ھال نویسی :
٭زبان چَہ لوزانکی زبان ءَ آسان تر بہ بیت ۔ ایشی ءَ مراد اے نہ اِنت کہ زبان ءِ زگری ءُ راھبندانی ھیالداری کنگ مہ بیت انچوش کہ گپ ءُ تران ءِ تہ ءَ کس اے ھیالداری ءَ نہ کنت بلکیں اِیش اِنت کہ چھر ءُ شبین کارمردءُ وش گپی کنگ مہ بیت ۔
ھال نویس یک ھالے ءِ درساں پیسر اَرزشمند تریں ھبر ءَ نویس اِیت چَہ آئی ءَ پد کمتر اَرزشمند ، چَہ آئی ءَکمتر ءُھمے رد ءَ ھال ءَ سرجم کنت۔ چوناھیا گشتانک دیوک ءُ ھبر کنوک یک برے انچائیں ھبر کنت ءُ گڈی ءَارزشمند تریں ھبر ءَ کاراِیت ۔اگاں سیاسی گلے لس مراگاھے لوٹائین اِیت درساں رند مستریں راھشون گپ جنت بلے ھال ءِ تہ ءَ درساں پیسر مستریں راھشون ءِ گپ بنت ءُ ھمے ھساب ءَ چَہ آئی ءَ رند چَہ آئی ءَ کستر بزاں مستری ءِھساب ءَ رِد کنگ بنت ۔ اگاں ھرجاپی (ھڑتال ) ءِ جار پرینگ بہ بیت ارزشمندیں ھالانی رد ءَ ھوار بیت ۔ پہ درور : گوادر: بلوچ گل ءِ لس دیوان ءِ تہ ءَ سرکار ءِ راھبندانی ایرجنگ ءَ باند ءَ سرجمیں بلوچستان ءَ دربندی ءُ پرگ بندی ءِ جار پرینگ بوتگ ۔اے رِد ءَ گوں مھلوک ءَ گپ کنان ءَ گل ءِ کماش ءَ گوشتگ ، پد ءَ گشتانک ءِ آدگہ بھراں ارزشمندی ءِ ھساب ءَ رِد ءُ بند بہ دئے نہ کہ آئی ءِ گوشگ ءِ ھساب ءَ۔ .
٭ ھما شھرءُھند کہ گوں ھال ءَ بندوک اِنت ۔ ھال ءَ پیش ھما ئی ءِنام دیگ بیت ۔ پہ درور ” گوادر “ چَہ آئی ءَپد بریکٹانی میان ءَھال دیوک ءِ نام دیگ بیت پہ دور ” گوادر ( جھگیر ) بزاں ھال چَہ بام ھال ءِجھگیر ءِنیمگ ءَ دیگ بوگ ءَاِنت ۔ایشی ءَاھوالکاری زبان ءَ” کریڈ ‘ ‘گوش اَنت ۔ باز رند ءَاھوالکار اد ءَنام ءَنوشتہ کنت ۔ داں کہ مردمانی ھال ءِسر ءَ باور گیشتر بہ بیت ۔ھما وھد ءَپہ اھوالکار ءِ نز ءَ ھال ءِارزش گیشتربیت آ ھال ءَوتی ” کریڈ “ ءَ شنگ کنت پہ درور ” گوادر ( دلوش بلوچ ) ۔ با م ھال ءَ درسیں ھال بام ھال ءِ جھگیر ءِ کریڈ ءَ وتکاریں رنگے ءَ چاپ بنت پہ ایشی ءَ جھگیر ءَ کریڈ دیگ نہ لوٹ اِیت البت اگاں دگہ یکے ءِ ھال ءَ شنگ کنگ لوٹ اِیت گڑا ھمائی ءِ کریڈ ءَ بہ دنت ئِے۔
