Facebook
RSS

پٹھان ! ’ برات ناں ھمبند ‘

-
قاضی داد محمد ریحان

 ھدا دو سوب پیگمبراں ھم نہ دنت ‘ ھما وھدی گوشگ بیت کہ کسے دوسری سوتے لوٹوک بہ بیت ،گوں لنکوک ءَ دپ جنگ ءَ آریک ئِے پہ دست ءِ دپ ءَ کنگ ءَ پراہ بہ رو اَنت ۔رنگ چَہ وتی ھمساھگیں نیم آریاھاں بورل ءُ سھرگتر ، برز ءُ تمردپوریات ءُ زور ءَ چَہ دنیا ءِ راجاں باج بروک ’ پٹھان ‘ اگاں چَہ بود ءَ ھم سیر بوتین اَنت گڑا الم ماں دنیا ءَ بادشاھی اِش کرتگ اَت۔ بلوچانی ستک اِنت کوھنیں بتل ءُ پیرینانی داتگیں درور بِھ دروگ نہ بنت ،پمیشکا ھم یک راستیں ھبرے کہ بتل ءُ درور انسانی سرگوست ءُ کتہ کاریانی برورد اَنت ءُ پدا یکیں بلوچ نہ اِنت کش گورے درسیں ھمساھگ پٹھانی بالاد ماڑ ی ءِ برز ءِ ’ تبک ‘ ءِ بیدی ءِ گواھی ءَ دئے اَنت ۔بلوچ وَ ابرمی مڑاھدار ءُ گوں وت سر ءُ کاریں راجے ، زمانگ ءِ جنتر ءَ درشگ ءَ پد وڑوڑیں رنگ ءُ ھنرے دربرتگ بلے دنیگت چَہ وتی گرینک ءَ نہ سستگ کم آپی ءِ ارجان اِنت بلے پھک ءَ بے آپ ھم نہ اِنت پمیشکا پٹھانانی چَہ دپتری کرد گاراں ھم وتساچیں شری درچنت ءُ بیان کنت چَہ ایشی ءَ دگراں ھمے ردمنی بوتگ کہ پٹھان ءُ بلوچانی دود ءُ روش ءِ تہ ءَ ھم چھرگی ھست ۔دپتری گواچن اِنت کہ اوگانستان ءِ بادشاھاں چَہ ھمدا ءَ ھاٹیگ زرتگ ءُ سرجمیں جھان ءَ بادشاھی کرتگ بلے ’ پٹھان ‘ روچ مروچی آجو نہ بوتگ اَنت چَہ اوگانستان ءَ سیادی داروکیں جھانگیرچَہ پٹھاناں نہ بوتگ اَنت ۔ یک پٹھانیں نوشتہ کارے ءَ وت من اِتگ کہ ’ پٹھان ھما اَپس ءِ پیم ءَ اِنت کہ جمار ( قیامت ) ءَ وتی زور ءِ کساس ءَ زانت آ وھدی اے بژن ئِے درد نہ وارت کہ اینچک زور ءَ پُر بوگ ءَ پد ھم توامیں زندمان ئِے دگرانی چابک ءُ ھکل ءِ سر ءَ گوستگ ۔‘ بلوچاں گلو اِنت کہ پٹھان چَہ بلوچانی چک چینی ءَ نگٹ ءُ بے توار اَنت بِل ایشی ءَ انگت چَہ پنجاپ ءَ اے بے تواری ءِمزءِ ھم لوٹوک اَنت ۔پنجاپی چَہ بلوچ جھد ءِ نوک شور زرتگیں باریگ ءِ بندات ءَ ھمے جھد ءَ اَنت کہ بلوچ چَہ مادنیں کشک ءَ گسر کنگ ءُ پٹھان ءَ گوں اَڑینگ بہ بنت بلے اجکھی ھبر اِیش اِنت کہ بلوچ رنگیں جنگول ءُ بیرگریں راج ھم گوں مزنیں اُوپارے ءَ سگگ ءَ اِنت ، پیش ءَ کنٹین ءَ کوپے چاہ ءُ ھاسٹل ءَ اوتاگ نہ رسگ ءِ سر ءَ جنگ ءُ چوپ کنوکیں بی ایس او ھم پٹھان راھشونانی بدتمیزی ءُ کنتیاں کمار کنگ ءَ نہ اَنت ۔ مرشد گوشگ اِیت ھمے آشوب اِنت من جست کرت کہ من ءَ وَ بالادی بلوچستان ءِ درسیں سردار ’ پٹھان تب ‘ سما دئے اَنت مئے تیابیانی پیم ءَ اوپارکشوک نہ اَنت بلکیں گپ گپ ءِ سر ءَ کارچ ءُ کاٹا ر کش اَنت اے رندی شاباش دیگ لوٹ اَنت ، درائینت ئِے ’ ناں وش بھتی اِیش اِنت ’’ اے رندی درسیں ’ پٹھان تبیں سردارانی ‘دپ ماں سرکار ءِ کاسگ ءَ سک اَنت ‘۔‘ بھت ءِ سر ءَ ستک نہ کنت بلے نوں بگنداِت بے ستکی داں دیر مہ مان اِیت ، ابید چَہ وش بھتی ءَ چی بوت کنت کہ بلوچ زرمبش ءِ پیشوک ءُ سروک ھما سردار اَنت کہ چَہ پٹھانی روش ءَ شزار ءُ دلریش اَنت۔ پٹھان راھشونے ءِ بٹاک دیوک دز ءُ ’ چُک بود اں ‘ جیمڑی ءَ گر داں کراچی ءَ پٹھانانی تاچینگ ءِ مھکمیں اِرادگ بستگ ۔ چَہ داناگے ءَ جست کنگ بوت ’ بودناکی ‘ چَہ کجا دربرتگ ، سسا بدل کنوکیں پسو ئِے دات ’ چَہ کم بوداں ‘ مئے بودناکی ءِ سبب ھم بہ گندے ھمے بہ بیت ۔دگہ منی وَ چماں دیستگ ءُ گوشاں اِش کرتگ نامے زانتکاراں راجدوستانی دیوان ءَ نشتگءُ پہ پٹھاناں کینگ ءُ کنت ودی کنوکیں ھبر تالان کرتگ ۔ جی بات مرشد ءِ سرمتابی ءَ ’ راست اِنت مئے ترس ءَ زمین لر زاِیت ۔ مئے بیمءَ کلات جکس اَنت ‘ بلے مھتل ! وللہ من ءَ ماں جھان ءَ چَہ بلوچ ءَ گیش گوں کس ءَ مِھر نیست ، اناں گوں سندھیاں ھم ناں کہ آھاں مارا چوش ’ سسی ‘ مِھر میچینتگ ءُ سندھ گونگیں ’ دھرتی ماں ‘ گالین ءَ پہ ما چیر گیپت ، بے بھائیں گالین ءِ سر ءَ ھم ’ کٹ ‘ ایر کرت مارا ھمود ءَ نادینت ءُ پدا مئے پادین ءَ نشت ، دست بست ءُ مارا ’ سائیں ‘ گوشتگ ، مئے ’ من تو بودم تو من ‘ ءِ اے ارواہ ءُ کیماوی سپر ءِ سر ءَ نوشتہ بیوکیں مِھتراب (صحیفہ )’ شاہ جو رسالو ‘ ءِ سوگند بِھ ناں ، مئے ھزار سال ءِ وپاھاں یکمشتءَ نگد بھا زوروک ءُ پدا مارا ’ داد ‘ دیوکیں ’ سندھی راج ‘ ءِ ستک ءُتنگوھیں مِھرانی سوگند منی بے وپا ئیں دل ءَ سندھ ھم دیم ءَ تر نہ اِنت گڑا پٹھان پہ من چون میر ءِ شنک اِنت ؟ کہ من ءَ ابید چَہ چرس ، تریاک ،ھیرون ءُ بے ایمنی ءَ دگہ ھچ ئِے نہ داتگ ۔ بلے سنگت ! بلوچ زاناں ھالی وڈ فلم ءِ کارست ’ ھلک ‘ اِنت کہ گوں یکیں مشت ءَ سرجمیں دنیا ءَ سر ءُ چیر بہ کنت ۔مئے آشوبی راھشوناں! ما شما را سندھی ، سرائیکی ، ھزاروال ءُ گلگتی ءَ گوں ’ مِھری داستان ‘ بنا کنگ ءِ سوج دیگ ءِ مزنمری ءَ کرت نہ کن اِیں پرچا کہ شمئے عقل چَہ ما زنڈ تر اِنت ۔بیشک ! ما ’ چاکر ءِ اولاد ‘ ءُ ’ گوھرام ءِ دلبند ‘ اِیں بلے ’ ھلک ‘ نہ اِیں ما گوں یکیں دست ءَ یک وھد ے ءَ ایوک یک کارے کرت کن اِیں ۔ اے ھم راستی یے کہ چَہ مئے دنیگت شوھاز بوتگیں دپتر ءَ ھمے زانگی دنت کہ ماراپریں پنچ ھزار سال اِنت برے گوں یکے ءَ جنگ دیان ءُ پیداک اِنت بلے چَہ اے جنگ ءَ پد لھتیں سد سال وَ گوں ایمنی ءَ گوازینگ لوٹ اِیں ، چَہ وتی لوگ ءَ لڈگ مئے واک ءَ اِنت بلے ھمساھگ ءِ بدل کنگ مئے وس ءَ نہ اِنت ۔پدا مرشد ءَ وتی شھید مرشد ءِ ھبرے یات اَتک ’ گوں پٹھاناں مئے جیڑہ ’ جنگی ‘ نہ اَنت ’ گیشواری ‘ اَنت بزاں اے دژمنی اَڑ نہ اَنت سنگتی نہ سیلی اَنت ‘ کماشاںھبرانی سر ءَ ستک کنگ اگاں بلوچی روال اِنت گڑا چر اے ھبر ءَ سرتابی پرچا؟اے درگت ءَ بابامری ءِ ھم دُرگوشتن راھشونی کنت ’’ براتیں راج نامیں سیادی بے بنیں گپے گوں بلوچاں اوگانستان ءِ ھچ راج ءَ براتی نہ کرتگ اد ءَ ھرکس پہ پلمالی اَتکگ ءُ بلوچ وتی غلام جوڑ کنگ لوٹ اِتگ ۔اگاں سیادی یے ھست گڑا ’ ھمساھگی ‘ اِنت ’ ھمبندی ‘ اِنت ‘ ‘ اے ھمبندی ءِ سیادی ءَ اگاں ما بہ لوٹ اِیں ھم سست نہ کن اِیں ۔ اگاں پٹھان انوں اے ایشی ءَ سرپد نہ بوگ ءَ اِنت کہ’ جنگی ‘ جیڑہ چی اَنت ءُ ’ گیشواری ‘ چی ،سنگتی نہ سیلی ءِ گوں دژمنی کینگ ءَ بدل کنگ ءِ گیشتر تاوان پٹھان ءَ بیت بلے بلوچ بالاد ءِ برز ءِ تبک ءَ ھمینچک گنجائش منتگ کہ جم ءُ مِنھا ( جمع نفی )ءِ آسانیں ھساب ءَ کشت بہ کنت ۔ بلے آکوھی بلوچے نہ اِنت کہ تلاریں دل ئِے’ تیابی‘( مکرانی ) ءِ گپاں موم بہ بیت ، تلار ءَ وَ ھزار سال ءِ رگبار گواریں ھورے بہ تراش اِیت۔کوھی ءِ برز ءِ تبک ھم ھمینچک رژنااِنت کہ تیابی ءِ بلے تیابی گیشتر سیر لاپ ءُ پر تاھیر اِنت ۔تیابی ھم کچ کوھی ءَ ھذمت کنوک ءُ پوریاتگراِنت بلے انچیں تبے داراِیت کہ پہ جیڑگ ءُ گپ ءَ وھد کش اِیت ۔ ماھیگ وارت پمیشکا روش ءِ تہ ءَ ماھیگ ءِ دل پھکی ءَ ھم جاہ کرتگ ایوک وتی کتہ کاری ءُ چمگندانی سر ءَ باور نہ کنت بلکیں دنیاگولانی ھبر ئِے ھم باوراَنت بلے کوھی ایوک چَہ وتی کتہ کاریاں دربارت ۔ کوھی جنگ ءَ مزار ، تیابی ماں دپ ءَ تیار تر اِنت ، یکے زھم جن ءُ دومی ندکار _______اے ھما بلوچ چاگرد اِنت کہ اد ءَ چَہ آس ءُ آپ ءَ یکیں کار گرگ بیت ، اے منی زھم ءُ ند ءِ سنگتیں بلوچستان اِنت ۔نوں پٹھانانی ھچ ’چُک بود‘ بلوچاں شورینت نہ کنت ۔ مروچیگیں بلوچ زیکیں پھوال نہ اِنت ، ھما وش بھت اِنت کہ آئی ءِ راھشون چک بود ناں ’ بابامری ‘ گونگیں دپتری راستیاں آژناک راستگوش ءُ نترس اِنت۔ایشی ءِ سیاستدان شھید غلام محمد گونگیں تھمارءُ دور گند اَنت۔ زانت اِش دژمنی کینگ ءُ سنگتی نہ سیلیانی سرپد بوگ ءَ بِھ رَد دات نہ کنت ۔باور بہ کن اِت پٹھانانی نامے چک بودیں راھشون چَہ پنجاب ءَ پاکدامنی ءِ سرٹیفکٹ ءِ رسگ ءَ پد ھم پٹھان ءُ بلوچاں جیک پہ جیک کنگ ءَ سوبمند نہ بیت ۔ بیا دست ءَ بر زکن ءُ چَہ ھاوند ءَ مراد وند بئے اِیں ’ اے ھدا ! مئے ھمبندیں پٹھاناں تو انچوش کہ رنگ ءُ زور داتگ چَہ ایشاں توری کچ چارکے ھوش ءُ بود بہ دئے ءُ ایشاں چَہ چک بودیں سیاستدانان داں جما ر بہ پھریز ۔ آمین ثم آمین ۔

چمشانک بہ دئے