مرچی شست ءُ پنچ سال اِنت کہ پاکستان ءَ بلوچ راج پہ زور غلام داشتگ۔ بلوچ راج ءِ کُشت ءُ کوش برجاہ اِنت۔ بلوچ مات ءُ گُھار ھم چہ زالم ءِ زوراکی ءَ رک اِتگ اَنت۔ بلوچ ءِ ھمک لوگ ءُ گِدان ءَ آسے روک اِنت۔ بلوچ گُلزمین ءِ ھمک ھند ءُ دمگ بُنگیپتگ ءُ غم ءُ اندوھانی آماچ اِنت۔ بلوچ راج ایردست کنگ بوتگ ءُ بلوچ ءِ مال ءُ مڈیانی پُلگ ءُ برگ برجاہ اِنت۔ بلوچ گُلزمین ءَ چہ درآیوکیں گیس، سنگ مرمر ، تلاہ ءُ دگہ بازیں مال ءُ مڈیاں دُژمن پہ بے دردی دُزگ ءُ برگ اِنت۔
دُژمن ءَ بلوچ ءَ را اقلیت ءِ تھا آرگ ءُ بلوچ ءِ زِر ءُ گُلزمین ءِ سرا وتی قبضہ ءَ مُھکم کنگ ءَ توجیل ساز اِت۔ بلے دُژمن ءِ اے پندل بلوچ سرمچارانی یکشلیں اُرشاں بے سوب کُت اَنت۔ گوادر ءُ زرگوری ھنداں دُژمن ءِ سرجمیں پندل ناکام کُتاں۔ مرچی بلوچ ورناہ ءُ کماشانی قربانیانی بدولت ءَ راجی جنز ھمینکہ دیم ءَ اَتکگ کہ دژمن وتی شکست ءَ چماں ء وت گندگ اِنت۔ اے جاوراں دژمن مئے جھدکارانی کسانیں ردیاں ھم نپ چِست کنگ ءِ جُھد ءَ کنت ءُ ھمے چاریت کہ باریں بلوچ ءِ اندری تک چون اَنت ءُ بلوچ وت ماں وت چتور اَنت؟ دُژمن مئے وت ماں وتی جیڑہ ءُ پد گُشی ءَ کسانیں ردیاں چہ نپ چست کُت کنت۔ مرچی ریاست ھمے چارگ اِنت کہ آ بلوچ ءِ کسانیں نزوریاں چہ نپ چِست بہ کنت ءُ بلوچ راجی جنز ءِ پروش دیگ ءِ جھد ءَ بہ کنت۔ ریاست ءِ مستریں توجیل ھمیش اِنت کہ بھر ءُ بانگ بہ کنت ءُ مئے سرا وتی قبضہ ءَ برجاہ بِداریت۔
بلوچستان ءِ تھا ھما گل کہ آ آزادی ءِ گپ ءَ جن اَنت ءُ پہ راجی آزادی ءُ بلوچ راجی ننگ ءُ غیرت ءِ پھریزگ ءَ قربانی دیگ اَنت، آ ایش اَنت۔ بی۔این۔ایم، بی۔آر۔پی۔ بی۔این۔ایم (شھید غلام محمد)، بی۔ایس۔او (آزاد)، بی۔ آر۔ایس۔او، بی۔این۔وی ءُ بی۔آر۔سی۔۔۔۔۔۔۔۔۔۔۔۔ ھمے گل اَنت کہ ایشانی جھد پہ بلوچ راج ءُ بلوچ گُلزمین ءِ آجوئی ءِ ھاترا اِنت( عملی جھد بہ بیت کہ قلمی)۔
دومی نمیگ ءَ لس مھلوک ءِ تھا 99 درسد بلوچ آجوئی ءِ حق ءَ اِنت۔ بلے اے سرجمیں مھلوک کہ تنظیمی حوالہاں گوں ھچ گل ءَ بندوک نہ اَنت( بلے آزادی ءِ واھگداراں) بلے منظم نہ اَنت ءُ او اے گلانی منظمیں رنگے ءَ چوشیں مُچی ئے گندگ ءَ نئیت کہ اے مھلوک ءَ ڈائرکشن دات بہ کنت۔ یک نیمگے بی۔این۔ایم ءِ تھی جیڑہ، یکے دومی ءَ بھتام بندگ، یکے دومی ءَ گنگ وار ءُ رد انقلابی گُشگ، دومی نیمگ ءَ بی۔این۔ایم (شھید غلام محمد) مرکزی باسکان ءَ کرپٹ، زر وار ءُ دروگ بند گُشگ ہرروچئیں دودے جوڑ بوتگ۔ اے انچیں گپ ءُ بھتام بیتگ اَنت کہ چر ایشاں سنگتانی تھا دوری گیشتر ود اِتگ۔ دومی نیمگ ءَ ھمے گپ ءُ ھالانی سوب ءَ بی۔آر۔پی چہ فرنٹ ءَ گِستا بوت۔ دگہ کسانیں گل ھم چہ فرنٹ ءَ دز کش بوتگ اَنت۔ ہرکس گِستا ءُ وتی پارٹی ءُ الائنساں گوں وتی جھد ءَ گلائیش اِنت۔ یک شکل ءَ فرنٹ ھم موجود اِنت۔ یک چار جماعتی اتحادے۔۔۔۔۔۔۔۔۔۔۔۔۔۔۔۔بلے ھمے چار جماعتی ءُ سئے جماعتی کہ پیش ءَ بی۔این۔ایف ءِ بھر بیتگ اَنت۔ اگاں ایشاں بی۔این۔ایف ءِ فلیٹ فارم ءَ یکمُشتی وتی جھد دیم ءَ بُرتیں گُڑا جوانیں سوبمندی رستگ اَت۔
او چار جماعتی گروپ کہ آغا اشرف ءِ سروکے ءَ ٹھینگ بوتگ۔ آغا اشرف ءَ بی۔این۔ایم ءِ جیڑھانی ٹھینگ ءَ باز جھد کتگ اَت۔ او جھد کُتگ اَت کہ خلیل بلوچ ءُ عصا ظفر یکجاہ بہ نِند اَنت ءُ پہ گپ ءُ تران جیڑھاں بہ گیشین اَنت۔ بلے چوش نہ بوت۔
ھما وھد ءَ آغا اشرف بی۔این۔ایم ءِ کونسل سیشن ءَ سی سی ممبر نامینگ بوتگ اَت۔ لھتے وھد ءَ رند فکری کونسلے ٹھینگ بوت اَت کہ چار جماعتی اتحاد ءِ بار اِنت۔
مرچی بلوچ ورناہ ءُ شھیدانی رِتکگیں ھونانی بدولت ءَ بلوچ راجی جُھد ءِ توار دْنیا ءَ سر بوتگ۔ بازیں بلوچ ورناہ ءُ کماش پہ راجی جھد آجوئی ءِ ھاترا، گُلزمین ءِ ننگ ءُ شرپ ءِ پھازگ ءَ ماں ٹارسیلانی تھا سکی ءُ سوری برادشت کنگ ءَ اَنت۔ چہ ھمک آزادی لوٹوکیں گل ءَ سیادی داروکیں سنگت ءُ ورناہ شھید کنگ ءُ آوار جنگ بوتگ اَنت۔ چوشیں جاورانی تھا ھم مئے سنگت ءُ بیلی وت ءَ چہ وت ماں وتی جیڑھاں در کش اِت نہ کناں۔ کسانیں جیڑھانی تھا مان گیش اِتگ اَنت۔ شھید غلام محمد ءِ شھادت ءَ پد بی۔این۔ایم بھر بوت۔ فرنٹ وتی پیشیگیں شکل ءَ پشت نہ کپت۔ ایشی ءِ سوب چی اِنت؟ مئے تھا لیڈر شپ نیست یا پلاننگ؟؟؟ اگاں لیڈرشپ ءُ پلاننگ ھست اَنت، تہ پرچا بلوچ راجی جنز مشکلانی دیمپان بوان اِنت ءُ سنگت درگان درگان اَنت۔۔
مرچی اگاں دُژمن ریاست ءَ پروش وارتگ، بلے ساھے مان اِنت۔ دُژمن ریاست ءِ مستریں شکست بلوچ آجوئی لوٹوکیں گلانی یکجاہ ءُ یک مُشتی اِنت۔ بلے مرچی بس بی۔ایس۔او آزاد اِنت کہ چہ پُرشت ءُ پروش ءَ رک اِتگ ءُ منظمیں رنگے ءَ وتی جھد ءَ دیم ءَ بران اِنت۔ بائد ھما گل کہ وت ءَ راجی گل گُشنت ، آ چہ بی۔ایس۔او آزاد ءَ سبق بہ زور اَنت کہ مشکلیں جاورھالانی دیم ءَ چون اوشتگ بیت ءُ جنجالانی دیمپانی چون بیت کنت۔ بی۔ایس۔او آزاد ءِ سنگتانی ھم اے فرض جوڑ بیت کہ آ اے دگہ آزادی جنز ءَ ھواریں گلانی یکجاھی ءِ ھاترا وتی جھد ءَ بہ کن اَنت۔ چیاکہ وھد ءِ لوٹ یکجاھی اِنت۔
