اے نمدی یا شرگدار چَہ انٹرنیٹ ءَ مئے نوشتہ کارے ءِ سر ءَ دیم دئیگ بوتگ ، بئے ھمیش اَت کہ نمدی دیم دئیوک ءَ وتی نام ھم ڈس اِت اِنت بلے نہ زان آں چی نیمون ءَ آئی ءَ وتی نام پنھان کرتگ بلے چَہ ایشی ءَ ھما ھیال ءَ کہ پیش کنگ لوٹ اِیت مٹ نہ بوتگ ۔ چوناھیا ادارہ وتی ھمکاریں دگہ ادارہ یا تاکانی درگت ءَ ایراد گری نوشتانک چاپگ ءَ باز چارءُ بہ چار کن اَنت ءُ گیشتر اے رنگیں نکاناں شنگ نہ کن اَنت بلے اے نمدی ءِ بنگپ کمے تالان اِنت ءُ نہ ایوک نام گیپتگیں ادارھانی سر ءَ اِنت بلکیں بلوچی زبان ءِ تہ ءَ بیوکیں شرگداری یا نگدی روش ھم ایراد کنگ بوتگ ، المی نہ اِنت کہ بام ھال گوں اے نکان ءَ سرجمی ءَ تپاک بہ کنت بلے بازیں نکتہ جیڑگ کرز اَنت۔ شونکار
منی پُل ءُ سوگاتیں برات ءُ بلوچی زبان ءُ لبزانک ءِ دوزواہ ءُ منی ھمگامیں دوستاں
دروت ءُ درھبات اِت
نمدی ءِ بنگیج ءَ گوں اردو زبان ءِ شاعر ناصر کاضمی ءِ اے شعر ءَ کن آں کہ
آرزو ہے کہ مرا قصہِ شوق
آج میرے سوا کہے کوئی
بزاں گوشگ ءِ مول ءُ مراد ھمیش اِنت یا بہ گوش منی واھگ کہ باریں منی اے چاریں دانک شُمئے تاکانی براہ بیت کن اَنت یا چو ھما منی پیشی بلوچی کتاب ءُ ھالتاکانی سرا دیم داتگیں نبشتہ ءُ نمدیاں گواتانی میار بنت ءُ اے واھگ پہ مدامی گُٹگیر بنت ءُ وانوکاں سر نہ بنت، اے نوں شمئے نیکیں نیت ءُ تب ءَ گوں کار دار اِیت کہ باریں رسانکی آجوئی ءِ پاسداری ءَ داں چینکس کن اِت ءُ اے کلوھاں، یا من ھمے گُشاں کہ واھگ (قصہ شوق) ءَ پہ وانوکاں سر کن اِت۔۔۔۔۔۔۔۔۔۔۔۔۔۔۔۔۔۔۔۔۔۔اگاں چو بوت تہ بزاں چہ منی نیمگ ءَ شُما ھمے واھگ وانوکاں سر کرُتگ۔۔۔ اگاں یک رندی پدا ریا ءُ رو ءُ ذاتی پسند ءُ نا پسند ءِ گپ دیم ءَ اَتک تہ بزاں منی داشتگیں واھگ گُٹگیر ءُ رسانکی آزادی ءِ کوکار ءُ جگاہ بس پہ نام۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بلے منی واھگ اِنت۔ من ھمے اوست ءَ ھم دارآں کہ اے چاریں دانک پہ راج ءَ سر بنت۔۔۔۔۔۔۔
ادا من یک گپے گشینگ لوٹ آں کہ ھرکس ءَ وتی گپ ءِ یا وتی ھیالانی درشان کنگ ءِ حق است اِنت۔ کجام وڑیں سرھال ءَ ھرکس ءَ وتی ذاتی رائے دیگ ءِ حق است اِنت۔۔۔ تنقید ادبی بہ بیت یا سیاسی ، زند ءِ ارواہ اِنت ءُ چاگردی زند ءِ آدینک اِنت کہ ھرکس ءَ ھمائی ءِ جند ءِ عکس ءَ پیش داراِیت۔۔۔ البت ھرکس ءَ ھمے آدینک ءِ تہ ءَ وتی عکس وت درگیجگی اِنت کہ چینکس سیاہ ءُ تامور ءُ چینکس رُژنا اِنت۔۔۔ اے کار نگدکار ءِ نہ اِنت۔۔۔ نگدکار بس آدینک ءَ پیش داراِیت۔۔۔۔۔۔۔۔۔۔۔۔۔
او لھتیں ادبی ءُ اخلاقی اصول بنت۔ آ رھبند ءُ اصول سرگوز کنگی نہ اَنت ۔ انسانی یا راجی زند ءِ اقدار ءُ اصول پروشگی نہ اَنت۔۔۔ نگد ءِ وھد ءَ ھچ کسی ذاتی یا گِس ءِ شان ءُ شرپ لگتمال کنگی نہ اِنت۔۔۔۔ چو ھما پاکستانی رستریں لشکر ءَ ادبی ‘‘چادر ءُ چار دیواری‘‘ءِ شرپ سرگوز کنگی نہ اِنت۔۔۔۔۔۔۔
شونکار ءِ ھم لھتیں فرض بنت۔۔۔ آ چُشیں سیاھگاں شنگ ءُ تالان مہ کنت کہ آ راجی زند ءِ اقدار ءُ کیلوانی پروش دیگ ءِ سوب بہ بنت۔۔ یکے ءِ ذات ءِ ایرموش کنگ ءِ بابت ءَ بہ کنت۔۔۔بلے مئے بدبھتی ھمیش اِنت کہ ادءَ کس وتی کار ءَ پہ دلجمی کنگ ءَ نہ اِنت۔۔۔ کس وتی فرض ءَ پیلہ کنگ ءَ نہ اِنت۔۔۔ ادءَ بس زانت ءُ زانگ ءِ سوداگر پشت کپتگ اَنت،،بلے زانتکار گواہ نہ کنت۔۔۔۔
واجہاں: من سک باز وھد بیت کہ شمئے تاکاں وانگ ءَ آں۔ بلوچ ءِ سرجمیں جیڑھاں ھم سرپدآں کہ کئے کئی ھلاپ ءَ نبشتہ کنگ ءَ اِنت ءُ پرچا نبشتہ کنگ ءَ اِنت۔۔۔۔۔ گیشیں نبشتانک کہ شما ایشاں نگد کاری ءِ نام ءَ دئے یا دگہ ۔۔۔۔۔ بلے منی نظر ءَ اے سرجم ذاتی کینگ ءُ پسند ءُ ناپسند ءِ سرءَ نبشتہ کنگ بنت۔۔۔۔۔۔۔۔۔۔۔توار بلوچی ءُ سچکان یا مستاگ ءَ کہ ھما نبشتہ کہ شنگ بوتگ اَنت۔۔ اے نبشتانکانی تہ ءَ ادبی نگد ءِ ھچ وڑیں رنگ ءُ دروشم نیست۔ بس ذاتی ناپسند ءُ ذاتی کینگ ءِ بنیاد ءَ نبشتہ کنگ بوتگ اَنت۔۔۔۔۔
واجھاں: من گوں بلوچی زبان ءِ پُل ءُ سوغاتیں نبشتہ کاراں گُوشگ لوٹ آں کہ مروچی سرھال باز اَنت۔ سرجمیں بلوچستان سرھالے جوڑ بوتگ۔ ھر نیمگ ءَ بلوچ برات ءُ ورناھانی لاش کپگ ءَ اَنت۔۔۔۔۔۔۔۔۔ ھونانی ھار مل اِتگ ۔بلے من نہ زان آں اے بلوچ راج ءِ زانتکاری ءِ دعواگراں چون اِنت وت ماں وت ءَ گُٹ ءُ نیش اَنت۔۔۔ یکے گْوش اِیت پلانی زال ءَ جتگ ءُ دومی گْوش اِیت آدگہ کجام کم ذات ءِ نماسگ اِنت۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
من ماھتاک ‘‘سچکان‘‘ ءِ سرشونکار ءَ ھم ھمے گپ ءَ گشگ لوٹ آں ءُ ھمے واھگ ءَ دارآں کہ آ دیم ءَ چُشیں نبشتانک شنگ نہ کن اَنت کہ آ بلوچی زبان ءِ شاعر واجہ بشیر بیدار ءِ بابت ءَ بہ بنت۔۔۔ کجام وڑیں نبشتانکے بیدار ءِ وڑیں مزنیں نامی ئیں شاعرے ءِ بابت ءَ نبشتہ کنگ بیت تہ مارا یکبرے ھمے گپ چارگی اِنت کہ باریں ھما مرد کہ نبشتہ کنگ ءَ اِنت، آیا آئی ءَ گوں بیدار ءَ ذاتی کینگ نیست؟۔۔۔ او واجھاں اے گپ ھم چارگی اِنت کہ ھر یکے پاد کئیت ءُ نبشتہ کنت کہ پلاں غدارے، یا پلاں آئی۔ایس۔آئی ءِ مردم اِنت۔ چیاکہ پلاں مئے پلاں لیڈر ءَ نہ من ایت۔ منی واجہ المی نہ اِنت کہ من سیاسی صورت ءَ ھما لیڈر ءِ پلہ مرزآں تو مرئے کہ زندگ بئے، لازم ھمائی ءَ بہ مَن۔۔۔ اگاں ناں تو غدارے ئے۔۔ من ءَ ماھتاک ‘‘سچکان‘‘ ءِ یا توار بلوچی ءِ شونکار اے گپ ءَ بہ گْوش اَنت ۔ منی ھمے سوال ءِ پسہ ءَ بہ دئے اَنت کہ آیا شمئے گورءَ روچ ء مروچی انچیں آرٹیکل انچیں مردمانی نام ءَ موجود نہ اَنت کہ شمارا ھما مردمانی جِند ءَ دست ءَ داتگ اَنت ءُ آ بی۔این۔ایم ءِ ساریگیںِ راھشون واجہ غلام محمد ءِ ھلاپ ءَ نبشتہ کنگ بوتگ اَنت کہ شما شنگ نہ کرُتگ اَنت پرچا کہ شمارا موہ نہ رستگ ءُ واجہ پیسرءَ شھید بوتگ۔۔ اگاں ناں شما بلکیں ھم شنگ کنگ ءَ چک ءُ پد نہ بوتگ اِت ئے۔۔۔۔۔۔۔۔۔۔۔۔۔۔
من چہ بلوچی زبان ءُ نبشتہ کار ءُ کواساں ھمے امیت ءَ دارآں کہ آ وتی بنکی فرض ءَ زان اَنت۔ بائدیں ما وت ماں وتی جیڑہ ءُ جنجالاں دربیا اِیں، ھما سرھالانی سرءَ نبشتہ بہ کن اِیں ءُ راج ءَ ھمے زانت ءُ سرپدی دئیگ ءِ جھد ءَ بہ کن اِیں آ کجام سوب اَنت کہ ما غلام اِنت۔ مئے تہ ءَ اے ابہام ءُ کنفیوژن ءِ سوب چی اِنت کہ ما وتی اصل دژمن بیھال کرتگ ءُ بس بشیر بیدار یا دگراں وتی ازلی دُژمن لیک اِیں۔۔۔ داں کہ مئے اصل دُژمن ءَ وَ ھرکس ءُ ناکس زانت ءُ سرپد اِنت کہ پاکستان ءِ فوج ءُ ایجنسی اَنت ۔۔۔۔اگاں ما پاکستان ءِ فوج ءِ دست ءَ وتا آجو بہ کن اِیں تہ بیدار ھم مارا غلام داشت نہ کنت۔۔۔
چَہ ایشی ءَ ابید کسے اگاں نبشتہ کنگ لوٹ اِیت ءُ دگرانی دیم ءَ وت ءَ دانا ءُ زانتکارے منائینگ لوٹیت تہ سرھال دگہ باز اِنت۔ ادبی ءُ سیاسی سرھال خدا ءِ نام اِنت۔ سماج ءُ زند ءِ درگت ءَ انچیں سرھال ءُ ٹاپک ھست کہ دنیگت آ سرھالانی سرءَ نبشتہ کنگ نہ بوتگ۔ بائد کسے ءَ اگاں گوں بلوچی زبانءَ دوستی ھست۔ آ ھمے سرھالاں گچین بہ کنت ءُ نبشتہ بہ کنت۔ ناں کہ بیست ءُ چار ساھت بہ نند اِیت کہ پلانی ھراب اِنت۔۔۔ یا پلاں پمیشکا شر نہ اِنت ءُ غدارے کہ پلانی رھشون ءَ نہ مَن ایت۔۔ چوشیں علم ءُ عقل ءِ سرءَ من ءَ کَندگ ھم کئیت ءُ گریوگ ھم۔۔۔۔۔۔۔۔۔۔۔۔۔
یک رندے پدا ھمے گپ ءَ جن آں کہ من دلجم نہ آں کہ منی اے چاریں دانک وانوکاں سر بنت یا گواتانی میار بنت۔۔شما بیت کنت کہ پہ ھمے ھاترءَ اے چاریں بے سریں دانکاں شنگ مہ کن ئے کہ شُمئے ھما واجہ ناراض بنت کہ آھانی نبشتانک کوڈ نام ءُ وتی اصل ناماں شمئے تاکاں شنگ بنت۔۔۔او من اے گپ ءَ ھم دل ءَ جزم آں کہ منی اے چاریں دانکاں ھمے ادیب ءُ واجہ کار سک بد بَر اَنت ءُ من ءَ بے ادبی ءِ نام ءَ بنداَنت ءُ گْوش اَنت،، برؤ تو نو مزنیں سوجکاری اَتکگ ئے۔۔۔۔ اے ھم بیت کنت کہ شما پمیشکا اے دانکانی شنگ کنگ ءَ چک پد بئے کہ شمئے ھمے ادیب وش نہ بنت کہ درملک ءَ نشتگ اَنت ۔۔۔۔ بلے من یک گپے زان آں کہ اے گپ سوشل سائٹاں شنگ بنت ءُ وانوکاں سر بنت۔۔۔۔
شُمئے کستر: گوھر بلوچ
gohar baloch
tai dorahen gap shar ant o mn tepaak kana gu tho.
bale ikthlaap kanoka gaddar goshag bi
prcha k baloch sysat taha nu insan johd kanaga nayanth k to ishani policy sra ikthelaap koth bekany.
nu pegamber joD bithaga o pegamber archi gusheet ya k kanth ha radhh kanagi nahe