Facebook
RSS

بلوچ راجی جُنز ءِ تھا رھشون ءُ لَس مھلوک ءِ کِرد چے بیئگ لوٹیت؟

-
شپچراگ

(بانک عندلیب گچکی ءِ اے نبشتانک مارا چہ مئے ”ای میل“ ایڈریس ءَ سر بوتگ۔  نبشتانک ءِ تھا سرجمیں ھیال بانک ءِ وتی ھیال اَنت، نویستگیں ھیالانی تھا  ھچ وڑیں بدلی سدلی آرگ نہ بیتگ، بلے بازیں جاہ ءَ اردو ءِ لبز ءُ گالبند ترینگ بیتگ اَنت ءُ بلوچی گالبند آرگ بیتگ اَنت۔چر ایشی ءَ  ما چہ بانک ءَ پھلی لوٹیں، بام ھال)


نبشتہ کار؛
بانک عندلیب گچکی


راجی آجوئی:  راجی آجوئی ءِ مول ءُ مراد صوبائی وت واجہی یا لھتے آسراتیانی سر ءِ ھاکمی نہ اِنت۔ بلکیں ارجی آجوئی ھما اِنت کہ راجے ءَ وتی زِر، وتی گُلزمین ءُ وتی زمین ءِ سرا نندگ ءُ وتی دود ءُ ربیدگانی پھازگ ءُ وتی زمین ءِ مال ءُ مڈیانی سرا حاکمیت ءِ سرجمیں حق دیگ بہ بیت۔ آئی ءِ چاگردی حقانی سرا دگہ ھِچ ڈنی راجانی دزمانجی مہ بیت ءُ کسے ایردست مہ بیت۔ گُڑا آ راج آجوئیں راجے گُشگ بیت۔

وھدیکہ راجے دری راجے ءِ ایردست کنگ بوتگ ءُ آئی ءِ راجی وت واجہی پَچ گِرَگ بوتگ ءُ آئی ءَ وتی ہر چیز ءَ زبھر کنگ بوتگ۔ دری راجاں آئی ءِ زمین ءُ زِر وتی دست ءَ آ ایردست کُتگ۔ آئی ءِ ”کلچر“ پَد منتگ کنگ بوتگ ءُ آئی ءِ ماتی زبان ءِ جاہ ءَ درآمدیں زبانے آ راج ءِ سرا چَٹی کنگ بوتگ۔آ راج ءِ “ذرائع معاش“ استعماری نظام ءِ ایردست کنگ بوتگ۔ گُڑا چوشیں جاورھالاں راج ءِ تھا ھما مردم کہ زانتکار ءُ سِنچ دار(باشعور) بہ بنت، آھاں راجی غلامی ءِ احساس بہ بیت، آ راجی آجوئی ءِ ھاترا جُنز چِست کن اَنت۔ بزاں راجی آجوئی ءِ جُنز ءِ بُن ھِشت ءِ ایر کنوک وت ھما راج ءِ لَس مھلوک بیت۔ راجی جُنز ءِ سرپاں ھما مردم کہ درستاں چہ گیش زانتکار ءُ باشعور بہ بیت، آئی ءِ تھا لس مھلوک ءِ  رھشونی ءِ تاگت بہ بیت۔ گُڑا ھمے مردم پہ رھشونی ءِ ھاترا گچین کنگ بیت۔

وھدیکہ راج پہ آجوئی ءِ ھاترا چِست بیت ءُ وتی جُنزا دیم ءَ بران کنت تہ راجی جُنز ءِ پروش دیگ ءُ نزور کنگ ءَ ”استعماری طاقت“ ہر وڑیں حربہ کارمرز کنت کہ کُجام وڑا راجی جُنز ءَ پروش بِدَنت۔ چیاکہ ھما زوراکیں طاقت ءَ کہ اے راج  غلام داشتگ ءُ ایردست کُتگ۔ آئی ءِ کوشست ھمے بیت کہ آ گیش ءَ چہ گیش ھما راج ءَ وتی ایردستی ءِ تھا بِداریت۔ زوراک ءِ مستریں حربہ ھمیش بیت کہ آ تعلیمی تکاں ایردستیں راج ءَ پدمنتگ بہ کنت، تاکہ ایردستیں راج ءِ تھا راجی سِنچ ایرموش بہ بیت ءُ آئی ءَ غلامی ءِ مارشت مہ بیت یا آ ذھنی گپچلانی آماچ بہ بیت، زوراک ، ایردست ءَ ھمے مارشت ءَ دیگ لوٹیت کہ راجی غلامی ءِ سانکلانی پروشگ ارزانیں کارے نہ اِنت۔

زوراک ءُ ایردست ءِ میان ءَ جنگ ءِ تاریخ ءِ ھمینکہ کوھن اِنت کہ بنی آدم ءِ تاریخ اِنت۔ اے جنگ ھابیل ءُ قابیل ءَ عھد ءَ بندات بیتگ۔ 

استعماری قوت ہروھد ءَ ھما راج کہ راجی آجوئی ءِ ھاترا چِست بوتگ، عالمی مھلوک ءِ دیم ءَ آ راج ءَ دھشت گرد نامینگ ءِ جُھد ءَ کنت ءُ عالمی مھلوک ءِ پلہ مرزی ءَ وتی نیمگ ءَ تَرینگ ءِ جُہد ءَ کنت۔ 

گُشنت کہ ہر فرعونے ءِ واستہ موسیٰ ئے پیداک بیت۔ جنگ ءِ راہ ءُ رھبند بدل بنت۔ جاورھال مَٹ بنت، بلے حق ءُ راستی ءُ دروگ ءُ باطل ءِ میان ءَ جنگ ھما اِنت کہ ھما۔۔۔۔۔۔۔۔۔۔۔ھما قربانی بنت ءُ ھما جزبگ ءُ حوصلہ۔۔۔۔۔۔۔

ما گِندیں وھدے استعماری زوراکاں دُنیا ءِ بزگیں راجانی سرا زُلم ءُ زوراکی ءِ کِسہ بندات کُتگ، گُڑا زُلم ءُ زوراکیانی پژگرد ءَ عظیمیں آشوبی رھشون دیم ءَ اَتکگ اَنت ءُ ھما راج اِش چہ زوراک ءِ سانکلاں آجو کُتگ۔راجی جنگانی تھا امریکا ءِ وڑیں سپر پاوراں ھم پروش وارتگ۔ 

ھمے وڑا ماں بساؤ ءَ ”الیکار کبرال“ ءَ راجی آجوئی ءِ ھاترا جنگ کُت ءُ پُرتگیزی زوراک پروش داتَنت ءُ وتی ماتیں ڈیھ چہ زوراک ءِ دست ءَ آجو کُت۔ 

بلے یک ایردستیں راجے ھما وھد ءَ آجوئی ءِ سیمسراں سر بیت کہ آ پہ دِل ءُ سِتک راجی آجوئی ءِ جُھد ءَ ھوار بہ بیت ءُ جُھد بہ کنت، درستاں چہ پیش راج ءِ تھا آشوب ءِ چِست بیئگ ھژدری اِنت، چیاکہ راجی آجوئی آشوب ءَ چہ رَند رسیت۔ راج ءِ تھا آشوب وپتگیں واب ءَ نئیت۔ بلکیں ھما راج ءِ لس مھلوک جاوراں چہ نپ چِست کن اَنت ءُ گوں زانت ءُ سِنچ آشوب ءِ راہ ءَ ھموار کن اِنت ءُ آشوب کارَنت۔ اول سرا آشوب ءِ دروشم ھمے وڑا دیم ءَ کئیت کہ مھلوک وتی کسانیں کسانیں لوٹانی ھاترا دگانی سرا در کپ اَنت۔

بلے وھدیکہ آ منظمیں شکلے ءَ یکجاہ بیان بنت، آھاں راجی یکدستی ءِ مارشت بیت ءُ یکجاہ بیان بنت ءُ آھانی تھا راجی سِنچ ءُ شعور ودان کنت ءُ آ انقلاب تاں آجوئی ءَ سر بنت۔ ھمینکہ استعماری زلم ءُ زوراکی گیش بیان بنت، آھانی تھا  ھمینکہ راجی غلامی ءِ احساس ودان کنت۔آھاں ھمے احساس بیت کہ آھاں پہ راجی آجوئی ءِ ھاترا گیشتر منظمیں شکلے ءَ چِست بیئگ لوٹیت۔

زوراک ءِ نیمگ ءَ زُلم ءُ زوراکی کہ چہ حدا گوزیت، تہ لھتے مردم زوراک ءَ زُلم ءُ زوراکیانی دیمپانی ءُ راجی آجوئی ءِ ھاترا گوریلہ رھبند ءَ گچین کنت ءُ جنگ ءَ بندات کنت۔چیاکہ اے ھما مرحلہ اِنت کہ آھاں احساس بیت کہ آجوئی آھاں تلاہ ءِ تاس ءَ کنگ ءُ دیگ نہ بیت۔ بلکیں ایشی ءِ ھاترا گیش ءَ چہ گیش سرانی قُربانی دیگ لوٹیت۔

وھدیکہ پہ وتی راجی لوٹانی ھاترا مردم یکجاہ بنت، آھانی یک لیکہ (نظریہ) ئے بیت۔ ھمے نظریہ ءِ بنیاد ءَ آ وتی جُنز ءَ کاررھبند دیاں، تانکہ وتی راجی آجوئی ءِ گِرگ ءَ سوب مند بنت۔ ہر گوریلہ جنگ ءِ بنیاد یک بنکی اصول ءُ راستیں رھبندے ءِ سرا ایر کنگ بیت کہ چر ایشی ءَ چہ لس مھلوک ءَ ھمے نشون رسیت کہ الم راستیں ءُ سوب مندیں آسرے در کئیت۔ بلے آسر کدی درکئیت، کجام وھد ءَ؟ ایشی ءِ وھد ءِ گیشینگ ارزانیں گپے نہ اِنت۔

انو کہ بلوچ راجی آجوئی ءِ جنگ منظمیں رنگے ءَ دیم ءَ جُنزان اِنت، ما الم گُشت کنیں کہ آجوئی مئے راج ءِ بھت ءَ گوں بندوک اِنت۔ بلے کدی؟ ما گُشت نہ کنیں۔


یک مردمی راستیں رنگے ءَ ھما وھد ءَ راج ءِ رھشونے ءَ کُت کنت کہ آ باصلاحیت بہ بیت۔ ماروک بہ بیت،( جاورانی ردا آئی ءِ تھا فیصلہ دیگ ءِ سِکت بہ بیت)، چیاکہ دَژمن ہر وھد ءَ  نوکیں توجیل ءُ حربہ ءِ سازگ ءِ جُھد ءَ کنت( پہ راجی جُنز ءِ پروش دیگ ءَ)، راجی جنگ پہ سلاھانی گیشی ءَ کَٹگ نہ بیت۔ بلکیں ایشی ءِ سوب مندیں آسرے ءِ سر کنگ ءِ ھاترا ، دُژمن ءِ حربہانی دیمگیری ءِ ھاترا راج رھشون ءَ سائنسی ءُ عملی بنیاداں توجیل سازگ لوٹیت۔ رھشون ءِ دیم ءَ بس کاز مقدس بہ بیت، راجے نپ آئی ءِ دیما بہ بنت۔ فیصلہ کنگ ءِ وھد ءَ آئی ءَ راجی سوبمندی ءِ نپ دیم ءَ بہ بنت۔ آ راجی ”کاز“ ءِ نپاں دیم ءَ بہ کنت ءُ وتی ہر فیصلہ ءَ بہ دَنت۔ آئی ءَ جیڑگ لوٹیت کہ ھمک گام ءِ چِست کنگ ءَ رَند راجی جُنز ءِ سرا کجام وڑیں اثر کپ اَنت۔(منفی یا مثبت)۔ راجی رھشون پہ راجی جُنز ءِ دیم ءَ برگ ءِ ھاترا ہرپئیمیں جاورانی دیم گیری ءِ ھاترا وت ءَ ساڑی بہ کنت ءُ راجی جَنز ءِ سوب مندی ءِ ھاترا المی اِنت کہ گوریلہ رھشون لس مھلوک ءِ گُما نزیک بئیگ ءِ جُھد ءَ بہ کنت۔ بزاں لس مھلوک ءِ پلہ مرزی ءَ وتی نیمگ ءَ تَرینگ ءِ جُہد ءَ بہ کنت۔ آ ئی ءِ جُھد ھمے بہ بیت کہ ڈنی مھلوک ءِ پلہ مرزی آئی ءَ گون بہ بیت۔



کبرال گُشیت 
”آ آشوب مُردگ اِنت کہ آئی ءَ ڈنی ءُ دری دوست مہ بیت“

دری مھلوک ءِ دیم ءَ ھمے گپ پدر کنگی اِنت کہ اے ڈیھ منئیگ اِنت، زوراک ءَ مئے ڈیھ ءِ سرا پہ زور قبضہ کُتگ ءُ مئے جنگ بس ڈیھ ءِ رکینگ ءِ جنگ اِنت۔

دُژمن راجی جُنز ءِ بدنام کنگ ءِ ھاترا راجی آجوئی ءِ جنگولاں دھشت گردی ءِ ”لیبل“ ءَ جنگ ءِ جُھد ءَ کنت، جنگول ءَ چہ ھمک چُشیں کرد ءَ وت ءَ دیر دارگی اِنت کہ آ عمل دْنیا ءِ دیم ءَ دھشت گردی ءِ درچ ءَ بئیت۔ 

ھمینچو آشوب ءِ جنگ ءِ تھا لیڈر ءِ کرد اِنت، ھمینچو لس مھلوک ءِ کرد بیئگ المی اِنت۔ چیاکہ ھچ وڑیں آشوب ابئید ءِ لس مھلوک ءِ پلہ مرزی ءَ سوب مندی ءِ سیمسراں سر بوت نہ کنت۔ چیاکہ جنگ تھنا کوھانی تھا دارگ نہ بیت، شھر ءُ میتگانی تھا آرگ ءُ سر کنگ لوٹیت۔ مرچی مردم بیت کنت کہ ھمے گپ ءَ جن انت کہ گوریلہ جنگ بس کوھانی تھا دارگ بیت، بلے ”گنی“ یک انچیں مُلکے کہ اودا کوہ نیست اَت۔ بلے کبرال گُشیت

”مئے کوہ مئے لَس مھلوک انت‘‘

ایشی ءِ مطلب اِش اِنت کہ لس مھلوک پہ وتی سرمچارانی ھاترا چو کوھانی وڑا پناہ گاہ بوتگ اَنت۔ بائد مئے سرمچارانی پناہ دیگ ءِ ھاترا ہر بلوچ ءِ گِس ءِ دروازگ پَچ بہ بیت۔ مستریں گپ ایش اِنت کہ ما وتی زالبولاں آجوئی ءِ جنگ ءِ ھاترا ذھنی حوالہ ءَ تیار بہ کنیں، آھاں سیاسی بنیادانی سرا تربیت بِدئیں۔ مئے زالبول بلوچ سیاست ءِ تھا بھر مند اَنت، ھمکوپگ اَنت۔ بلے مارا آھان ءَ چِد ءُ گیش ذھنی ءُ شعوری صورت ءَ تیار کنگی اِنت۔ گس گساں ھمے راجی شعور سر کنگی اِنت کہ علمی بنیاداں اے سنچ ءِ کمی ءِ مارشت بیئگ اِنت۔

پہ راجی آجوئی ءُ گُلزمین ءِ رکینگ ءِ ھاترا مارا منظمیں رنگے ءَ یکجاہ ءُ ھمکوپگ بیئگ ءُ کار کنگی اِنت۔ دھکانے بہ بیت یا پوریاگرے، مارا آئی ءِ پلہ مرزی ءِ ضرورت اِنت۔ دھکان، پوریاگر ءُ یا کجام ٹک ءَ چہ سیادی داروکیں مھلوکے بہ بیت۔ آئی ءِ ھم اے فرض جوڑ بیت کہ آ راجی جنز ءِ ھاترا وتی فرض ءَ پیلہ بہ کنت۔ انچو کہ شھید کمانڈر ڈاکٹر خالد ءِ گُشتن اِنت کہ 

”المی نہ اِنت کہ سرجمیں راج تُپنگ ءَ بَڈا بہ کنت، بلکیں ہرکس وتی وس ءُ واک ءَ اے جُنز ءِ تھا وتی بھر ءِ حق ءَ ادا بہ کنت“

انوں مئے بلوچی لبزانک ءِ تھا بازیں مردم وت ءَ چہ بلوچ سیاست ءَ دیر دارگ ءِ جُھد ءَ کنگ ءَ اَنت۔ ھمے گُشنت کہ ما بس لبزانک ءِ ھاترا کار کنیں، مارا گوں سیاست ءَ کار نیست۔ بلے آ اے گپ ءَ سرپد نیاں کہ وھدیکہ منی ماتیں زبان، منی ڈیھ ءُ راج بندیگ اِنت، تہ من کُجام زبان ءِ ھاترا کار کناں؟ یا کہ مارا تُرسیت کہ ما ھمے بھانہ ءَ کنیں، بلے بقول واجہ غلام محمد شھید

”بلاہ ءِ بیم ءَ چہ بلاہ ءِ لاپ۔۔۔۔۔۔۔۔۔۔۔۔
بیا اِت ما ءُ شُما وتی وس ءُ واک ءَ وتی راجی جُنز ءِ تھا وتی کرد ءَ پیلو کنیں۔

چمشانک بہ دئے