بلوچی و بلوچ دوستی:
بلوچی ءَ غیر بلوچ گوں ماتویی چماں چارگ ءَ اَنت . چه آهاں گِلَگے نیست . بلوچ ءِ چُک ءُ اوبادگ کہ وانگ نبیسگ زان اَنت ۔ وتی راجی ذمہ واری کہ بلوچی ءُ وتی ماتی زبان ءِ دیمبری اِنت کمتر ادا کرتگ ءُ ادا کنان اِنت . همے هاتر ءَ بلوچی ما گوشت کن آں کہ نِزور ءُ لَنگڑ دیم ءَ جُنزان اِنت۔
بے شک اگاں هرچ بلوچ وانندهے ءَ جهد بہ کُرت اِنت کہ چیزے ناں چیزے بلوچی ءَ بہ نبیس اِیت یا رجانک و تَرینگ ءِ جُهد ئِے بہ کرت اِنت۔ گُڑاں زلور چیزے لَؤز ءُ گال ( کلمہ ) چه وتی زگریں گالوار ءَ هم بلوچی ءِ لبزانک ءَ آرت و گیش ئِے کرتگ اَت. اے پدریں گپے کہ بلوچی ءِ هَمُک گالوار ءَ وتی سَدانی زِگریں لَؤز ءُ گال هست اَنت کہ دگر بلکیں چہ آهاں نابلد و نابزانت بہ بنت بلے اگاں همے گال ءُ لؤز نبیسگ بہ بنت ۔ وت مزنیں گَنجے پہ بلوچی ءِ لبزانک ءِ باندات ءُ بلوچی زبان بنت ۔ کہ دگراں هم سَئیگ و زانو گر بنت ۔ اے کار پہ بلوچی ءِ باندات ءُ آئی ءِ آبات بَیَگ باز پُرسیت و زلوری اِنت ۔
بازیں مردمے گوش اَنت کہ ما بلوچی ءِ نبیسگ نہ زان اِیں یا بلوچی نہ زان اِیں بلے منی هیال ءَ اے واجه ءُ بانکانی گوشگ راست نہ اِنت ءُ آهاں گوشگ لوٹ اِیت : بلوچی هما اِنت که شما ءُ شمئے کوهنیں مردماں هبر کرتگ ءُ هبر کنان اِت . جی هَؤ ! اے راستیں گپے که بلوچی ءِ بازیں گالوارے ءَ درآمدیں لَؤز باز هور بیتگ اَنت بلے اگاں همے مردم هم وتی گالوارانی نبیسگ ءِ جُهد ءَ بہ کن اَنت ۔ کم کم سرپد بنت کہ پیکہ وتی گاریں لؤز ءُ گالانی درگیجگ ءِ جهد ءَ بہ کن اَنت ءُ وتی زبان ءِ پَلگارگ ءِ جهد ءِ ذمہ واری ءَ وتی کوپگاں بہ مار اَنت ۔
اگاں بلوچاں وت وتی ماتی زبان ( بلوچی ) ءُ وتی مُلک دوست مه بیت گُڑا دگرانی نیکی ءُ دوست دارگ ءِ رهچار بیگ ءِ گپ بیکار و هوڈیں تماهے بیت کہ بیت نہ کنت ۔
اُمیت اِنت کہ بلوچ هم کُردانی ، سِندیانی ءُ دگہ زندگیں راجانی داب ءَ وتی زبان ءِ سرءَ پَهربند اَنت ءُ پہ آئی ءِ دیمبری ءُ زندگ دارگ ءَ بے کَچیں جهداں دَزگُلاش بنت پرچا که دلجمیں راجدوستی بے زبان دوستی بیت نہ کنت ءُ زبان ڈیھ ءِ داب ءَ چہ راج ءِ بُنی هستیان اِنت۔
بلوچی زبان ءِ جنجال و اڑاند :
بلوچی زبان ءِ مَستریں اڑاند منی هیال ءَ بلوچانی سیاسی بُنجاه ءُ حکومت ءِ نہ بوگ ءُ آهانی وت واکی ءِ جنجال اِنت نہ نبیسگ ءِ رهبند ۔ پرچا که اگاں بلوچان ءَ وتی حکومت ءُ وتی مُلک بہ بوت اِنت۔گُڑا سیاسی و مالی پڑ ءَ پہ بلوچی ءِ وانینگ ءُ آئی ءِ جنجالانی گار کنگ ءُ دیمبری ءَ جهد ئِے کرت ۔
دومی جنجال : بلوچانی ناوانندهی اِنت۔ بلوچ چَہ سَد ءُ چَہ هشتاد درسد ءَ گیش نا واننده اَنت ۔ آ نہ تهنا کہ بلوچی وانگجاهے ءَ دگہ هچ وانگجاهے ءَ نہ شتگ اَنت ءُ هچ زبانے ءَ ونت ءُ نبشت نہ کن اَنت ۔
سیمی اڑاند : بلوچانی آپ ءُ لاپ ( معیشت ) ءُ بیکاری اِنت . بلوچ ءِ هما کمیں وانندهاں هم کار دیگ نہ بیت و گیشتر بے روزگار ءُ بیکار اَنت ءُ دست اِش دپ ءَ نہ رس اِیت ۔ آهانی پگری ردوم کم ءُ سک کُنُٹ اِنت . چشیں مردمانی دل اگاں بہ لوٹ اِیت ھم بلوچی کتابءُ تاک ءُ ماهتاکے پہ بها گپت ءُ ونت نہ کن اَنت .
چارمی جنجال : همیش اِنت کہ بلوچ واننده هم وتی بنی حقانی زانگ ءُ چَہ راجی ذمہ واریاں نابزانت اَنت ۔ هشکیں گپ ءُ بَٹاکانی نیمگ ءَ گیشتر دلگوش کنگ اَنت . کوریں « سیاست » ءِ پُشت ءَ کپتگ و اے هَیرانی گپے نہ اِنت کہ « بلوچ » سیاسی سروک هم کمتر بلوچی ءَ نبشت ءُ ونت کن اَنت ۔ بلکیں هم بلوچی ءَ نبشت ءُ ونت هم مہ کن اَنت . چشین سروکانی رهشونی ءِ نیکیں کِرد بلوچ راج ءِ زبان ءُ آئی ءِ دودربیدگ ءِ ڈالچاری انت !!!
پنچمی : همیش اِنت که پدا پہ نام زانوگریں بلوچ « ملا » ءُ کواساں جهد کنان اِنت که پہ بلوچی ءَ « کوریں کِشکے » بہ رَند اَنت ءُ مردمان ءَ پہ زور گِر کناں هما راه ءَ بہ بر انت ...
منی هیال ءَ اول گهتر اِنت کہ بلوچ ورنا جی و جان کنگ بہ بنت تاں وتی ماتی زبان ءِ نیمگ ءَ دلگوش بہ کن اَنت . مرچی ابید چه تاکبند ماهتاک ءُ کتاباں هنچو ریڈیو - ٹی وی - انٹرنٹ - فلم - ٹلیپون ءُ ... مردمان هرچی گیشتر نزیک کرتگ ءُ نزیک کنان اِنت . تاں هما جاه کہ ناواننده هم پہ وتی زبان ءِ دیمبری ءَ همراه بیت کن اَنت گڑاں جوان اِنت کہ زانوگریں ندکار ءُ نبشتکار بلوچ چک ءُ نوک باهندانی دلبڈی ءِ نیمگ ءَ گیشتر دلگوش کن اَنت . بلوچ شونکار و سرشونکارانی ذمہ واری اے پڑ ءَ چہ هر کس ءَ گیش اِنت ۔ منی هیال ءَ هر کجام چہ برزیں گپانی جاه چہ نبشتہ ءِ رهبند ءَ گیش ءُ سر اِنت۔
بلوچی ءِ نبیسگ ءِ رهبند ءَ من گوئشت کناں کہ چَہ چل سال ءَ گیش اِنت کہ همے کِشک ءَ جنزان اِنت بلکیں تاں دلجمیں بانداتے ءَ هم همے رهبند یا « رهبنداں » کار دات بہ کن اَنت ۔ گڑا جوان اِنت کہ رهبند ءِ نیمگ ءَ کمتر ءُ زبان ءِ دیمبری ءِ نیمگ ءَ گیشتر دلگوش کنگ به بیت . پرچا که بیھ (اصل ) زبان اِنت ۔ زبان اگاں پَشت کَپ اِیت ۔ زانوگریں پدریچ گهتر آئی ءِ اڑاندانی باره ءَ چار ءُ بیچار کرت کن اَنت ۔
دلگوش: اے نوشتانک چَہ فیس بک ءِ بام ھال ءَ شنگ بوتگیں پوسٹے ءَ زورگ بوتگ کہ واجہ کریم بلوچ ءَ آئی ءِ چیر ءَ چمشانک داتگ اَت ۔ پر زانت ءُ سرپدیں ھبر بوگ ءِ سبب ءَ بام ھال ءَ نوشتانکے ءِ رنگ ءَ پھک نویس ءُ راست نویس کنگ ءَ پد شنگ کرتگ ۔ بام ھال اُوست بند اِیت کہ واجہ کریم بلوچ ، بام ھال نوشتانک ءِ نوشتہ کارانی رَم ءَ ھوار بیت ءُ چَہ وتی زانت ءَ مارا بَھرمند کنت۔ شونکار
بلوچی ءَ غیر بلوچ گوں ماتویی چماں چارگ ءَ اَنت . چه آهاں گِلَگے نیست . بلوچ ءِ چُک ءُ اوبادگ کہ وانگ نبیسگ زان اَنت ۔ وتی راجی ذمہ واری کہ بلوچی ءُ وتی ماتی زبان ءِ دیمبری اِنت کمتر ادا کرتگ ءُ ادا کنان اِنت . همے هاتر ءَ بلوچی ما گوشت کن آں کہ نِزور ءُ لَنگڑ دیم ءَ جُنزان اِنت۔
بے شک اگاں هرچ بلوچ وانندهے ءَ جهد بہ کُرت اِنت کہ چیزے ناں چیزے بلوچی ءَ بہ نبیس اِیت یا رجانک و تَرینگ ءِ جُهد ئِے بہ کرت اِنت۔ گُڑاں زلور چیزے لَؤز ءُ گال ( کلمہ ) چه وتی زگریں گالوار ءَ هم بلوچی ءِ لبزانک ءَ آرت و گیش ئِے کرتگ اَت. اے پدریں گپے کہ بلوچی ءِ هَمُک گالوار ءَ وتی سَدانی زِگریں لَؤز ءُ گال هست اَنت کہ دگر بلکیں چہ آهاں نابلد و نابزانت بہ بنت بلے اگاں همے گال ءُ لؤز نبیسگ بہ بنت ۔ وت مزنیں گَنجے پہ بلوچی ءِ لبزانک ءِ باندات ءُ بلوچی زبان بنت ۔ کہ دگراں هم سَئیگ و زانو گر بنت ۔ اے کار پہ بلوچی ءِ باندات ءُ آئی ءِ آبات بَیَگ باز پُرسیت و زلوری اِنت ۔
بازیں مردمے گوش اَنت کہ ما بلوچی ءِ نبیسگ نہ زان اِیں یا بلوچی نہ زان اِیں بلے منی هیال ءَ اے واجه ءُ بانکانی گوشگ راست نہ اِنت ءُ آهاں گوشگ لوٹ اِیت : بلوچی هما اِنت که شما ءُ شمئے کوهنیں مردماں هبر کرتگ ءُ هبر کنان اِت . جی هَؤ ! اے راستیں گپے که بلوچی ءِ بازیں گالوارے ءَ درآمدیں لَؤز باز هور بیتگ اَنت بلے اگاں همے مردم هم وتی گالوارانی نبیسگ ءِ جُهد ءَ بہ کن اَنت ۔ کم کم سرپد بنت کہ پیکہ وتی گاریں لؤز ءُ گالانی درگیجگ ءِ جهد ءَ بہ کن اَنت ءُ وتی زبان ءِ پَلگارگ ءِ جهد ءِ ذمہ واری ءَ وتی کوپگاں بہ مار اَنت ۔
اگاں بلوچاں وت وتی ماتی زبان ( بلوچی ) ءُ وتی مُلک دوست مه بیت گُڑا دگرانی نیکی ءُ دوست دارگ ءِ رهچار بیگ ءِ گپ بیکار و هوڈیں تماهے بیت کہ بیت نہ کنت ۔
اُمیت اِنت کہ بلوچ هم کُردانی ، سِندیانی ءُ دگہ زندگیں راجانی داب ءَ وتی زبان ءِ سرءَ پَهربند اَنت ءُ پہ آئی ءِ دیمبری ءُ زندگ دارگ ءَ بے کَچیں جهداں دَزگُلاش بنت پرچا که دلجمیں راجدوستی بے زبان دوستی بیت نہ کنت ءُ زبان ڈیھ ءِ داب ءَ چہ راج ءِ بُنی هستیان اِنت۔
بلوچی زبان ءِ جنجال و اڑاند :
بلوچی زبان ءِ مَستریں اڑاند منی هیال ءَ بلوچانی سیاسی بُنجاه ءُ حکومت ءِ نہ بوگ ءُ آهانی وت واکی ءِ جنجال اِنت نہ نبیسگ ءِ رهبند ۔ پرچا که اگاں بلوچان ءَ وتی حکومت ءُ وتی مُلک بہ بوت اِنت۔گُڑا سیاسی و مالی پڑ ءَ پہ بلوچی ءِ وانینگ ءُ آئی ءِ جنجالانی گار کنگ ءُ دیمبری ءَ جهد ئِے کرت ۔
دومی جنجال : بلوچانی ناوانندهی اِنت۔ بلوچ چَہ سَد ءُ چَہ هشتاد درسد ءَ گیش نا واننده اَنت ۔ آ نہ تهنا کہ بلوچی وانگجاهے ءَ دگہ هچ وانگجاهے ءَ نہ شتگ اَنت ءُ هچ زبانے ءَ ونت ءُ نبشت نہ کن اَنت ۔
سیمی اڑاند : بلوچانی آپ ءُ لاپ ( معیشت ) ءُ بیکاری اِنت . بلوچ ءِ هما کمیں وانندهاں هم کار دیگ نہ بیت و گیشتر بے روزگار ءُ بیکار اَنت ءُ دست اِش دپ ءَ نہ رس اِیت ۔ آهانی پگری ردوم کم ءُ سک کُنُٹ اِنت . چشیں مردمانی دل اگاں بہ لوٹ اِیت ھم بلوچی کتابءُ تاک ءُ ماهتاکے پہ بها گپت ءُ ونت نہ کن اَنت .
چارمی جنجال : همیش اِنت کہ بلوچ واننده هم وتی بنی حقانی زانگ ءُ چَہ راجی ذمہ واریاں نابزانت اَنت ۔ هشکیں گپ ءُ بَٹاکانی نیمگ ءَ گیشتر دلگوش کنگ اَنت . کوریں « سیاست » ءِ پُشت ءَ کپتگ و اے هَیرانی گپے نہ اِنت کہ « بلوچ » سیاسی سروک هم کمتر بلوچی ءَ نبشت ءُ ونت کن اَنت ۔ بلکیں هم بلوچی ءَ نبشت ءُ ونت هم مہ کن اَنت . چشین سروکانی رهشونی ءِ نیکیں کِرد بلوچ راج ءِ زبان ءُ آئی ءِ دودربیدگ ءِ ڈالچاری انت !!!
پنچمی : همیش اِنت که پدا پہ نام زانوگریں بلوچ « ملا » ءُ کواساں جهد کنان اِنت که پہ بلوچی ءَ « کوریں کِشکے » بہ رَند اَنت ءُ مردمان ءَ پہ زور گِر کناں هما راه ءَ بہ بر انت ...
منی هیال ءَ اول گهتر اِنت کہ بلوچ ورنا جی و جان کنگ بہ بنت تاں وتی ماتی زبان ءِ نیمگ ءَ دلگوش بہ کن اَنت . مرچی ابید چه تاکبند ماهتاک ءُ کتاباں هنچو ریڈیو - ٹی وی - انٹرنٹ - فلم - ٹلیپون ءُ ... مردمان هرچی گیشتر نزیک کرتگ ءُ نزیک کنان اِنت . تاں هما جاه کہ ناواننده هم پہ وتی زبان ءِ دیمبری ءَ همراه بیت کن اَنت گڑاں جوان اِنت کہ زانوگریں ندکار ءُ نبشتکار بلوچ چک ءُ نوک باهندانی دلبڈی ءِ نیمگ ءَ گیشتر دلگوش کن اَنت . بلوچ شونکار و سرشونکارانی ذمہ واری اے پڑ ءَ چہ هر کس ءَ گیش اِنت ۔ منی هیال ءَ هر کجام چہ برزیں گپانی جاه چہ نبشتہ ءِ رهبند ءَ گیش ءُ سر اِنت۔
بلوچی ءِ نبیسگ ءِ رهبند ءَ من گوئشت کناں کہ چَہ چل سال ءَ گیش اِنت کہ همے کِشک ءَ جنزان اِنت بلکیں تاں دلجمیں بانداتے ءَ هم همے رهبند یا « رهبنداں » کار دات بہ کن اَنت ۔ گڑا جوان اِنت کہ رهبند ءِ نیمگ ءَ کمتر ءُ زبان ءِ دیمبری ءِ نیمگ ءَ گیشتر دلگوش کنگ به بیت . پرچا که بیھ (اصل ) زبان اِنت ۔ زبان اگاں پَشت کَپ اِیت ۔ زانوگریں پدریچ گهتر آئی ءِ اڑاندانی باره ءَ چار ءُ بیچار کرت کن اَنت ۔
دلگوش: اے نوشتانک چَہ فیس بک ءِ بام ھال ءَ شنگ بوتگیں پوسٹے ءَ زورگ بوتگ کہ واجہ کریم بلوچ ءَ آئی ءِ چیر ءَ چمشانک داتگ اَت ۔ پر زانت ءُ سرپدیں ھبر بوگ ءِ سبب ءَ بام ھال ءَ نوشتانکے ءِ رنگ ءَ پھک نویس ءُ راست نویس کنگ ءَ پد شنگ کرتگ ۔ بام ھال اُوست بند اِیت کہ واجہ کریم بلوچ ، بام ھال نوشتانک ءِ نوشتہ کارانی رَم ءَ ھوار بیت ءُ چَہ وتی زانت ءَ مارا بَھرمند کنت۔ شونکار
