(دلگوش: اے نبشتانک واجہ میران بلوچ ءِ نام ءَ مارا سر بیتگ، پمیشا ما بازیں تگ ءُ گیچن ءَ پد شِنگ کُتگ۔ ایڈیٹ کنگ ءِ سرا ما چہ واجہ ءَ پھلی لوٹیں۔۔او بام ھال ءِ گوں اے ھیالاں تپاکی المی نہ اِنت۔)
.........................................................................................................

ماں عمان ءَ پاکستانی گوں بدیں نظر ءَ چارگ بنت۔۔ چیاکہ عمانی آنی ردا پاکستانی ھر گندگی یے بنزہ اَنت۔۔ قتل بہ بیت یا دُزی، یا کجام چاگردی ھرابی ئے ،ادا گیش ءَ چہ گیش پاکستانی پنجابیانی نام دیم ءَ کئیت۔ گوستگیں روچ ءَ عمان انگریزی ھالتاک ءَ اَتکگ اَت کہ پاکستانیاں پولیس نیٹورک ھیک کُتگ ءُ نقلی ویزا کشّ اِتگ ءُ بھا کُتگ۔۔لھتے روچ پیش ھالتاک ءَ شِنگ بیتگ اَت کہ عمان میان استمانی ائیر پورٹ ءَ سئے پنجابی گرگ بیتگ کہ آھانی لاپ ءَ ھیروئن ءِ کیپسول مان بیتگ، پٹ ءُ پول ءَ چہ آ چیریں ایجنسی آں دزگیر کُتگ اَنت۔ پمیشا مرچاں عمان سلطنت ءَ پاکستانیانی ویزا دیگ ھم بند کُتگ۔۔ بلے ادا بلوچ ءِ یک جُتائیں بستاری۔۔بلوچ ھما عزت دیگ بیت کہ اے ملک ءِ جاھمننداں دیگ بیت۔۔عمان ءِ چاگردی زند ءِ تھا بلوچ ءِ نام باز بلند اِنت۔۔ ایوک ءَ عمان ناں بلکیں مزن ھور ءِ ھر ملک ءَ بلوچ ءِ وتی شرپے بیتگ۔۔۔وتی عزت ءُ مڑاہ ءُ شانے بیتگ۔۔۔ بحرین ءَ ”شاھو” ءِ وڑیں غیرت مندیں بلوچ ھم پیدا بیتگ۔

گُشنت کہ غلامی ءِ زند مردم ءَ چاگردی ھرابکاری فرمائیت۔۔۔ بلے بلوچ ھما راج بیتگ کہ ایشاں غلامی ءَ چہ ابیئد ھم ھر ملک ءَ یک نشانی پیدا کُتگ۔۔وتی شان برجاہ داشتگ۔۔۔ بلے مرچاں آ وڑ نہ اِنت۔۔ ماں عمان ءَ بلوچ ءِ شان ءُ شرپ تاں انگت وڑی ناں وڑی گندگ ءَ کئیت۔۔۔بلے مزن ھور ءِ آ دگہ مُلکاں بلوچ ءِ شان ءُ شرپ کور دیم اِنت۔۔۔۔ راستیں گپ ءَ بہ جن یے گُڑا ملامت بئے۔۔چیاکہ ادا بازیں دانا ءُ کواس نِشتگ اَنت۔۔ اے گُشاں چاگردی گندگی ھر کسی ذاتی جیڑھی۔۔۔۔بلے پہ راستی بِچاریے ماں عرب ملکاں ھم بلوچ ھمے چاگردی گندگیانی آماچ اِنت۔۔۔ ٹراماڈول ءِ سرا یکے گرگ بیت آ بلوچ اِنت۔۔ شرابی دیوانے بیت ،اودا ھم بلوچ اِنت۔۔ بحرین ءَ ھم بلوچ زھگانی زند ساھکندن ءَ سر بیتگ۔۔۔ وانگ ءُ زانگ ءِ جاہ ءَ کارچ ءُ چاقو آھانی دست اِنت۔ ورناہ ٹراماڈول ءُ شراب ءِ تھا زندگ اَنت۔۔ گُستاخی ءَ بہ بخشئے۔۔۔ گوستگیں روچاں بحرین ءَ چہ مند ءَ سیادی داروکیں ماتی نوگلیں زھگے شھید بوت۔۔ کارچی ءَ لگ اِت۔۔۔۔شراب ءِ نشہ ءِ تھا جنگ ءُ چوپ وا ھر روچی ایں گپے۔۔۔۔۔۔۔۔بحرین چہ ایدگہ خلیجاں پمیشا جتائیں بستاری داریت کہ اودا بلوچ ءِ آبادی درسدی ھساب ءَ گیشتر اِنت ، بلوچ ءِ نام ءِ سرا لبزانکی کلبے اڈ دیگ بیتگ۔۔۔۔ دیوان ٹھنت۔۔۔ جوانیں جوانیں روایتی گُشتانک دیگ بیت۔۔۔بلوچ راج ءِ نام ءِ سرا اودا روایتی جھدکار ھم باز اِنت۔۔۔۔ بلے گُشنت کہ گپانی سرا اگاں عمل مہ بیت گُڑا آ گپانی جوانیں آسر در نیئت۔۔۔۔ منظور بلوچ ءِ ردا بحرین ءَ یک ٹوھیں کلبے ءِ بیئگ ءَ ابئید ھم بلوچ تپاک ءُ یکجاہ نہ اَنت۔۔ یکے دومی ءَ چیواہ ءُ کلاگ گِر اَنت۔۔یکے راج دُشمن ءُ دومی راجدوست اِنت۔۔ بحرین ءَ ھم یکے انقلابی ءُ دومی ءَ رد انقلابی ءِ نام بندگ بیت۔۔۔ اے مئے بد بھتی اِنت۔۔۔ اگاں بحرین ءِ بلوچ تپاک ءُ یکمُشت بیتیناں گُڑا مرچی بلوچ کلب یک یونیورسٹی ءِ بستار ءَ دیم ءَ اَتکگ اَت۔۔۔ بلوچ زھگاں کارچ ءُ چاقو جاہ ءَ قلم دست ءَ اَت۔ بلوچ ورناہ ٹراماڈول ءُ شراب ءِ آماچ نہ اِتنت۔۔۔بلے عیب چہ باسکان اِنت۔۔ پمیشا کمان ھم تیران نہ جنت۔۔۔نام کٹگ ءِ شوق وھدی مردم ءِ تھا جاہ جنت گُڑا ھچ کار بیت نہ کنت۔۔ پہ راج ءِ چُکانی باندات ءَ شریں کار بیت نہ کنت۔۔۔ پہ روایتی دیوان ءِ ٹھینگ ءَ کس دیمروئی نہ کنت ءُ نامدار نہ بیت۔۔ راجی زند ءَ علم دیمروئی دنت۔۔ بلے زھگ ھشتاد درسد چہ راجی زانت ءُ علم ءَ زبھر اَنت۔۔ اودا زانت ءِ معنیٰ بس دیوان ٹھینگ ءَ گُشگ بیت۔۔۔ دیوان ءِ گُشتانک دیوکیں روایتی دانشور ءُ کواسانی سیادی چہ چُک ءُ زھگاں سِستگ۔۔۔۔ھمے وڑا زھگ منشیات زدگ ءُ ورناہ ٹراماڈول ءُ شراب ءِ ھرجان اَنت۔ بلوچ ءِ پیشی زانت ءُ شرپ ھتم بیتگ۔ شعوری تک چک پروش اَنت۔۔۔ راجی زانت ءُ علم ناپید اِنت۔۔۔۔زھگ وتسر ءُ یلو در گلو اَنت۔۔ بس پشت کپتگاں روایتی دیوان ءُ مراگش۔۔۔۔۔۔۔

دومی یو۔اے۔ای ءَ ھم بلوچ راج ھمے چاگردی ھرابکاریانی آماچ اِنت۔۔ العین وا گنتر۔۔۔۔۔ شرپ داریں بلوچ ٹراماڈول ءُ شراب ءُ تریاک ءِ سوداگر جوڑ بیتگ اَنت۔۔۔۔ العین ءِ  بلوچ شاعراں پہ راج ءَ باز جوانیں شعر ءُ غزل پَر بستگ۔۔۔۔۔بلوچ ورناھانی سرمچاری یے سکین داتگ۔۔ بلے مرچاں ھمے شاعر ءَ ادیب ھم ھال اِنت کہ ماں زنداناں بند اَنت۔۔۔ اے پہ اے ھاترا بند نہ اَنت کہ آھاں راجی شعر بستگ، پاکستان ءِ گُشگ ءِ پدا چو ”واجہ گزین مری ءِ وڑا یو۔اے۔ای سرکار ءَ دزگیر کُتگ اَنت۔۔ دریگتیں انچو بہ بیتیں۔۔۔ بلے اے پمیشکہ یو۔اے۔ای پولیس ءَ دزگیر کتگ اَنت کہ ایشاں ٹراماڈول بھا کُتگ۔۔ پدا ھمے ٹراماڈول ایشاں دگہ راجاں نہ داتگ اَنت۔۔ ایشاں ھما بلوچانی گورا ٹراماڈول بھا کُتگ کہ آ باگانی سرا پنچ سد ءَ کار ءَ اَنت۔۔۔ دومی ھما ورناہ کہ آھانی مات گل ءَ بال اَنت کہ آھانی زھگ ولایت ءَ کار اِنت۔۔۔ بلے بزگیں مات اے گپ ءَ سرپد نہ اِنت کہ منی یک زھگے ءَ دومی زھگ ٹراماڈول ءِ آماچ کُتگ ءُ برباد کُتگ۔۔۔۔۔۔۔۔

ھمیش اِنت مرچیگیں بلوچ ءِ شرپ کہ ماں مزن ھور ءِ ملکاں پشت کپتگ۔۔۔ پیش ءَ بلوچ پہ مزن مردی ءُ مڑاھداری ءَ مشھور بیتگ۔۔۔ بلے مرچاں بلوچ ٹراماڈول ءِ بھتام ءَ گوج واریں عربانی جیلاں بند اَنت۔۔۔ اے ردا بلوچ لیڈر ءُ کواس ءُ زانتکاراں دِلگوش گور کنگ لوٹیت۔۔۔ حسن بیبگر مندی ءَ مدام یک گپے جتگ کہ ”قوم پہ واری گار نہ بیت، بلکیں قوم پہ بگاھی گار بیت”۔۔۔۔ راست گُشتگ واجہ حسن ءَ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔