پمّن بالاچ مردمے ءِ نام نہ اِنت ۔ پمّن بالاچ منزلے ، پمّن بالاچ قربانی ءِ نام اِنت ۔پمّن بالاچ(سکریپیس) اِنت ۔ پمّن بالاچ ہما مردم اِنت کہ درانڈیہہ ءَ نشتگ بلے وتی لوگ ءِ دریگءَ مدام پچ کنت ءُ ماریت کہ اے گوات آئی ءِ زمینءَ چہ پیداک اِنت ، پمّن بالاچ ہما مردم اِنت کہ عمرے بیت وتی مُلکے ندیستہ بلے وتی کسانیں چُکّ ءَ را دائم گُشیت کہ یک روچے مُلکءَ رویں ، یک روچے مئے زمین مارا توار جنت ۔۔ پمّن بالاچ ہما اِنت کہ وتی دراہیں زرّاں دگرے ءَ دنت ءُ اے جیڑیت آ منا چہ شرتریں مردمے ۔۔ پمّن بالاچ ہما مردم اِنت کہ وتی مُلک ئے یلہ داتہ ۔ وتی لوگے یلہ داتہ اے واستہ کہ آیوکیں بلوچ اے مگُش اَنت کہ مئے دیمءِ مردماں ہچ نہ کُت ۔پمّن بالاچ ہما مردم اِنت کہ جنگلءَ اِنت ، لدءَ اِنت ، ہورءِ سرا اِنت ، تہنا ترّگءَ اِنت کہ یک بلوچے وتی علاقہ ءَ وتی مردمانی تہا شرّی ءَ زندگ بوت بکنت ۔۔ پمّن بالاچ ہما اِنت کہ کوہاں ، جنگلاں ، لداں ، ہورانی سرا تہنا گردیت، تہنا اے واستہ کہ باندات ءِ آیوکیں بلوچ زندگ بوت بکنت۔۔ ہما بالاچانی کہ اِشانی توکا لہتینانی نام وَ بالاچ اِنت بلے آ بالاچیت ءَ بیہال اَنت ، لہتینانی نام بالاچ نہ اِنت بلے زندگاں اے واستہ کہ بالاچے زندگ کُت بکنان کہ آہانی توکا بازینے ءِ نام بالاچ نہ اِنت بلے آ بالاچ ءِ منزلءَ سر اَنت ۔ بلے یکے ءِ نام بالاچ اِنت کہ آ بیہال بوتگ کہ آ بالاچ اِنت۔ فرض بکن بالاچ یک منزلے ، اے وش بہتی اِنت بالاچ مری ءِ کہ آئی ءِ نام بالاچ بوتگ ءُ بالاچیں منزل ءَسربوتگ۔ اے وش بہتی بوتگ بالاچ گورگیج ءِ کہ آئی ءِ نام ہم بالاچ بوتگ ءُ آ بالاچیں منزلءَ سر بوتگ ۔۔ چُشیں بازینے است کہ آہانی نام بالاچ نہ اِنت بلے آ بالاچیں منزلءَ سر اَنت ۔۔ ۔۔اے فلم ‘‘بالاچ‘‘مارا اے یاتءَ گیج اِیت کہ ضروری نہ اِنت کہ مئے نام بالاچ بہ بیت بلے اے گپ الّم اِنت کہ مئے شمئے منزل بالاچ بہ بیت ۔اے فلم بالاچ منزلءِ نشانی ءَ کنت ۔ اے فلم لہتیں انچیں مردمانی کسّہ اِنت کہ آ بالاچ بوہگ ءَ اَنت ءُ آ بالاچ بوہگ ءِ سفرءَ گون اَنت کہ آ بالاچ جوڑ بہ بنت۔ (ڈاکٹر حنیف شریف ءِاے گپ چہ ریڈیو گوانک ءَ زُورگ بوتگ اَنت کہ فلم بالاچ ءِ بابت ءَآئی ءَ گُشتگ اَنت)