Facebook
RSS

کامریڈ فراز مئے دلاں زندگ اِنت ' اَچ حکیم واڈیلہ

-
بام ھال

اے گلزمین بلوچستان ، بلوچانی دیار کہ 64 سال اِنت غلامی ءِ زمزیلاں بستگ ھمیں 64 سالانی تہ ءَ مدام بلوچ ، آجوئی ءِ جھد ءَ گوں وتی باسکانی زور ءَ دیم ءَ کنزینان بوتگ ، اے کاروان ءِ تہ ءَ باز اَتکگ کہ وتی وس ءُ واک ءَ پہ ماتیں دیار ءَ جھد کرتگ اِش ، اے  جھد ءِ تہ ءَ بلوچ چاگرد ءِ ھمک وڑیں مردماں وتی بھر گون کرتگ ۔

اے ھما وھد اَت کہ من نوک بلوچستان ءَ زانگ ءَ اِت آں گڑا ھمے نوبتاں یک روچے گولیمار ءَ یک راجی مچی یے  ءَ شت آں ھمے اولی بر اَت کہ من نامے اِش کرت کہ '' من کامریڈ فراز ءَ دست بندی کن آن کہ بئے اِت تلو ءِ سر ءَ وتی ھیالاں دْرشان بہ کنت '' گڑا ھمد ءَ اولی بر ءَ من دیست یک مردے کہ چشمک ئِے چم ءَ اِت ئِے ءُ سر ءِ مود ئِے اسپیت ءُ گپ کنگ ءَ جذباتی اَت ۔ ۔ ۔ گپ بلے سادہ ءُ تچکیں گپ اِت اَنت کہ ھمک مردم پہ آسانی سرپد بہ بیت ۔

انچوش وھد ءُ حالات دیم ءَ شت اَنت کار ھم ودان بیت ، وتی سر ءَ بار اَتک کہ اُگدہ ھم گون اَت گڑا ھمے وھد ءَ  مدام بی این ایم ءِ نیاداں کہ کراچی ءَ بوتگ اَنت بھر زرتگ ۔ ۔ گڑا ھمود ءَ زانگ بوت  مرد کہ  کامریڈ فراز [ فرھاد ] گْوشگ بیت بی این ایم کراچی ءِ کْوھنیں سنگتاں یکے ۔ ۔۔ اے واھد ءَ واجہ فرھاد ما باز نزیک ءَ نہ زانتگ بلے دوھزار دہ ءَ کہ بی این ایم کراچی ءِ دمگ ٹھ اِت گڑا واجہ فراز ءَ گوں من نزیکتر بوت آں ۔  آ دمگ ءِ کارگشاد اَت ءُ من کمک کارگشاد ۔ من واجہ باز براں ڈیک داتگ بلے یک روچے کہ آئی ءِ دکان ءَ من ءُ بی این ایم کراچی ءِ کارمستر شت اِیں ۔ ھما روچی فراز بلوچ ءَ مارا باز سکین دات ءُ پیش ھم داشت کہ من چوں یک پلان ئِے ٹھینتگ کہ بی این ایم کراچی ءَ وتی ھمک بنزہ ءَ ، ھنکین ءُ دمگ ءَ یک جْوانیں وڑے ءَ دیم ءَ بر اِیں ۔ واجہ ءَ مارا لھتیں سبجیکٹ دات کہ اسٹیڈی سرکل بہ کن اِت ، ایشانی سر ءَ ھنکین ءُ بنزہ ءِ اُگدہ دارانی ذھن سازی بہ کن اِت ۔ بلے انچوش وھد ءُ بھت مئے ھمراہ نہ اَت واجہ ءَ چیزیں نگیگیں جاورانی سبب ءَ کراچی یلو کرت ءُ شت بل نگور ءَ نشت ، انچوش کہ من اِش کرتگ ۔ 
پدا جاور کار ءِ وڑ ءَ نہ اِت اَنت کہ پارٹی ءِ اندر ءَ ھمینچک جیڑہ اِت اَنت کہ سنگتاں یک دومی ءِ سر ءَ باور ھم یلو دات ۔
کامریڈ فراز کہ اسٹیج ءِ سر ءَ اُوشتاتگ ءُ پاکستان ءَ بیھار ئِے داتگ گڑا ھمے اسٹیج ءِ سر ءِ گپ ھم گوں جھد ءَ سرجم کنگ ءِ جھد کرتگ ۔ ۔ ۔۔۔ ۔ ۔

25 اگست2012 ھما روچ اِنت کہ کامریڈ فراز اگاں فرھاد بلوچ ءَ اے دو روچی ئیں جھان یلہ  دات ءُ مدامی دنیا ءَ شت  ۔ ۔۔۔ کامریڈ تو زندگ ئے ۔    

چمشانک بہ دئے