اھوالکار ءِ کارراھبند :
٭اھوالکار ، چَہ اِش کرتگیں گپاں گیشتر چم دیستگیں گپانی سر ءَ بھیسہ کنت ۔
٭ اھوالکار ، باوریں مردمانی گپاں وتی ھال ءِ تہ ءَ شنگ کنت ۔
٭ اھوالکار ءِ ھالانی گرینک (ذریعہ ) پہ آئی ءَسک باز اَرزشمند اَنت ۔
٭ اھوالکار ، یک دمگے(اسٹیشن ) ءِ سیمسر انی تہ ءَ کار کنت ءُ آ وتی سیمسرءِ تہ ءَ بیوکیں درسیں ھالاں مالوم بوگ ءِجھد کنت ۔
٭ آ انچیں جاگھاں ءُ مردماں نزیک بیت کہ چَہ آھاں ھال شنگ بوگ یا ھال ودی بوگ ءِ گمان ھست ۔ چوش کہ پریس کلب ، پولیس اسٹیشن ، ھسپتال ، باپارءُ گلگ منڈی ، سیاسی گلانی دیوان ، مھلوک ءِ گزرانی پیلوکنگ ءِذمہ واریں کارگس ، شھرداری ءِ کارگس ءُ دگہ کارگس ۔
٭ اھوالکار ، ھال ءَ اِش کونگ ءِ پجیگ ءَ شنگ نہ کنت ۔ بلکیں آئی ءَ ٹپاس اِیت ۔ باز بر ءَھال ءِ چَہ یک ءَگیشتر تک ءُپھنات بنت ۔ یا بیوکیں کارپد ءِ سر ءَ چَہ یک ءَ گیشتر ھیال ءُ گپ بنت ۔ اھوالکار وتی ھال ءِتہ ءَھردو ھیالاں گستا جاگہ دنت بلے ھما گپ کہ گیشتر مھکم تر بیت یا ھال ءِ لوٹ ءَ پیلو کنت آئی ءَ سھرا (نمایاں ) کنت ۔