یک مصیبت زدگیں داستانے ءَ گیش چونیں کِسّہ دِل سِند بیت، بزاں غم جتانی احوال کہ ایشی ءِ ھر گال دِلکش ، ءُ ھر بندانی تھا رنجانی اَمباری چیر بیت۔۔۔
بلے ایش ھما راھی یے جاوراں چہ گیش ساہ گیر نہ بیت کہ آ دمبُردگ ءُ بور بور اِنت، شِل سریں راھانی سفر ءَ چہ گوں آبلہ ایں پاداں مرادانی منزل ءِ نزّیک ءَ سر بوتگ ، بلے اینکہ قابل نہ اِنت کہ دیم ءَ جُنزان بہ کنت، چم پہ اُمیتے راھاں چار اَنت بلے ناں اینکہ ھِمّت پش کپتگ ءُ ناں تاگت۔۔۔۔۔۔۔۔
اللہ ، چونیں بد بھتیں نامے ھما کہ جند ءِ گُلزمین ءَ درامد بہ بیت،،،،،پہ ھما منزل ءِ سر بوئگ ءَ ناں روچ ءَ روچ سرپد بوتگ ءُ ناں شپ ءَ شپ،،،،،،،،آئی ءِ دیم ءَ اِنت بلے آئی ءَ چہ باز دور
ھما کس ءَ چہ گیشتر دِل پروش کئے بہ بیت کہ آئی ءَ وتی اُمیتانی درچک گوں ھوناں آپ داتگ، آئی ءِ ردوم زورگ ءِ ھمک ساھت ھساب داشتگ۔ بلے گوات ءِ یک شھمالے آئی ءَ دور بہ دنت۔ شاھاں جُتا بہ کنت ءُ شاھُکاں شِنگ ءُ شانگ۔۔۔۔۔۔۔۔۔۔۔۔۔۔۔۔۔۔۔
مرادانی منزل ءِ قدر ءَ چہ ھمائی ءَ پُرس اِت، آئی ءِ داشتگیں اُمیت کَل بیتگ اَنت ءُ اوستانی دُنیا پُرُشت ءُ پروش ءِ آماچ۔۔۔۔۔۔۔۔۔
یا ھما ساہ سِستگیں راھی ،، آئی ءَ زند ءِ ھر گوازی ببا داتگ۔ آئی ءِ بھت ءِ لوٹ ھر وھد بے سریں راھاں گَرد اِتگ۔۔ بلے وھدی ”بابِ قبول” ءِ پچ بیئگ ءِ وھد اَتکگ، زند ءِ پچ لرزوکیں ساھت،،،،،،گُڑا مرگ ءِ فرشتہ آئی ءَ ماں وتی گورامبازاں زیرگ ءِ جار ءَ بہ جنت۔۔۔۔۔۔۔۔۔۔۔
آ بزگ ءِ پُر جزبگیں دل ءَ بس پش کپیت ، مرادانی منزل ءَ سربوئگ ءَ گوں ببا دیگ ءِ رنج،،،، چنکہ دِل سند اِنت پدا آ ھم پہ مُدامی۔۔۔۔۔۔۔۔۔۔۔۔۔۔۔
