُ سبزیں شاھاں یک شلا پروشان ءَ روت۔ طوفانی شاھانی ھمراھی ءَ دم توسی ءِ مرگ چہ پیری ءِ دامن ءِ مرگ ءَ شرتر اِنت۔۔۔۔۔۔۔۔۔۔۔۔۔۔۔۔۔۔۔۔۔۔
۔
اگاں ماں جھان ءَ ٹوھیں زمین جُمبے بیاتکیں ءُ ایشی ءِ آسرا منی ڈیھ سر ءُ چیر بیتیں ءُ منی راج گُلزمین ءِ ھاکاں چیر تر اِت اِنت تا من گُشتگ اَت، اے چیریں رازی، ایشی ءِ زرمبش دیگ ءِ ذمہ وار ھما تاگت اِنت کہ انسانی تاگت ءَ چہ مستر ءُ بلند شان اِنت۔۔۔پمیشا جاھلی ءِ بیت اگاں ما اے راز ءِ پوہ بیئگ ءِ جُھد ءَ بہ کنیں۔۔۔۔۔۔۔۔۔۔۔۔۔۔۔۔۔۔۔
بلے منی سیاد ءُ وارث یاگی یے بُھتام ءَ نہ مُرتاں۔۔ آجوئی ءِ راہ ءَ جُھد ءِ ڈیساں نہ شُت اَنت۔۔آھانی مُلک زمین جُمب ءَ تباہ نہ کُت۔ بلکیں آ غلامی ءِ گُناہ ءِ سرا کُشگ بیت اَنت۔۔۔۔۔۔۔۔۔۔۔۔۔
منی وارث پاھو ءِ ساد ءَ درنجگ بیت اَنت
آ مُرتاں ، ھمے جاوراں کہ آھانی دست چپ ءُ راست ءَ تالان اِت اَنت ءُ چم آزمان ءِ تھاریاں سک اِت اَنت۔
آ بے زبانی ءُ بے برمشی ءَ مُرتاں، چیاکہ انسانیت ءِ گوش پہ آھانی زار ءُ چیھالانی گوشدارگ ءَ بند اِت اَنت۔۔۔۔۔۔۔۔۔۔۔۔۔۔۔۔
آ مُرتاں، پمیشا کہ آھاں وتی دُشمنانی گُما چو بزدلانی وڑا مھر کُت ءُ وتی لوٹوکانی گُما بے دینینانی وڑا نفرت کُت۔۔۔۔۔۔۔۔۔۔
آ مُرتاں، پمیشا کہ گُنھکار نہ اِت اَنت
آ مُرتاں، پمیشا کہ آھاں ظالمانی سرا ظلم نہ کُت
آ مُرتاں، پمیشا کہ امن دوست اِت اَنت
آ مرتاں ، ھمے گُلزمین ءِ سرا شُدءَ کُشت اَنت کہ اودا شھد ءُ شیرانی جو تچ اَنت۔
آ مرتاں ، پمیشا کہ دوزدھی اژدھایاں آھانی مال ءُ دلوت ءُ کشارانی سرجمیں ثمر پلیک اِتاں۔۔
آ مرتاں، پمیشا کہ ماراں ۔۔۔۔۔۔ زمینی ماراں، ھما ”فضا” گوں وتی زھر مینتگیں ھوشّاراں سرا زُرت کہ اودا گُلاب، آسمی ءُ صنوبرانی دلساچیں بوہ تالان اِت اَنت۔۔۔۔۔۔۔۔۔۔
اے روسرتک ءِ جاھمننداں۔۔۔ مئے ءُ شُمے سیاد ءُ وارث مرتاں۔ بہ گُشئے نو ما ھمایانی ھاترا چی کُت کنیں کہ آ چہ ھمے مرگ ءِ کل ءَ رک اِتگ اَنت۔۔۔۔۔۔۔۔۔
مئے اُپار آھانی دم توسیں ارواھاں ترینت نہ کن انت ءُ مئے ارس آھانی ھوشام ءَ پروشت نہ کن انت۔۔
او پدا ما آھاں چر اے شُد ءُ ھوشام ءَ چون رکینت کن ایں؟
نو چون؟ ما شک ءُ بے بھیسی ءُ بے ھالی ءُ بے پرواھی ءَ گوں اے وئیل ءِ نیمگ ءَ وتی چماں بند بہ کن ایں ءُ وتی کسان ءُ روز روزینی کاراں گوں دلگوش بہ بئیں۔۔۔۔۔۔۔۔۔۔۔۔۔
..............................................................
او منی شامی براتاں ۔۔۔۔ ھما جزبگ کہ شمار نیم مُردگیں براتانی کمک ءِ سکین ءَ دنت۔۔۔ آ یک انچیں بے مثال ءُ گچینی درورے کہ آ شمارا روچ ءِ رُژن ءُ شپ ءِ بے برمشی ءَ چہ دلساچ بیئگ ءِ حقدار کنت۔۔۔۔۔۔۔۔۔۔۔۔۔۔۔
او ھما کلدار کہ شما وتی نیمگ ءَ شھارینتگیں دست ءَ دئے یے, هما پُر گوناپیں ڈس اِنت کہ آ شمے انسانیت ءَ گوں ”ماورائے انسانیت” ءَ ھوار گیجیت۔۔۔۔۔۔۔۔۔۔۔۔۔۔۔۔۔۔۔۔
