Facebook
RSS

عطا ءِ دہ کلداری مردم۔۔۔۔۔۔۔۔۔۔۔۔۔۔ڈاکٹر حنیف شریف

-
ساچان بلوچ


نوزدہ سد ءُ نود ءُ ھفت ءِ بندات درآمد درآمدانی پیما بوت۔جنوریءِ اولی روچ ءَ گوریچ لوگ ءِ پیشگاہ ءَ کاگدانی ءُ پلاسٹکانی ھمراہی ءَ ابیتکی ءِ جارءَ پرّینگا ات ۔ ھور ءِ ترمپاں زمین ءِ سرا کسّہ نویسگ ءِ بے سوبیں جُہد کُتگ ات۔آئی ءِ ھمُک شنزءِ ہمرائیں نیم توامیں کسّہ گوارگ ءِ ودارءَ شہر ءِ دمک دمکاں ویل ات اَنت۔ آہاں نہ سرنامہ گوں ات۔ نہ گُڈ سر۔۔ایوکیں ھیالے ات کہ ترّیں ھاک ءِ بوہانی تہا یلہ چر ات۔
نوزدہ سد ءُ نود ءُ ھفت ءِ بندات درآمد درآمدانی پیما بوت۔ھمے سالءِ داتگیں لہتیں لفظ ات اَنت کہ منی لوگءِ دیوالے سرا سیالیچکانی گون ءَ نبشہ ات اَنت ،نبشتہ کنوکے ذھنءِ مانگیشگ چہ نبشتہ ءَ پدّر ات۔آ یک شاعرےءِ مرگ ءِ جار ات کہ اسپیتیں دیوال ءِ سرا سیالیچکانی کُمک ءَ سیاہ کنگ بوتگ ات۔۔
عطاشاد
13،2،97 (سینزدہ ،دو،نودءُہفت )
بروچ پنچ شمبے فروری
منی ھیال ءَ لفظ ہمے ڈولءَ نبشتہ ات اَنت ۔آٰئی ءَ را ھمنکس سُد نیست اَت کہ فروریءَ بُرز ترءَ نبشتہ بکنت ۔زاناں اے ماہ آئی ذہنءِ گُڈ سرا پشت کپتگ ات ءُ آئیءَ گُڈ سرا نویستگ ات۔ عطاشادءِ مرگءِ ھال منءَ ھمے بے رِدیں لفظانی وانگ ءَ چہ رست۔منا باور نہ بوت ‘‘عطا انوں چوں مِریت۔تنی وھدی آئی ءِ کتاب نیاتکگ اَنت ۔تنی وھدی آئی نویستگیں دستونک ءُ لچھ آنی لفظانی بؤ تاجگ اِنت ۔ تنی وھدی آئی ءَ وتی نندگءِ ھاترا الکاپیں لوگے بہا نہ زُرتگ ات ءُ تنی وھدی بلوچی شاعری طفل ءِ گاما اِنت ۔ عطاشاد انوں ہچ حساب ءَ نہ مریت واجہ حدا اے ڈولءَ ھچ پیما نہ کنت من بُرزءَ چاراِت زمستانءِ روچ گرم شانک دیگا اَت۔روچ ءِ شاعرے وت روچ حلاف ات ۔ مارُژنءِ منّوکان روچءَرا زیات دیر چاراِت نہ کُت۔۔
نوزدہ سدءُ نودءُ ھفت ءِ بندات درآمد درآمدانی پیما بوتگ اتءُ مئے دستاں یک اسپیتیں کاگدے داتگ ات ئے کہ آئی ءِ سرا دہ دہ کلداری مردمانی نام نبشتہ اِت اَنت ءُ ہمے درگت ءَ من آ بچکءَرا چنکس دیرءَ سرپد کنگااتوں کہ عطا شاد پنڈوکے نہ اِنتءُ ناں ما پنڈگءَ اتکگاں بلکیں عطاشاد ءِ مرگءِ پُرسی لبزانی جوڑ کنگءِ ھاترااے سیالیچکانی گوناں نبشتہ کنوکاں گُدءِ سرا نبشتہ کنگءِ ھاترا زرّءِ ضلورت اِنت پمشکہ ترا پجاروک کُتگ ءُ دہ کلدار لوٹگائیں ۔ ایوکءَ دہ کلدار ۔ تو دیگ لوٹے تئ مرضی ءُ اگہ دیگ نہ لوٹ ئے پدا ہم وتی مستر وت ئے۔
آئی ءَ دومی گپ دوستر بوت ءُ مارا ہچّ ندات ءُ شُت آ دہ کلداری مردمانی تہا آئی نام ہوار بوہگا ءَ چہ رکّت ۔ عطا ءِ ھاترا پنڈگ ءِ اے سیمی روچ اَت من منظور ءُ عابد بُنکّی ھندءِ دمک دمکانی ھاک ءَ گولگا اتیں ءُ عطا ءِ ھاترا دستءَ ٹال کنگا اتیں۔۔
واجہاں عطاءَ وفات کُتگ۔۔۔۔۔۔۔۔۔۔۔۔
گُڑا ما چوں کنیں۔۔۔۔
واجہ عطا مُرت۔۔۔۔۔۔
منی چُک ھرکس ءَ یک ناں یک روچے مرگی اِنت ۔۔
لالا عطا شُت۔۔۔۔۔
شر پوت چہ دنیا ءَ چُٹّت۔۔۔۔
۔آ دہ کلداری مردمانی تہا ہچ ڈولیں گیشی نیتک کس وتی نامءَ اے کاگدءِ سرا آرگءَ تیار نہ اَت
عجبیں مردم اَنت۔۔دہ کلدار ہم نیارنت ۔ منظورءَ گوں حیرانی ءَ گُشت
ءُ اولی رندءَ منءَ اسپتیں کاگدءِ سرا نبشتہ ئیں لہتیں نام سک مزن گندگ اتک اَنت ،ءُبازار ءِ تہا رؤکیں مردم سک کسان ۔ آ اسپتیں دیوال ءِ سرا سیالیچکانی گوناں نبشتہ ئیں لفظاں چہ ہم کستر ۔۔
تئ نام کئے اِنت ؟
جی ۔منی نام حنیف شریف اِنت اے منظور بسمل اِنت ءُآ عابدعلیم اِنت
شما پہ کارے ءَ؟
جی ھئو ۔عطاشاد ءَ وفات کُتگ
کُجام عطا شاد۔۔۔۔۔ھما شرابی
آئی ءَ منی گپ پروشتءُ منا انچو روک روکءَ چارگءَ لگ اِت کہ مارا بیسہ بوت کہ شراب ماوارتگءُ ما شرابی ئیں ءُ پدا مانزانت کہ کُجام عطاشاد ءِ کئی کرّا گپ ءَ ئیں۔
عطاشاد۔۔۔۔۔۔۔۔۔۔۔
کُجام ھما ملنگ
عطاشاد۔۔۔۔۔۔۔
کُجام ھما کافر
عطا شاد۔۔۔۔۔۔
کُجام ھما گنوک
ءُ ما سئیں ھیراں اِتیں کہ اے کُجام عطاشاد اِنت کہ ما نزانیں ءُ قوم ئے گیشتر زانت۔ ھمے ساھت ءَ عابدءِ چم ھما گُشندہ ءَ کپت اَنت۔
حنیف ،منظور فلانی اِنت۔
کُج اِنت؟
آ اِنت ۔ چوک ءِ کرّا
ءُ ما سئیں آ گُشندہ ءِ کرّا سربوتیں۔
۔۔انچو کہ تو سہی ئے بلوچی زبانءِ مستریں شاعر ءَ وفات کُتگ ءُ شما آئی گزل ءُ دستونکانی سوبءَ مزنیں نامے کشّتگ نوں ھما مردءِ ھاترا مارا بازارءَ لہتیں پُرسی بینر جنگی اِنت ۔ تو عطا شاد ءَ را چے دات کن ئے ۔۔
،،عطا شاد ءِ ھاترا وا جان حاضر اِنت،،
ما سئیں گل بوتیں ۔ بلوچی زبانءِ گُشندہ ءَ دست کشءِ کیسگءَ بُرت۔ بیست20کلدار مئے دستانی دلءَ ایر کُت ءُ شُت۔ما دیراں تاں اے فیصلہ کُت نہ کُت کہ بیستین کلدار واجہ ءِ جانءِ قیمت اَت یا عطاشاد ءِ جتگیں گزل ءُ دستونکانی نیاد۔بلے اے یک پدّریں گپے اَت کہ اے بیستیں کلداراں آ دہ کلداری مردمانی کاگدءِ تہا جاگہ کُت نہ کُت۔۔
نوزدہ سدءُ نودءُ ہفت ءِ بندات ءَ عطاشادچہ وتی قومءَ درآمد کُتگ اَت۔
عطاشادءِ مرگ ءِ چارُمی روچءَ بازارءَ پُرسی بینر گوریچ ءِ دست ءَ بے وس اِت اَنت۔مردم چہ بینرانی چیر گوزگا اِت اَنت ءُ آہاں بئے ھم نہ کنگااِت اَنت کس اے واجہ ءِ نامءَ وانگءَ تیار نہ اَت ءُ ناں آ مردمانی جُھداں سہی اِت اَنت کہ سہ روچ ءِ دہ کلدارنی یکجا کنگا پد اشانی جوڑکنگا سوب مند بوتگ اِت اَنتءُیک بلائیں دہ کلداری مردمانی لسٹے تیار کُتگ اَت کہ عطاءِمردم اِت اَنت
،،عطاءِ دہ کلداری مردم،،
گپے زان ئے ؟
عابدءَ گُشت۔
چے؟؟
گندے باندا یکے ھالتاکے ءَ بدنت کہ عطاشاد ءِ نامءَ سہ کس ءَ چندہ کُتگ ءُ چندہ ءِ زرّ وارتگنت۔ما سئیناں ٹہک دات کنداِت ۔۔ گوریچ وتی ابیتکیءِ جارءَ گوں لوگ لوگ پہ لوگ اَت۔ترّیں حاک ھُشک بوتگ اِت اَنت ءُ نیم توامیں کسّہ زمینءِ باتنءَ کلّ بوتنت ءُ ہمے ساھتءَ بازارءِ توکءَ بستگیں مزنیں بینر گاڑی ے ءَ جت ءُ ھاکانی تہا دور دات ۔ آئی ءِ سرا نبشتہ اَت لفظ،،عطاشاد،تونمیران ئے ،، دو ٹُکّر بوتگ اَت ءُ زمین ءِ حاک ءُ بوچانی رنگءَ بوہگا اَت۔
باریں چہ کُجا چہ میونسپل کمیٹی ءِ حاک روپ اتک آئی ءَ دوئیں ٹکّر رُپت اَنت۔۔ کچرا چست کنوکیں ٹکٹرءِ ٹرالی ءِ تہا دور دات اَنت ءُ ڈرائیور ءَ را اشارہ کُت ءُ ٹکٹر میزان میزانءَ دیما راہ گپت ،،،، ڈاکٹر حنیف شریف

One Response so far.

  1. بلے
    من پہ مرگ گار نہ باں
    مھراں کہ آوار نہ باں

چمشانک بہ دئے