پھلوی رژیم ءِ ھلاسی ءُ نام گیپتیں اسلامی انقلاب ءِ آیگ ءَ پد روکپتی بلوچستان ءِ تہ ءَ اے ھیال رُستگ ءُ ھمینچک توانا اِنت کہ اے ھبر ءَ دنیا ءِ ھمک ھند ءِ بلوچ چماں بند کن ءُ من اَنت کہ ایران ءَ بلوچاں ھچ رنگیں سیاسی آجوئی ءُ واک نیست ، گوں پِسکگ ءَ مردمانی گٹ ءَ پاھو ءِ ساد تنچگ بیت ۔
من اے ھبر ءَ پھک ءَ رَد نہ کن آں کہ ایران ءِ نوکیں رژیم ءَ پہ بلوچانی آزادی ءُ وتکواکی ءِ پچگرگ ءَ لانک نہ بستگ البت من اے ھبر ھم سما کتگ کہ وت بلوچاں ھم اے سی سال ءِ دارجیں مدت ءَ پہ وتی وتکواکی ءُ کم کم ءَ کوردیم بوتگیں راجی پجار ءِ دارگ ءَ چوشیں توجیل نہ کتگ کہ یات کنگ بہ بنت ۔ دانگ دانگ ، بے راھبند چَہ سیاسی سنچ ءَ زِبھریں کار نہ نشان دیگ بنت ناں جاور ءُ چاگردی تب ءِ مٹائینگ ءِ توان دار اَنت پمیشکا آ شمارنہ بنت ۔
بلوچانی ، ناوانندگی ، ناسرپدی ءُ ترس ءِ سبب ءَ بلوچ دژمنیں زابلی ءُ معتصبیں شیعایاں بلوچستان ءَ وتی آبادی ءِ انتقال دیگ ءَ آسانی بوتگ ۔ بلوچستان ءِ زرخیر ءُ آبادیں زمین بے جست ءُ پرس ءَ پلگ ءُ برگ بوتگ اَنت ۔ زرباری بلوچستان ءَ داں راسک ءَ بہ گر گْوتر ءَ چَہ دولت ءِ زَراں بلوچانی زمینانی سر ءَ جوڑ بوتگیں شرکت ءُ کارجاہ بے جست ءُ پرس بہ عنوان امتیاز گجراں دیگ بوتگ اَنت ۔ بلوچ پہ زور انچیں کارانی نیمگ ءَ تیلانک دیگ بوتگ اَنت کہ دولت آھاں قاچاق فروشی ءُ دزی ءِ نام دنت ، پہ اے کار ءَ ھم دولت ءَ ھچ رنگیں زور پکار نہ بوتگ پرچا کہ اد ءَ کس ءَ ھم نہ دیستگ کہ بلوچ ایشانی دیم ءَ میلانک اَنت ۔
بلوچستان گوں وتی مڈیاں پہ گجراں مال ء غنیمت ءِ بستار دار اِیت ۔ اے چَہ مڈیاں سر ریچیں گلزمین ءَ ھرچے کہ آ کنگ بہ لوٹ اَنت آھانی دیم ءِ داروک کس نیست بلے یک ترسے کہ آھانی دل ءَ نشتگ آ اِیش اِنت کہ اے نود درسد بلوچانی تہ ءَ انگت دہ درسد چوشیں بلوچ منتگ کہ بلوچ ءِ نام ءِ سر ءَ پھر بند اَنت۔ بلوچی زبان ءَ گپ جنگ ءَ پہ وت مزنیں ھبرے زان اَنت ءُ بلوچستان ءَ بلوچ گلزمین ءُ سرڈگار ءِ نام ءَ توار جن اَنت ۔ اے توار چوش برز نہ اِنت کہ واکدارانی گوشاں کر بہ کنت بلے اے مگسکی وز وز ءِ داب ءَ ھم کم کم ءَ معنی داریں آوازے ءَ بدل بوگ ءِ صفت ءُ خاصیت دار اِیت ۔ اے وز وز ءِ پژدر ءَ ھم چَہ رودرتکی بلوچستان ءَ شنگ بوتگیں لبزانکی ءُ سیاسی نبشتانک ، نوار ءُ دگہ شنگاری مواد اَنت ۔
رودرتکی بلوچستان ءَ ءُ ھم روکپتی ءَ سرکار ءَ بلوچ زمین ءِ بھر کنگ ءُ بلوچاں چَہ آئی ءِ پجار ءَ زِبھر کنگ ءِ چد ءُ پیش ھم سوبمندیں تجربہ کرتگ ۔ لیردپ ءَ گر داں بندرعباس ءَ بلوچ سرڈگار سستگ ءُ ھرمزگان ءِ نام ءَ اُستان اَڈ داتگ ھمے پیم لھتیں زمین سستگ ءُ کرمان ءَ ھوار ترینتگ ۔ آنگو پنجابیاں بلوچانی آبادتریں زمین پچ گیپتگ ( ڈیرہ جات ) اَنت ۔ ڈیرہ غازی خان گوں پنجاب ءُ ڈیرہ اسماعیل خان پٹھاناں بکشتاتگ ( بژن کہ پہ ایشانی دارگ ءَ رودرتکی بلوچاں ھم ھچ زور نہ جتگ ) ۔ روکپتی بلوچستان ءِ تہ ءَ زابلی ءُ رودرتکی بلوچستان ءِ تہ ءَ پٹھانانی ھوار دیگ ءَ آھاں اے گْشگ ءِ جواز رستگ کہ بلوچستان ءَ مئے حق ھم ھوار اِنت۔
ھما زمین کہ سندگ ءُ دگہ نام دیگ بوتگ اَنت آ گیشتر بلوچاں وت ھم شموشتگ اَنت کہ مئیگ اَنت بلکیں آ ھند ءَ بوتگیں آبادکاری ءِ سبب ءَ بلوچ آرت ءِ تہ ءَ واد ءِ کساس ءَ رستگ ءُ ھمے سرپد بنت کہ ما چَہ پَشت کپتگیں بلوچستان ءَ مھاجرت کتگیں مردم اِیں کہ اَتکگ ءُ اد ءَ جاھمند بوتگ اِیں ۔آھانی نندگ ءُ پادایگ ، سیاست ءُ فکر درس تر اِتگ ءُ گجراں ھمرنگ بوتگ اَنت ۔ نوں پہ آ زمینانی وتی نیمگ ءَ ترینگ ءَ پہ بلوچاں ھچ راھے نیست۔ اے یک انچیں تھلیں راستی یے چوش کہ عربانی دلبند ءِ سر ءَ چَہ عربانی نابودی ءَ جوڑ بوتگیں ازرائیل۔
لھتیں گش اَنت کہ چَہ پُل ءَ پُل ءِ نام ءِ سر کنگ ءَ '' پُل '' وتی جوھر ءَ بدل نہ کنت بلے راستریں ھبر اِیش اِنت کہ '' جوھر '' پہ وتا وت نام شوھاز کنت ۔ نام چیزانی جوھر ءُ پجار ءَ چیدگ کن اَنت ۔ '' پجار '' بے نام ءَ نہ بیت پمیشکا ایرانی گجراں شور کرتگ کہ اگاں چَہ بلوچاں مدامی ایمن بوگ لوٹ ئے گڑا بلوچ ءِ نام ءَ سر بہ کن ءُ آئی ءَ گوں وتا انچوش ھوار ترین کہ زانت مہ کنت آ کے بوتگ ۔
راج ءِ پجار ھم ھمیش اِنت کہ '' یک جتائیں زمین ٹکے ءَ نندوکیں مچی یے کہ آئی ءِ راجی لوٹ چَہ دگہ مچیاں گستائی کن اَنت '' پمیشکا بلوچستان کہ بھر بہ بیت ءُ دگہ چار مچیانی تہ ءَ ھوار بہ بیت آ ھانی لوٹ ءُ سسیاسی گزر جتا بنت پد ءَ آھانی نام ءُ پجار ھم بدل بنت ۔انچوش کہ روکپتی بلوچانی بلوچی پامیل پچ گرگ ءُ آھاں گجریءُ وتگڑی پامیل دیگ بوتگ ءُ آ ھمیشانی سر ءَ وتا ءَ معارفی کنائین اَنت ۔ اے پامیلانی تہ ءَ لھتیں سبک ءُ بدیں پامیل ھم ھست بلے آ چَہ اے زانت ءَ ھم زِبھر اَنت ءُ ایشانی بدل کنائینگ ءِ آئینی راھبند ءَ ھم روگ ءَ چَہ وتا ترس اَنت ۔ ھمے پیم ایرانی آئین ءَ راہ ھست کہ بلوچ وتی دپتری ناماں آھانی نامانی دپترءَ ثبت بہ کنائین اَنت بلے ایشاں وتا ثبت اھوال ءَ نشتگیں زابلیانی دست ءَ لیبوک کرتگ کہ پہ بلوچی نام ءَ وتی دیم ءَ کرچک کن اَنت ءُ گش اَنت کہ اے نام آھانی لڑ ءَ ھوار نہ اَنت پمیشکا زالبلیانی واکداری ءَ بلوچی نام زورگ ھم اجازت نیست۔
ھالانی رِد ءَ گجراں پہ روکپتی بلوچستان ءِ بھر کنگ ءَ سئے شور ءُ سوج دیم ءَ کتگ
چندیں سرپدیں بلوچ کہ بلوچستان ءِ گوریچانی دمگ ءَ بوتگ اَنت ءُ سیاسی چست ءُ ایراں سرپد اِت اَنت ۔آھاں پہ وتا زرباری بلوچستان ءَ رسینگ ءُ چَہ اے جاوراں سوت زورگ ءِ بدل ءَ جند کَشتگ ءُ یک پہ یک درانڈیھ بو تگ اَنت چَہ آھانی روگ ءَ سیاسی پڑ ھورک بوتگ ۔ ایرانی رژیم ءَ جاہ کنگ ءَ گوں ملا بوگ ءِ سبب ءَ پہ وتا ملائیں ھمکار درگیپتگ ءُ بلوچستان ءِ سیاست ءِ پڑ ھمیشانی دست ءَ داتگ ۔ ملا ھاں چَر ایشی ءَ سوب کرتگ ءُ پہ ھماھاں قھر خداوندی جوڑ بوت اَنت کہ آھانی نز ءَ کمیونسٹ ، بے دین ءُ شیطان اِت اَنت ۔ سیاسی سنچداریں مردماں کہ بلوچستان ءِ گوریچانی نیمگ ءَ کسانیں کساسے ءَ مُچ اِت اَنت ، اے جاورانی دیمپانی ءَ انقلابی شوربندی کت نہ کت بلکیں لڈ ءُ بوجار ءِ آسانیں راہ زُرت ءُ پھلوی رژیم ءِ تتکگیں مردمانی سرپ ءَ ھوار بوت اَنت ۔
ملا ھاں پہ مفت رَستگیں سیاسی سوت ءُ نپانی دارگ ءُ وتا ایرانی رژیم ءِ شرتریں ھمکار منارینگ ءَ یک ترس ءِ جاورے ودی کت ۔ کم کم ءَ اے ھیال روکپتی بلوچانی دل ءَ تیجار بیت کہ گوں ایرانی رژیم ءَ سر پہ سری پد نہ بوتگیں ھبرے ۔ ملاھاں زور جت کہ بلوچانی پجار کہ بلوچیت اِنت گوں سنی ءَ بدل بہ بیت ۔ پہ نوکیں رژیم ءَ اے ھبر چَہ بلوچانی بلوچ بوگ ءَ وشتریں ھبرے اَت کہ آئی ءِ شیعہ بوگ ءُ شیعہ ازم ءِ دیمروی ءِ کاراں سکین دنت ۔
امریکہ ءَ ایرانی تھی سیاست ءُ جیڑھانی سر ءَ مدام دزمانجنی کتگ ، ایران ءَ ھمائی ءِ دزمانجنی ءِ سبب ءَ ملاھاں موہ رست کہ سیکولرءُ لبرل مردمانی آشوب ءَ آوار بہ جن اَنت ۔ وھدے کہ آیوکیں رژیم پہ آٴئی ءِ سوتاں ھمدپ نہ بوت گڑا آٴئی ءَ پھلوی رژیم ءِ تتکگیں مردمانی پلہ مرزی کنگ بنا کت ۔ روکپتی ملک پہ ایرانی درانڈیھاں مھروان بوت اَنت ۔ بلوچ ھمیشانی رَم ءَ گون کپت اَنت بلے بلوچاں چوشیں جاھے نہ رستگ کہ آ وتی راجی توارءَ جوان ءُ جتائیں رنگے ءَ چست کرت بہ کن اَنت ۔ پہ ایران ءِ رژیم ءِ ایر جنگ ءَ روکپتی ملکاں بازیں ٹی وی ءُ ریڈیو ھست بلے پہ روکپتی بلوچستان ءِ مردماں کس ءَ چوشیں کمکے زرت نہ کت کہ چَہ ڈن ءَ اد ءَ نشتگیں سیاسی بلوچانی سنچ ءِ گیش کنگ ءُ سرپدی ءَ کار ئِے کنگ بہ بیت ۔ اے پیم درانڈیھ بوتگیں بلوچ گوں زمین ءُ سیاست ءَ سست ءُ گار بوت اَنت ۔ پہ نام گیپت ءَ دنیگت لھتیں گل ھست کہ کار کنگ ءَ اَنت بلے آھانی چست ءُ اِیرانی جاہ ایوک انٹرنیٹ اِنت ءُ دنیگت رودرتکی بلوچستان ءِ کار کنوک چَہ آھاں سک دیم ءَ اَنت ابید چَہ ایشی ءَ کہ نوکیں باریگ ءَ نوکی دہ سال اِنت کہ آ ھاں دنیا ءِ دیم ءَ وتی توار چست کتگ ءُ نوکیں رسانکدر ءَ کارمرد کنگ ءَ اَنت ۔ آھانی توار ءُ ککارانی تہ ءَ ابید چَہ ایشی ءَ کہ آ وت روکپتی بلوچستان ءِ نام ءَ گر اَنت ، روکپتی بلوچستان چیر تر اِتگ ۔
رودرتکی بلوچستان ءِ مردماںی سوبمندی ءِ سبب اِیش اِنت کہ آھاں وتی سیاسی چست ءُ ایرانی بنجل وتی گلزمین جوڑ کتگ ءُ آھانی درانڈیھیں سنگت مدام گوں وتی ملکی سنگتاں ھمگرنچ ءُ ھم شور بوتگ اَنت ۔ سیاست ھما تب ءَ کہ ملکی مردماں لوٹ اِتگ ھما گشت ءَ شتگ نہ کہ واب ءُ وشمنیانی تہ ءَ آھاں وتی وھد گوازینتگ ۔
روکپتی بلوچستان ءَ لبرل ءُ سیکولر سیاست مدارانی زمین ءِ سر ءَ وتی مردم نہ بوگ ءِ سبب ءَ آھاں ھم پہ لاچاری ملا وتی پیشوک من اِت اَنت ۔ چَہ ایشی ءَ رُستگیں جند اللہ کہ یک ترندگیریں رنگے ءَ دیم ءَ اَتک ، آھانی تیوکیں سیاسی جھد ءِ دیم ءَ بروک ءِ ھساب ءَ دنیا ءَ نامدار بوت ۔ بلے جنداللہ ءِ جند یک مانگیش اِتگیں گلے ۔ آئی ءَ وتی لوٹانی تہ ءَ وتا پہ روکپتی ملکانی سوت ءُ نپاں کار کنوکیں گلے نشان داتگ۔ آھاں جنداللہ پہ ایران ءِ مھلوکانی حقانی گروکیں گلے ءَ دنیا ءِ دیم ءَ پجاروک کنگ ءِ جھد کتگ ءُ بلوچانی تہ ءَ سنی بلوچانی وتکواکی ءَ کارکنوکیں گلے پیش داشتگ ۔ بلے دومی نیمگ ءَ راستی اِیش اِنت کہ جنداللہ ءَ پاکستانی آئی ایس آئی ، امریکہ ءُ سعودی عرب ءِ پلہ مرزی گون بوتگ ۔ چَہ ایشانی راہ ءَ ابید جنداللہ ءَ وتی جند ءِ سیاسی لیکوانی گیش ءُ گیوار ءَ سوبمند نہ بوتگ ءُ ھمے پیم مالک ریکی ءِ چَہ ایران ءِ دست ءَ یک پراسراریں دزگیری ءَ گوں اے گَل ءِ نام ءُ توار جھل شت ۔
چَہ جنداللہ ءَ اُوست بندوکیں ڈن ءَ نشتگیں بلوچاں باز وس کت کہ جنداللہ آھانی نظر ءُ راھبندانی قالب ءَ بے رَج اِیت۔ آھاں جنداللہ ءِ نام ءِ سرکنگ ءُ بلوچ ریزسٹینس موومنٹ ءِ ایرکنگ ءِ ھم گپ جت ءُ برے آئی ءِ گوں رودرتکی بلوچاں ھمدست بوگ ءِ ھبر دیم ءَ آورت بلے ھچ سوبمندی نہ بوت ۔ ڈن ءَ نشتگیں لھتیں بلوچانی سکین ءَ رودرتکی بلوچانی سیاسی مچی بلوچ نیشنل فرنٹ ءَ مالک ریکی ءِ پلہ مرزی ءَ توار چست کت بلے اے گپ ءِ سر ءَ ھمے مچی ءِ مستریں بَھر ءُ گلاں گوں ترندی ءَ ایراد گیپت ءُ اے ھبر تچک کت کہ ما را گوں جند اللہ ءَ سیادی یے بِھ نہ بوتگ ءُ نہ کہ ھست ءُ ناں مئے جنگ ءِ بنیاد مذھب اِنت ۔ چَہ جنداللہ ءِ لھتیں مردمانی نیمگ ءَ ھم اے ایراد گرگ بوتگ کہ جنداللہ یک مذھبی گلے ءُ لھتیں مردم پہ زور ایشی ءَ بلوچ راجدوستانی گلے نامینگ لوٹ اِیت ۔ اے آسر ءَ رودرتکی بلوچستان ءُ روکپتی بلوچستان ءِ سیاست دو جتائیں رنگے ءَ دیم ءَ اَتک اَنت ۔
روکپتی بلوچستان ءِ لھتیں درانڈیھاں لوٹ اِتگ اَت کہ چَہ رودرتکی بلوچستان ءِ جاوراں سوت بہ زور اَنت ءُ دری دنیا ءَ اے بے منارین اَنت کہ روکپتی بلوچستان ءِ زرمبش ھم پہ آزادی ءَ چست بوتگ ءُ آ ایران ءَ تکانسر کت کن اَنت، بلے اے کار ءَ ھم آ سوبین نہ بوت اَنت۔ اد ءَ ابکہ کنوکیں ھبر اِیش اِنت کہ ڈنی کمک ءِ پشت ءَ بازیں روکپتی درانڈیھاں اے ھم سوج داتگ کہ رودرتکی بلوچستان ءِ واک ءُ توان پہ روکپتی بلوچستان ءَ کار بہ کنت کہ دنیا پہ اے بلوچستان ءِ آزادی ءَ گیشتر لوٹوک اِنت ءُ اے ھم کہ رودرتکی بلوچستان آزاد نہ بیت بلے اگاں روکپتی بلوچستان ءَ ھمے رنگ ءَ جھد دیم ءَ بئیت آ زوت آزات بیت ۔ آھانی تہ ءَ بازیناں رودرتکی بلوچستان ءِ جنگ ءِ سر ءَ ناوشی ھم درشانت ۔
رودرتکی بلوچستان ءِ بلوچاں ھمک نوبت ءِ سیاسی جاور ءَ گوں سرپدی ءَ وتی زرمبش دیم ءَ برتگ چوش نہ اِنت کہ آھاں اناگت ءَ گوں آجوئی ءِ جاک ءُ ککار ءَ دیم ءَ اَتکگ ءُ تپنگ اِش چست کتگ بلکیں گام گام ءَ دیم ءَ کنز اِتگ اَنت ۔ پاکستان ءِ آئین ءُ راھبندانی تہ ءَ ھم پہ وتی راجی ءُ سیاسی حق ءُ واکانی پچ گرگ ءَ پاکستان ءِ دگہ گلاں ھمکار ءُ ھمدست بوتگ اَنت ۔ راجدوستیں سیاسی گلاں چَہ جنگ ءِ شُور دیگ ءَ پیش مھلوک پہ راجی سوت ءُ گزراں ھم پت کتگ اَنت پمیشکا سرجمیں دنیا ءَ گورے گوں پاکستان ءَ زور جتگ کہ بلوچ چَہ آجوئی ءَ دست کش بہ بنت بلے آھاں وتی تپنگ دور داتگ نہ کہ پاکستان ءِ دیم ءَ سر جھل کتگ ھمے مھکمی ءِ برورد اِنت کہ مروچی دنیا بلوچ ءِ گپانی گوشدارگ ءَ ساڑی اِنت ءُ بلوچستان ءِ جیڑہ ءِ سر ءَ دلگوش دیگ بوگ ءَ اِنت ۔
رودتکی بلوچستان ءِ جاور ءِ سر ءَ روکپتی بلوچستان ءِ سرپد بوگ یک ناراھیں باوستے ، پاکستان ءُ پنجابی ءِ گوں بلوچاں سیادی ءُ ایرانی گجرانی گوں بلوچاں نند ءُ نیاد باز دگری کن اَنت ۔ پنجاب دپتری ھساب ءَ چَہ ھاکمی ءِ رِپکاں نابلد اِنت ۔ پنجاب ءِ تہ ءَ سد ھزار سالانی دپتر ءَ ایوک دو نامداریں ھاکم راجہ پورس ءُ رنجیت سنگھ ءِ نام گرگ کرز اَنت ۔ ءُ اے یک راستی یے کہ بلوچ چَہ بن ءَ ایران زمین ءِ مردم اِنت ، آریا پدریچ ءَ نہ ایوک ایران زمین ءِ سر ءَ ھاکمی کتگ بلکیں میان رودرتک ءِ بازیں ملک ھم وتی دست چیر ءَ آورتگ ءُ ھندوستان ءَ وتی نوکیں ربیدگی ریشگ جتگ اَنت ۔
بلوچ چَہ گجراں انوشیروان ءِ زمانگ ءَ سیاسی ناتپاکیانی سبب ءَ سرسند بوتگ اَنت ءُ کم کم ءَ وتی پجار اِش مھکم کنان کتگ ۔انوگیں مھکمیں پجار ءِ واھندیں بلوچ الم چَہ دنیا ءَ ھمے لوٹ کنت کہ آ گوں وتی بلوچی نام ءَ زانگ ءُ منگ بہ بیت بلے الم نہ اِنت کہ بلوچ گوں دگہ راجاں ھم پنجابی ءِ داب ءَ وتی حق ءُ پجار ءَ پہ کشت ءُ کشار بہ گیپت ۔انچوش رودرتکی بلوچستان ءَ ھمدپیں بلوچ زمین کہ اوگانستان ءَ ھوار تر اِتگ پہ آھانی پدترینگ ءَ بلوچ گوں اوگاناں براتی جیڑہ ءُ سنگتے ءِ راھے کشگ ءَ دلمانگ اِنت نہ کہ پہ جنگ ءُ ھون ریچی ۔ ھمے پیم اے سوج کہ بلوچ گوں گجراں ھم پہ مِڑ ءُ جنگ وتی مال ءُ مَڈیاں پد بہ ترین اِیت یک مشکل تریں کارے ۔ پہ ایشی ءَ ناں کہ ایران چَہ پاکستان ءَ تمرد ءُ واکمند اِنت ءُ اد ءَ کس سر چست کرت نہ کنت بلکیں تھل ءُ راستیں ھبر اِیش اِنت کہ بلوچ بود آ کچ ءَ نہ رُستگ کہ آ پہ یک آشوبی جھدے ءَ تپاک بہ بیت اگاں اِد ءِ بلوچاں کمتریں بودے مان بوت اِنت ایشاں دگہ ھچ پہ رودرتکی بلوچاں دلبڈی کمکے گوں کتگ اَت بلے ایشی ءَ سوچ اد ءَ بلوچ ھمے گمان ءَ دلترک ءُ دلوارگ اَنت کہ چوش مہ بیت آ نیمگ ءِ جنگ ءِ اثر اے نیمگ ءَ ھم بہ کپ اِ یت پرچا کہ اد ءِ بلوچ گیشتر زردار ءُ لاپ سیر اِنت ۔ ورنا گوں تریاک ءُ باپور ءَ سر ءُ چیراَنت۔
اد ءَ بلوچ ھمے نازانتکاری ءِ تہ ءَ اِنت کہ ایران ءِ تہ ءَ ھچ رنگیں سیاسی چست ءُ ایر بوت نہ کنت بلے اے یک ناراست ءُ دروگیں ھبرے پرچاکہ ایران ءِ آئین ءِ تہ ءَ حزب جوڑ کنگ ءُ پہ وتی آسراتی ءُ لوٹاں کار کنگ ءِ حق ھست ۔ ملا کہ '' شیعہ سنی '' کینگ ءِ آچ ءِ بالینگ ءَ ھچ موہ پشت نہ دئے اَنت آھاں اے ھبر چیر داتگ ۔
بلے نوں ھما دہ درسد مردم کہ آھاں وتی دلانی تہ ءَ وتی پجار زندگ داشتگ بہ گندئے چد ءُ دیم بے ترک ءُ توار مہ بنت ءُ الم آھاں اے ذمہ واری پیلو کنگ لوٹ اِیت ءُ ھما راہ کہ ملاھاں پہ آھاں ڈنگر کتگ اَنت آھاں پاک کناں روکپتی بلوچاں ایران ءِ سیاست ءَ یک گستائیں پجارے بہ دئے اَنت ۔ اے سرپدیں مردم ناسرپدیں رنگے ءَ جاہ مہ جن اَنت ءُ نہ کہ رودرتکی بلوچستان ءِ گاماں بہ زور اَنت بلکیں پہ زانت ءُ سرپدی ایران ءِ ھما سیاسی واک ءُ مردماں ھمدست بہ بنت کہ چَہ آھانی کمک ءَ آ پہ وتی توار ءِ چست کنگ ءَ سوبمند بوت کن اَنت ۔ ایران ءِ آیوکیں انتخاب ءِ سر ءَ سرجمیں دنیا ءِ چم سک اَںت کہ بہ گندئے چَہ ایشی ءَ رژیم ءِ ھلاسی ءَ راھے پچ بہ بیت بلے زمین ءِ سر ءَ دنیگت چوشیں نشانی نیست کہ بلوچ وش واب ءُ ایمن بہ بیت ۔ نہ کہ دری دنیا ءِ کمک ءِ واھستاری پہ سیاسی مردماں جوانیں کارے بلکیں سیاسی سنچداریں مردم گوں نزیک تریں مردماں گپ جنگ ءُ وتی پجار ءِ جیڑہ ءَ پیش کنگ ءَ راھے بے شوھاز اَنت۔ اگاں بلوچاں ایرانی رژیم اے ھبر منارینت کہ بلوچستان ءِ بھر ءُ بانگ کنگ پہ آھاں یک نوکیں جیڑھے چست کنت ءُ ایمنیں بلوچ پہ شُور زورگ ءَ ھچ دیر نہ کن اَنت پرچا کہ دنیا ءِ گیشتر ملک پہ ایران ءَ ناوش اِنت ءُ ایران رژیم وتی گرانتریں دور ءَ گوازینگ ءَ اِنت پمیشکا پہ ایرانی رژیم ءُ بلوچ ھردو گھتر ھمیش اِنت کہ وتا جنگ ءِ آس تہ ءَ دور دیگ ءِ بدل ءَ یک دومی ءِ ھبراں گوش بہ دار اَنت ۔ اَگاں بلوچ ھمت بہ کن اَنت پہ ایران ءَ ھم جوانتریں راہ بلوچانی گپ ءِ زورگ اِنت ناں کہ آ چَہ اے کسانیں جیڑہ ءَ وتا مستریں جیڑھے پاد کنگ پہ ایران ءَ سوتمند اِنت ۔ اے ھبر ءَ بلوچ ءُ ایران ھردو بہ زان اَنت کہ ایران ءِ سیمسراں ھمدپیں واک کہ وتا ایران ءِ دوزواہ گش اَنت ھم ایرانی رژیم ءَ گپچلی ءَ دور دیگ ءُ بلوچاں میڑینگ ءَ پندل کنگ ءَ چَک ءُ پد نہ بنت ۔ اے واکاں پیش ءَ ھم ایران ءِ سوتانی خلاف کار کرتگ ءُ دیمتر ءَ ھم انچوش کن اَنت بلے اگاں ایران انوں ھم بلوچ ءَ کہ باز دلچل ءُ دلتنگ کنگ بوتگ اَنت شر پجا بیار اِیت ءُ بہ زانت کہ بلوچ ءِ مذھب ءُ راجی گستای پہ آئی ءِ وجود ءَ ھچ رنگیں خطر نہ اِنت بلکیں چَہ بلوچانی ساکم ءُ ایران ءِ گموار بوگ ءَ آ چَہ اے نیمگ ءَ پہ جنگ ءَ سر گیپتگیں واکاں اطمینان بوت کنت۔ بلے بئے ھمیش اِنت کہ بلوچ ھم پہ ملک ءِ سیاسی شَوراں ھم پت کنگ بہ بنت۔ پہ ایران ءِ رژیم ءِ سرپد کنگ ءَ ورناہ یک مزنیں کردارے ادا کت کن اَنت اگاں آھاں وتی تہ ءَ سیاسی بودشت آورت۔
اے کار پہ ملاھاں کہ نوں بلوچ ورنا ھانی ستک چَہ آھاں نزور بوتگ ھم یک چکاسے کہ آ وتی پیشوکی اُگدہ ءَ سوبمند بنت ءُ اے پیش نھاد ءِ خلاف کہ دنیگت آھاں ھچ رنگیں توارے چست نہ کتگ ءُ اے ھبر سنگین نہ زرتگ، چست بنت یا انگت ھمے دروگ ءَ بندان کن اَنت کہ رژیم بلوچ راج ءِ دژمن نہ اِنت بلکیں '' سنیانی '' دشمن اِنت؟
بوت کنت کہ ایشی ءِ سر ءَ ایراد گروکیں بلوچانی لگتمال کنگ ءُ دارگ ءَ ایرانی رژیم وتی ھمساھگیں عربانی راہ ءَ بروت ۔ کشت ءُ کشار ءُ گر ءُ گار کنگ ءَ اگاں بلوچ راج بہ کٹ اِت اِنت گڑا انوشیروان ءِ باریگ ءَ کٹ اِتگ اَت یا رودرتکی بلوچستان ءِ جھد دیریں آسر بوتگ اَت ۔ بلے اے راہ ءَ بلوچ وتی پاداں مہ روت ءُ گجراں اے گشگ ءَ موہ مہ رس اِیت کہ بلوچاں راہ ءُ راھبند پروشتگ اَنت بلے اے ھبر ءَ بہ زانت کہ اَگاں آ بے توار بہ بیت گڑا ھرکس زانت کہ آ وتی بیگواھی وش اِنت۔
دلگوش : اے نوشتانک بام ھال نوشتانک ءِ تندجاھی ڈس ءَ دیم دیگ بوتگ کہ پھک نویس ءَ پد شنگ کنگ بوتگ ۔ اے نوشتانک ءِ تہ ءَ نویس اِتگیں ھبر ءَ گوں بام ھال ءِ تپاکی المی نہ اِنت۔
من اے ھبر ءَ پھک ءَ رَد نہ کن آں کہ ایران ءِ نوکیں رژیم ءَ پہ بلوچانی آزادی ءُ وتکواکی ءِ پچگرگ ءَ لانک نہ بستگ البت من اے ھبر ھم سما کتگ کہ وت بلوچاں ھم اے سی سال ءِ دارجیں مدت ءَ پہ وتی وتکواکی ءُ کم کم ءَ کوردیم بوتگیں راجی پجار ءِ دارگ ءَ چوشیں توجیل نہ کتگ کہ یات کنگ بہ بنت ۔ دانگ دانگ ، بے راھبند چَہ سیاسی سنچ ءَ زِبھریں کار نہ نشان دیگ بنت ناں جاور ءُ چاگردی تب ءِ مٹائینگ ءِ توان دار اَنت پمیشکا آ شمارنہ بنت ۔
بلوچانی ، ناوانندگی ، ناسرپدی ءُ ترس ءِ سبب ءَ بلوچ دژمنیں زابلی ءُ معتصبیں شیعایاں بلوچستان ءَ وتی آبادی ءِ انتقال دیگ ءَ آسانی بوتگ ۔ بلوچستان ءِ زرخیر ءُ آبادیں زمین بے جست ءُ پرس ءَ پلگ ءُ برگ بوتگ اَنت ۔ زرباری بلوچستان ءَ داں راسک ءَ بہ گر گْوتر ءَ چَہ دولت ءِ زَراں بلوچانی زمینانی سر ءَ جوڑ بوتگیں شرکت ءُ کارجاہ بے جست ءُ پرس بہ عنوان امتیاز گجراں دیگ بوتگ اَنت ۔ بلوچ پہ زور انچیں کارانی نیمگ ءَ تیلانک دیگ بوتگ اَنت کہ دولت آھاں قاچاق فروشی ءُ دزی ءِ نام دنت ، پہ اے کار ءَ ھم دولت ءَ ھچ رنگیں زور پکار نہ بوتگ پرچا کہ اد ءَ کس ءَ ھم نہ دیستگ کہ بلوچ ایشانی دیم ءَ میلانک اَنت ۔
بلوچستان گوں وتی مڈیاں پہ گجراں مال ء غنیمت ءِ بستار دار اِیت ۔ اے چَہ مڈیاں سر ریچیں گلزمین ءَ ھرچے کہ آ کنگ بہ لوٹ اَنت آھانی دیم ءِ داروک کس نیست بلے یک ترسے کہ آھانی دل ءَ نشتگ آ اِیش اِنت کہ اے نود درسد بلوچانی تہ ءَ انگت دہ درسد چوشیں بلوچ منتگ کہ بلوچ ءِ نام ءِ سر ءَ پھر بند اَنت۔ بلوچی زبان ءَ گپ جنگ ءَ پہ وت مزنیں ھبرے زان اَنت ءُ بلوچستان ءَ بلوچ گلزمین ءُ سرڈگار ءِ نام ءَ توار جن اَنت ۔ اے توار چوش برز نہ اِنت کہ واکدارانی گوشاں کر بہ کنت بلے اے مگسکی وز وز ءِ داب ءَ ھم کم کم ءَ معنی داریں آوازے ءَ بدل بوگ ءِ صفت ءُ خاصیت دار اِیت ۔ اے وز وز ءِ پژدر ءَ ھم چَہ رودرتکی بلوچستان ءَ شنگ بوتگیں لبزانکی ءُ سیاسی نبشتانک ، نوار ءُ دگہ شنگاری مواد اَنت ۔
لھتیں گش اَنت کہ چَہ پُل ءَ پُل ءِ نام ءِ سر کنگ ءَ '' پُل '' وتی جوھر ءَ بدل نہ کنت بلے راستریں ھبر اِیش اِنت کہ '' جوھر '' پہ وتا وت نام شوھاز کنت ۔ نام چیزانی جوھر ءُ پجار ءَ چیدگ کن اَنت ۔ '' پجار '' بے نام ءَ نہ بیت پمیشکا ایرانی گجراں شور کرتگ کہ اگاں چَہ بلوچاں مدامی ایمن بوگ لوٹ ئے گڑا بلوچ ءِ نام ءَ سر بہ کن ءُ آئی ءَ گوں وتا انچوش ھوار ترین کہ زانت مہ کنت آ کے بوتگ ۔
راج ءِ پجار ھم ھمیش اِنت کہ '' یک جتائیں زمین ٹکے ءَ نندوکیں مچی یے کہ آئی ءِ راجی لوٹ چَہ دگہ مچیاں گستائی کن اَنت '' پمیشکا بلوچستان کہ بھر بہ بیت ءُ دگہ چار مچیانی تہ ءَ ھوار بہ بیت آ ھانی لوٹ ءُ سسیاسی گزر جتا بنت پد ءَ آھانی نام ءُ پجار ھم بدل بنت ۔انچوش کہ روکپتی بلوچانی بلوچی پامیل پچ گرگ ءُ آھاں گجریءُ وتگڑی پامیل دیگ بوتگ ءُ آ ھمیشانی سر ءَ وتا ءَ معارفی کنائین اَنت ۔ اے پامیلانی تہ ءَ لھتیں سبک ءُ بدیں پامیل ھم ھست بلے آ چَہ اے زانت ءَ ھم زِبھر اَنت ءُ ایشانی بدل کنائینگ ءِ آئینی راھبند ءَ ھم روگ ءَ چَہ وتا ترس اَنت ۔ ھمے پیم ایرانی آئین ءَ راہ ھست کہ بلوچ وتی دپتری ناماں آھانی نامانی دپترءَ ثبت بہ کنائین اَنت بلے ایشاں وتا ثبت اھوال ءَ نشتگیں زابلیانی دست ءَ لیبوک کرتگ کہ پہ بلوچی نام ءَ وتی دیم ءَ کرچک کن اَنت ءُ گش اَنت کہ اے نام آھانی لڑ ءَ ھوار نہ اَنت پمیشکا زالبلیانی واکداری ءَ بلوچی نام زورگ ھم اجازت نیست۔
ھالانی رِد ءَ گجراں پہ روکپتی بلوچستان ءِ بھر کنگ ءَ سئے شور ءُ سوج دیم ءَ کتگ
- دو اُستاناں بھر کنگ بہ بیت گوریچانی نیمگ ءَ '' بلوچستان ء شمالی '' کہ آئی ءِ بنجاہ دزاپ (زاھدان ) بیت ءُ '' بلوچستان ء جنوبی '' کہ آئی ءِ بنجاہ پھرہ ( زاھدان ) بیت۔ ایرانی سوجکارانی نز ءَ اے رنگ ءَ بلوچستان ءِ بھر کنگ پہ ادارکی ءُ گذارا اِنت نہ کہ پہ مدامی ءُ شریں رنگے ءَ اُستان ءِ بھر کنگ اِنت ۔ اے سوج پہ زاھدان ءِ مردماں ھم ھچ رنگ ءَ مناک نہ اِنت کہ آ گوں زابلیانی اکثریتی اُستان ءَ ھوار کنگ بہ بنت ۔
- سئے اُستانانی تہ ءَ بھر کنگ بہ بیت '' بلوچستان ء شمالی '' ( زاھدان ۔ خاش ۔ میرجاوہ) ۔ '' بلوچستان ء جنوبی '' ایرانشھر( پھرہ )۔ سرباز۔ دلگان ۔ نیکشھر ۔ چھبار۔ کنرک ۔ سراوان ۔ زابلی ءُ سیب سوران ) ءُ سیستان ( زابل ۔ زھک ءُ ھیر مند ) ۔ اے سوج گجراں چَہ اولیگیں سوج ءَ دوستر کتگ ۔
- چار بھر ءَ کنگ بہ بیت ۔ بلوچستان ءِ چار بھر ءَ کنگ ءِ سوج گجراں چَہ درساں گیشتر دوست بوگ ءَ اِنت ءُ بام ھال ءَ شنگ بوتگیں ایران ءِ مجلس شورای ءِ باسک یعقوب جدگال ءِ ھبراں ھم ھمے زانگ بیت کہ اے شور ءِ سر ءَ چَہ بلوچ جھگیرانی نیمگ ءَ ھم ھچ رنگیں اعتراض نہ بوتگ ۔ اے سوج گجراں پمیشکا دوست بیت کہ ایشی ءِ تہ ءَ بلوچستان ءِ نام چَہ بن ءَ گار گنگ بوتگ ۔بلوچستان ءِ بھر ءُ بانگ کنگ ءِ اے پیش نھاد ءِ پد ءَ سیستان ءُ بلوچستان ءِ انوگیں اُستان چار بھر ءَ کنگ بیت ۔
- سیستان : زابل ۔ زھک ۔ ھیرمند ۔ محمد آباد
- سرحد : زاھدان ۔ خاش ۔ میرجاوہ
- مکران : ایرانشھر۔ سرباز۔ سراوا ن ۔ سیب سوران ۔ مِھرستان ۔ دلگان ۔ پنوچ
- ساحلی : چھبار ۔ کنرک ۔ نیکشھر ۔ دشتیاری ۔ قصرقند ۔ راسک
چندیں سرپدیں بلوچ کہ بلوچستان ءِ گوریچانی دمگ ءَ بوتگ اَنت ءُ سیاسی چست ءُ ایراں سرپد اِت اَنت ۔آھاں پہ وتا زرباری بلوچستان ءَ رسینگ ءُ چَہ اے جاوراں سوت زورگ ءِ بدل ءَ جند کَشتگ ءُ یک پہ یک درانڈیھ بو تگ اَنت چَہ آھانی روگ ءَ سیاسی پڑ ھورک بوتگ ۔ ایرانی رژیم ءَ جاہ کنگ ءَ گوں ملا بوگ ءِ سبب ءَ پہ وتا ملائیں ھمکار درگیپتگ ءُ بلوچستان ءِ سیاست ءِ پڑ ھمیشانی دست ءَ داتگ ۔ ملا ھاں چَر ایشی ءَ سوب کرتگ ءُ پہ ھماھاں قھر خداوندی جوڑ بوت اَنت کہ آھانی نز ءَ کمیونسٹ ، بے دین ءُ شیطان اِت اَنت ۔ سیاسی سنچداریں مردماں کہ بلوچستان ءِ گوریچانی نیمگ ءَ کسانیں کساسے ءَ مُچ اِت اَنت ، اے جاورانی دیمپانی ءَ انقلابی شوربندی کت نہ کت بلکیں لڈ ءُ بوجار ءِ آسانیں راہ زُرت ءُ پھلوی رژیم ءِ تتکگیں مردمانی سرپ ءَ ھوار بوت اَنت ۔
ملا ھاں پہ مفت رَستگیں سیاسی سوت ءُ نپانی دارگ ءُ وتا ایرانی رژیم ءِ شرتریں ھمکار منارینگ ءَ یک ترس ءِ جاورے ودی کت ۔ کم کم ءَ اے ھیال روکپتی بلوچانی دل ءَ تیجار بیت کہ گوں ایرانی رژیم ءَ سر پہ سری پد نہ بوتگیں ھبرے ۔ ملاھاں زور جت کہ بلوچانی پجار کہ بلوچیت اِنت گوں سنی ءَ بدل بہ بیت ۔ پہ نوکیں رژیم ءَ اے ھبر چَہ بلوچانی بلوچ بوگ ءَ وشتریں ھبرے اَت کہ آئی ءِ شیعہ بوگ ءُ شیعہ ازم ءِ دیمروی ءِ کاراں سکین دنت ۔
امریکہ ءَ ایرانی تھی سیاست ءُ جیڑھانی سر ءَ مدام دزمانجنی کتگ ، ایران ءَ ھمائی ءِ دزمانجنی ءِ سبب ءَ ملاھاں موہ رست کہ سیکولرءُ لبرل مردمانی آشوب ءَ آوار بہ جن اَنت ۔ وھدے کہ آیوکیں رژیم پہ آٴئی ءِ سوتاں ھمدپ نہ بوت گڑا آٴئی ءَ پھلوی رژیم ءِ تتکگیں مردمانی پلہ مرزی کنگ بنا کت ۔ روکپتی ملک پہ ایرانی درانڈیھاں مھروان بوت اَنت ۔ بلوچ ھمیشانی رَم ءَ گون کپت اَنت بلے بلوچاں چوشیں جاھے نہ رستگ کہ آ وتی راجی توارءَ جوان ءُ جتائیں رنگے ءَ چست کرت بہ کن اَنت ۔ پہ ایران ءِ رژیم ءِ ایر جنگ ءَ روکپتی ملکاں بازیں ٹی وی ءُ ریڈیو ھست بلے پہ روکپتی بلوچستان ءِ مردماں کس ءَ چوشیں کمکے زرت نہ کت کہ چَہ ڈن ءَ اد ءَ نشتگیں سیاسی بلوچانی سنچ ءِ گیش کنگ ءُ سرپدی ءَ کار ئِے کنگ بہ بیت ۔ اے پیم درانڈیھ بوتگیں بلوچ گوں زمین ءُ سیاست ءَ سست ءُ گار بوت اَنت ۔ پہ نام گیپت ءَ دنیگت لھتیں گل ھست کہ کار کنگ ءَ اَنت بلے آھانی چست ءُ اِیرانی جاہ ایوک انٹرنیٹ اِنت ءُ دنیگت رودرتکی بلوچستان ءِ کار کنوک چَہ آھاں سک دیم ءَ اَنت ابید چَہ ایشی ءَ کہ نوکیں باریگ ءَ نوکی دہ سال اِنت کہ آ ھاں دنیا ءِ دیم ءَ وتی توار چست کتگ ءُ نوکیں رسانکدر ءَ کارمرد کنگ ءَ اَنت ۔ آھانی توار ءُ ککارانی تہ ءَ ابید چَہ ایشی ءَ کہ آ وت روکپتی بلوچستان ءِ نام ءَ گر اَنت ، روکپتی بلوچستان چیر تر اِتگ ۔
رودرتکی بلوچستان ءِ مردماںی سوبمندی ءِ سبب اِیش اِنت کہ آھاں وتی سیاسی چست ءُ ایرانی بنجل وتی گلزمین جوڑ کتگ ءُ آھانی درانڈیھیں سنگت مدام گوں وتی ملکی سنگتاں ھمگرنچ ءُ ھم شور بوتگ اَنت ۔ سیاست ھما تب ءَ کہ ملکی مردماں لوٹ اِتگ ھما گشت ءَ شتگ نہ کہ واب ءُ وشمنیانی تہ ءَ آھاں وتی وھد گوازینتگ ۔
روکپتی بلوچستان ءَ لبرل ءُ سیکولر سیاست مدارانی زمین ءِ سر ءَ وتی مردم نہ بوگ ءِ سبب ءَ آھاں ھم پہ لاچاری ملا وتی پیشوک من اِت اَنت ۔ چَہ ایشی ءَ رُستگیں جند اللہ کہ یک ترندگیریں رنگے ءَ دیم ءَ اَتک ، آھانی تیوکیں سیاسی جھد ءِ دیم ءَ بروک ءِ ھساب ءَ دنیا ءَ نامدار بوت ۔ بلے جنداللہ ءِ جند یک مانگیش اِتگیں گلے ۔ آئی ءَ وتی لوٹانی تہ ءَ وتا پہ روکپتی ملکانی سوت ءُ نپاں کار کنوکیں گلے نشان داتگ۔ آھاں جنداللہ پہ ایران ءِ مھلوکانی حقانی گروکیں گلے ءَ دنیا ءِ دیم ءَ پجاروک کنگ ءِ جھد کتگ ءُ بلوچانی تہ ءَ سنی بلوچانی وتکواکی ءَ کارکنوکیں گلے پیش داشتگ ۔ بلے دومی نیمگ ءَ راستی اِیش اِنت کہ جنداللہ ءَ پاکستانی آئی ایس آئی ، امریکہ ءُ سعودی عرب ءِ پلہ مرزی گون بوتگ ۔ چَہ ایشانی راہ ءَ ابید جنداللہ ءَ وتی جند ءِ سیاسی لیکوانی گیش ءُ گیوار ءَ سوبمند نہ بوتگ ءُ ھمے پیم مالک ریکی ءِ چَہ ایران ءِ دست ءَ یک پراسراریں دزگیری ءَ گوں اے گَل ءِ نام ءُ توار جھل شت ۔
چَہ جنداللہ ءَ اُوست بندوکیں ڈن ءَ نشتگیں بلوچاں باز وس کت کہ جنداللہ آھانی نظر ءُ راھبندانی قالب ءَ بے رَج اِیت۔ آھاں جنداللہ ءِ نام ءِ سرکنگ ءُ بلوچ ریزسٹینس موومنٹ ءِ ایرکنگ ءِ ھم گپ جت ءُ برے آئی ءِ گوں رودرتکی بلوچاں ھمدست بوگ ءِ ھبر دیم ءَ آورت بلے ھچ سوبمندی نہ بوت ۔ ڈن ءَ نشتگیں لھتیں بلوچانی سکین ءَ رودرتکی بلوچانی سیاسی مچی بلوچ نیشنل فرنٹ ءَ مالک ریکی ءِ پلہ مرزی ءَ توار چست کت بلے اے گپ ءِ سر ءَ ھمے مچی ءِ مستریں بَھر ءُ گلاں گوں ترندی ءَ ایراد گیپت ءُ اے ھبر تچک کت کہ ما را گوں جند اللہ ءَ سیادی یے بِھ نہ بوتگ ءُ نہ کہ ھست ءُ ناں مئے جنگ ءِ بنیاد مذھب اِنت ۔ چَہ جنداللہ ءِ لھتیں مردمانی نیمگ ءَ ھم اے ایراد گرگ بوتگ کہ جنداللہ یک مذھبی گلے ءُ لھتیں مردم پہ زور ایشی ءَ بلوچ راجدوستانی گلے نامینگ لوٹ اِیت ۔ اے آسر ءَ رودرتکی بلوچستان ءُ روکپتی بلوچستان ءِ سیاست دو جتائیں رنگے ءَ دیم ءَ اَتک اَنت ۔
روکپتی بلوچستان ءِ لھتیں درانڈیھاں لوٹ اِتگ اَت کہ چَہ رودرتکی بلوچستان ءِ جاوراں سوت بہ زور اَنت ءُ دری دنیا ءَ اے بے منارین اَنت کہ روکپتی بلوچستان ءِ زرمبش ھم پہ آزادی ءَ چست بوتگ ءُ آ ایران ءَ تکانسر کت کن اَنت، بلے اے کار ءَ ھم آ سوبین نہ بوت اَنت۔ اد ءَ ابکہ کنوکیں ھبر اِیش اِنت کہ ڈنی کمک ءِ پشت ءَ بازیں روکپتی درانڈیھاں اے ھم سوج داتگ کہ رودرتکی بلوچستان ءِ واک ءُ توان پہ روکپتی بلوچستان ءَ کار بہ کنت کہ دنیا پہ اے بلوچستان ءِ آزادی ءَ گیشتر لوٹوک اِنت ءُ اے ھم کہ رودرتکی بلوچستان آزاد نہ بیت بلے اگاں روکپتی بلوچستان ءَ ھمے رنگ ءَ جھد دیم ءَ بئیت آ زوت آزات بیت ۔ آھانی تہ ءَ بازیناں رودرتکی بلوچستان ءِ جنگ ءِ سر ءَ ناوشی ھم درشانت ۔
رودرتکی بلوچستان ءِ بلوچاں ھمک نوبت ءِ سیاسی جاور ءَ گوں سرپدی ءَ وتی زرمبش دیم ءَ برتگ چوش نہ اِنت کہ آھاں اناگت ءَ گوں آجوئی ءِ جاک ءُ ککار ءَ دیم ءَ اَتکگ ءُ تپنگ اِش چست کتگ بلکیں گام گام ءَ دیم ءَ کنز اِتگ اَنت ۔ پاکستان ءِ آئین ءُ راھبندانی تہ ءَ ھم پہ وتی راجی ءُ سیاسی حق ءُ واکانی پچ گرگ ءَ پاکستان ءِ دگہ گلاں ھمکار ءُ ھمدست بوتگ اَنت ۔ راجدوستیں سیاسی گلاں چَہ جنگ ءِ شُور دیگ ءَ پیش مھلوک پہ راجی سوت ءُ گزراں ھم پت کتگ اَنت پمیشکا سرجمیں دنیا ءَ گورے گوں پاکستان ءَ زور جتگ کہ بلوچ چَہ آجوئی ءَ دست کش بہ بنت بلے آھاں وتی تپنگ دور داتگ نہ کہ پاکستان ءِ دیم ءَ سر جھل کتگ ھمے مھکمی ءِ برورد اِنت کہ مروچی دنیا بلوچ ءِ گپانی گوشدارگ ءَ ساڑی اِنت ءُ بلوچستان ءِ جیڑہ ءِ سر ءَ دلگوش دیگ بوگ ءَ اِنت ۔
رودتکی بلوچستان ءِ جاور ءِ سر ءَ روکپتی بلوچستان ءِ سرپد بوگ یک ناراھیں باوستے ، پاکستان ءُ پنجابی ءِ گوں بلوچاں سیادی ءُ ایرانی گجرانی گوں بلوچاں نند ءُ نیاد باز دگری کن اَنت ۔ پنجاب دپتری ھساب ءَ چَہ ھاکمی ءِ رِپکاں نابلد اِنت ۔ پنجاب ءِ تہ ءَ سد ھزار سالانی دپتر ءَ ایوک دو نامداریں ھاکم راجہ پورس ءُ رنجیت سنگھ ءِ نام گرگ کرز اَنت ۔ ءُ اے یک راستی یے کہ بلوچ چَہ بن ءَ ایران زمین ءِ مردم اِنت ، آریا پدریچ ءَ نہ ایوک ایران زمین ءِ سر ءَ ھاکمی کتگ بلکیں میان رودرتک ءِ بازیں ملک ھم وتی دست چیر ءَ آورتگ ءُ ھندوستان ءَ وتی نوکیں ربیدگی ریشگ جتگ اَنت ۔
بلوچ چَہ گجراں انوشیروان ءِ زمانگ ءَ سیاسی ناتپاکیانی سبب ءَ سرسند بوتگ اَنت ءُ کم کم ءَ وتی پجار اِش مھکم کنان کتگ ۔انوگیں مھکمیں پجار ءِ واھندیں بلوچ الم چَہ دنیا ءَ ھمے لوٹ کنت کہ آ گوں وتی بلوچی نام ءَ زانگ ءُ منگ بہ بیت بلے الم نہ اِنت کہ بلوچ گوں دگہ راجاں ھم پنجابی ءِ داب ءَ وتی حق ءُ پجار ءَ پہ کشت ءُ کشار بہ گیپت ۔انچوش رودرتکی بلوچستان ءَ ھمدپیں بلوچ زمین کہ اوگانستان ءَ ھوار تر اِتگ پہ آھانی پدترینگ ءَ بلوچ گوں اوگاناں براتی جیڑہ ءُ سنگتے ءِ راھے کشگ ءَ دلمانگ اِنت نہ کہ پہ جنگ ءُ ھون ریچی ۔ ھمے پیم اے سوج کہ بلوچ گوں گجراں ھم پہ مِڑ ءُ جنگ وتی مال ءُ مَڈیاں پد بہ ترین اِیت یک مشکل تریں کارے ۔ پہ ایشی ءَ ناں کہ ایران چَہ پاکستان ءَ تمرد ءُ واکمند اِنت ءُ اد ءَ کس سر چست کرت نہ کنت بلکیں تھل ءُ راستیں ھبر اِیش اِنت کہ بلوچ بود آ کچ ءَ نہ رُستگ کہ آ پہ یک آشوبی جھدے ءَ تپاک بہ بیت اگاں اِد ءِ بلوچاں کمتریں بودے مان بوت اِنت ایشاں دگہ ھچ پہ رودرتکی بلوچاں دلبڈی کمکے گوں کتگ اَت بلے ایشی ءَ سوچ اد ءَ بلوچ ھمے گمان ءَ دلترک ءُ دلوارگ اَنت کہ چوش مہ بیت آ نیمگ ءِ جنگ ءِ اثر اے نیمگ ءَ ھم بہ کپ اِ یت پرچا کہ اد ءِ بلوچ گیشتر زردار ءُ لاپ سیر اِنت ۔ ورنا گوں تریاک ءُ باپور ءَ سر ءُ چیراَنت۔
اد ءَ بلوچ ھمے نازانتکاری ءِ تہ ءَ اِنت کہ ایران ءِ تہ ءَ ھچ رنگیں سیاسی چست ءُ ایر بوت نہ کنت بلے اے یک ناراست ءُ دروگیں ھبرے پرچاکہ ایران ءِ آئین ءِ تہ ءَ حزب جوڑ کنگ ءُ پہ وتی آسراتی ءُ لوٹاں کار کنگ ءِ حق ھست ۔ ملا کہ '' شیعہ سنی '' کینگ ءِ آچ ءِ بالینگ ءَ ھچ موہ پشت نہ دئے اَنت آھاں اے ھبر چیر داتگ ۔
بلے نوں ھما دہ درسد مردم کہ آھاں وتی دلانی تہ ءَ وتی پجار زندگ داشتگ بہ گندئے چد ءُ دیم بے ترک ءُ توار مہ بنت ءُ الم آھاں اے ذمہ واری پیلو کنگ لوٹ اِیت ءُ ھما راہ کہ ملاھاں پہ آھاں ڈنگر کتگ اَنت آھاں پاک کناں روکپتی بلوچاں ایران ءِ سیاست ءَ یک گستائیں پجارے بہ دئے اَنت ۔ اے سرپدیں مردم ناسرپدیں رنگے ءَ جاہ مہ جن اَنت ءُ نہ کہ رودرتکی بلوچستان ءِ گاماں بہ زور اَنت بلکیں پہ زانت ءُ سرپدی ایران ءِ ھما سیاسی واک ءُ مردماں ھمدست بہ بنت کہ چَہ آھانی کمک ءَ آ پہ وتی توار ءِ چست کنگ ءَ سوبمند بوت کن اَنت ۔ ایران ءِ آیوکیں انتخاب ءِ سر ءَ سرجمیں دنیا ءِ چم سک اَںت کہ بہ گندئے چَہ ایشی ءَ رژیم ءِ ھلاسی ءَ راھے پچ بہ بیت بلے زمین ءِ سر ءَ دنیگت چوشیں نشانی نیست کہ بلوچ وش واب ءُ ایمن بہ بیت ۔ نہ کہ دری دنیا ءِ کمک ءِ واھستاری پہ سیاسی مردماں جوانیں کارے بلکیں سیاسی سنچداریں مردم گوں نزیک تریں مردماں گپ جنگ ءُ وتی پجار ءِ جیڑہ ءَ پیش کنگ ءَ راھے بے شوھاز اَنت۔ اگاں بلوچاں ایرانی رژیم اے ھبر منارینت کہ بلوچستان ءِ بھر ءُ بانگ کنگ پہ آھاں یک نوکیں جیڑھے چست کنت ءُ ایمنیں بلوچ پہ شُور زورگ ءَ ھچ دیر نہ کن اَنت پرچا کہ دنیا ءِ گیشتر ملک پہ ایران ءَ ناوش اِنت ءُ ایران رژیم وتی گرانتریں دور ءَ گوازینگ ءَ اِنت پمیشکا پہ ایرانی رژیم ءُ بلوچ ھردو گھتر ھمیش اِنت کہ وتا جنگ ءِ آس تہ ءَ دور دیگ ءِ بدل ءَ یک دومی ءِ ھبراں گوش بہ دار اَنت ۔ اَگاں بلوچ ھمت بہ کن اَنت پہ ایران ءَ ھم جوانتریں راہ بلوچانی گپ ءِ زورگ اِنت ناں کہ آ چَہ اے کسانیں جیڑہ ءَ وتا مستریں جیڑھے پاد کنگ پہ ایران ءَ سوتمند اِنت ۔ اے ھبر ءَ بلوچ ءُ ایران ھردو بہ زان اَنت کہ ایران ءِ سیمسراں ھمدپیں واک کہ وتا ایران ءِ دوزواہ گش اَنت ھم ایرانی رژیم ءَ گپچلی ءَ دور دیگ ءُ بلوچاں میڑینگ ءَ پندل کنگ ءَ چَک ءُ پد نہ بنت ۔ اے واکاں پیش ءَ ھم ایران ءِ سوتانی خلاف کار کرتگ ءُ دیمتر ءَ ھم انچوش کن اَنت بلے اگاں ایران انوں ھم بلوچ ءَ کہ باز دلچل ءُ دلتنگ کنگ بوتگ اَنت شر پجا بیار اِیت ءُ بہ زانت کہ بلوچ ءِ مذھب ءُ راجی گستای پہ آئی ءِ وجود ءَ ھچ رنگیں خطر نہ اِنت بلکیں چَہ بلوچانی ساکم ءُ ایران ءِ گموار بوگ ءَ آ چَہ اے نیمگ ءَ پہ جنگ ءَ سر گیپتگیں واکاں اطمینان بوت کنت۔ بلے بئے ھمیش اِنت کہ بلوچ ھم پہ ملک ءِ سیاسی شَوراں ھم پت کنگ بہ بنت۔ پہ ایران ءِ رژیم ءِ سرپد کنگ ءَ ورناہ یک مزنیں کردارے ادا کت کن اَنت اگاں آھاں وتی تہ ءَ سیاسی بودشت آورت۔
اے کار پہ ملاھاں کہ نوں بلوچ ورنا ھانی ستک چَہ آھاں نزور بوتگ ھم یک چکاسے کہ آ وتی پیشوکی اُگدہ ءَ سوبمند بنت ءُ اے پیش نھاد ءِ خلاف کہ دنیگت آھاں ھچ رنگیں توارے چست نہ کتگ ءُ اے ھبر سنگین نہ زرتگ، چست بنت یا انگت ھمے دروگ ءَ بندان کن اَنت کہ رژیم بلوچ راج ءِ دژمن نہ اِنت بلکیں '' سنیانی '' دشمن اِنت؟
بوت کنت کہ ایشی ءِ سر ءَ ایراد گروکیں بلوچانی لگتمال کنگ ءُ دارگ ءَ ایرانی رژیم وتی ھمساھگیں عربانی راہ ءَ بروت ۔ کشت ءُ کشار ءُ گر ءُ گار کنگ ءَ اگاں بلوچ راج بہ کٹ اِت اِنت گڑا انوشیروان ءِ باریگ ءَ کٹ اِتگ اَت یا رودرتکی بلوچستان ءِ جھد دیریں آسر بوتگ اَت ۔ بلے اے راہ ءَ بلوچ وتی پاداں مہ روت ءُ گجراں اے گشگ ءَ موہ مہ رس اِیت کہ بلوچاں راہ ءُ راھبند پروشتگ اَنت بلے اے ھبر ءَ بہ زانت کہ اَگاں آ بے توار بہ بیت گڑا ھرکس زانت کہ آ وتی بیگواھی وش اِنت۔
دلگوش : اے نوشتانک بام ھال نوشتانک ءِ تندجاھی ڈس ءَ دیم دیگ بوتگ کہ پھک نویس ءَ پد شنگ کنگ بوتگ ۔ اے نوشتانک ءِ تہ ءَ نویس اِتگیں ھبر ءَ گوں بام ھال ءِ تپاکی المی نہ اِنت۔
