مدام مردم ءَ ھما بامرد یاد کاینت ، کہ آیان راج دپترے لکیر نبشتگ ءُ نمیران بوتگ اَنت ، 1986 ءِ زمانگ منءَ گیر کئیت ھمے زمانگ ءَ ما نوک ورناء اتیں ، پدا ھمے زمانگ ءَ بی ایس او ھم وتی جوشءَ ات ، چہ دز پروم ءَ نوگلیں ورناء ستار شمبے زئی ھمے جنزے یک رھشونے زانگ بوت ، بلے ریاست ءِ جوڑ کُتگیں ملا گون وتی پندلان بلوچ ورنایانی دیم ءَ چو کوہءَ اوشتاتگ اتاں ، مئے بازارءَ یک ملائے چہ سورابءَ راہ دیگ بوتگ ات ، ھمے ملاّ ءَ گوں وتی چرپیں زبانءَ تیوگیں بازارے کماش وتی راہ ءَ بُرتگ اتاں ۔ منءَ یات اِنت ، ھمے ملائے سوجانی پدا بازارے درستیں مردم پہ ستار دنتان جوشگءَ اتاں ، بلے من مدام دیست کہ ستار تُشے کم نہ کُتگ ات ، یک رندے پنجگورءَ بی ایس او ئے جارے پدا روانکے در کنگ بوت ،شھید فدا احمد ءِ کوشے ھلاپءَ پدا ھمے ملایانی داشتگیں ، ورناء (جے ٹی آئی ) والا بی ایس او ئے سنگتانی دیمءَ اوشتاتگ اتاں ، او بازیں سنگ شانی ءَ پد ، پنجگورے چار چوکءَ بی ایس او ئے جلسہ برجاہ بوت ، ھمدا من دیست کہ ستار ءَ ڈوکے ءَ لگّتگ ات ، بازیں سنگتانی گُشگ ات ، بیا ترا ھسپتالءَ بریں ، بلے ھمے ورناء ھچ کمار نہ کنگءَ ات ءُ گوں ھوناں اسٹیج (تلّو) ئے سرا تران کنگءَ ات ءُ گُشگ ءَ ما چہ شھید فدا احمد شر تر نہ ایں ، مارا پاکستانی چانوگ ھور چو داشت نہ کن اَنت ۔ وھد روان بوت ، ھالات بدل بؤان بوت اَنت بی ایس او دو جاہ ءَ ات ، بی این وائی ایم جوڑ ات ، پدا ستار گوں بی این وایی ایم ءَ ھور ات ، پدا ڈاکٹر حئی سربراہی ءَ بی این ایم جوڑ بوت ، ۔ شھید ستار شمبے زئی ھمے گلءَ ھور ات ، پدا ستارماسٹری ءِ نوکری ءَ لگّت ، تنکہ آخری وھدءَ ھمے کار ءَ گوں ھمگرنچ ات ۔بلے ستار مدام چہ ما دور ، چیا کہ آئی نوکری پنجگور ءَ ات ما پروم، ستار وھد وھدے سرا اتک پروم پہ گندُکی ، ، ستار واجہ داد محمد ءِ میانتاکی چُک چہ منصور کستر ءُ چہ گزو(جاوید) مستر ،، راست گُشے ستار ءَ یک دگہ براتے بوتگ اقبال ،کہ ورنائی ءَ بیران بوتگ ، ھمے اقبالی مھر بوتگ اَنت کہ ستار گزّوئی نام بدل کُت ، جاوید اقبال ایر کُت ، پدا ستار وتی درستیں چُکانی نام ھم گوں اقبالی نام جھوڑ دات اَنت ، زھیر اقبال ، صغیر اقبال ، وزیر اقبال ۔ نوید اقبال ،،،،،،، دیر نہ گوست ستار بی این ایم یک کُت گوں بی این پی (عوامی ) ءَ شُت ، بلے کسءَ اے گمان نہ کُتگ ات ، ستار دگہ یک لکیرے ءَ گوں ھمگرنچ اِنت ،، آ لکیر ھما اِنت کہ بالاچءَ کشّتگ ، آ لکیر ھما اِنت کہ گلام محمد ءُ لال ءَ زُرتگ روان اَنت ، بلے مرچی من پہ پہر گُشان کہ ستار یک رنگے ءَ ھمے لکیر ءَ کشّان بوتگ ، بلے مئے وڑیں کورانی چم کور بوتگ اَنت ، 14 اگست2010 ءِ شپءَ وھدے پنجگور پاکستانی فوجے بُنجلءَ سرمچاراں اُرش کُت ، دومی روچءَ بزان 15 اگست2010ءَ روچے 11 بجءَ چتکان ، ستار وتی میڈیکل اسٹورءَ نندوک بیت (ظہیر اقبال میڈیکل اسٹور) بارین کُجام چاروے گُشتن ءِ پدا ستار گو دو ھمراہءَ ھور ، آغا عابد شاہ ءُ ماسٹر سفیر ئے ھمراھی ءَ پاکستانی رستراں آوار جت اَنت چہ ھما روچءَ من زانت کہ ستار کُجام راہ ءِ مسافر بوتگ ءُ ما کُجام راہ ءَ ودار کُتگ ، ھمدا دلءَ گرکے جت ، منی راج ءِ ورناءَ وتی راہ دیر اِنت درگِتگ ، بلے اے ما بوتگیں بے راھی ءَ روان ایں ، اصل ءَ راہ ھمش اِنت ، اگہ کسے بزانت ، راہ بالاچ ءَ رُپتگ گلام گلام محمد ءُ لال ءُ ستار ءُ عابد ءُ سفیر ءُ کمبرءَ دیمءَ بُرتگ ، انگت راہ دیمءَ برگی اِنت ، منزل ءَ رسگی اِنت ، منزل مئے چمانی دیمءَ اِنت ، ھما منزل کہ مئے راجے ورنایاں وتی ھون رِھتگ اَنت ۔ وھد روان بوت روچ پہ ماھاں بدل بوت اَنت ۔ 270 روچءَ رند بزان 11 مئی 2011 ھال اھت کہ گرمکان پنجگور ءَ سہ لاش کپتگ ، پدا ھمے لاشانی شناخت ھمے ورنایانی نامءَ زانگ بوت ، ستار شمبے زئی ، آغا عابد شاہ ءُ ماسٹر سفیر ، مرچی کہ من اے دانکان نبشتہ کنگایان باندا پدا 11 مئی اِنت ، شھیدانی اولی سالروچ اِنت ،