ماں اوگانستان ءَ بامیان ءِ ھند ءَ گوتم بدھ ءِ مزن کدیں سنگ ءِ بُت گُشنت کہ یک صد قبل مسیح ءَ بگر تاں دو صد مسیح ءِ میانی سالاں کوشانی بادشاھانی عھد ءَ جوڑ بوتگ اَنت۔ کوشانی بادشاہ یا اشوک اعظم ءَ کہ اے بادشاہاں ھندوستان، سندھ ءُ اوغانستان ءِ بازیں ھنداں بادشاھی کُتگ۔ گُشنت کہ اے بادشاہ ءُ حاکم امن پسند بوتگ اَنت۔ جنگ ءِ ھلاپ بوتگ اَنت۔ ایشاں گوتمی فلسفہ ءِ بنیاد ءَ سیاست کُتگ۔
ھمے ربیت ءَ ، ھمے عھد ءَ تاریخ زانت گندھارا تہذیب ءِ نام ءَ دینت۔ گُشنت کہ کوشانیانی بادشاہت تاں گدروشیا ءِ بازیں ھنداں شاھگان بوتگ۔ یک وھدی مکران ءِ تیابی دمگ ھم کوشانیانی دست ءَ بوتگ ءُ اے دمگاں گوتمی ءُ ھندو مت رنگاں ردوم زرتگ، سنگ ءُ ڈوکانی سرا اے نشان دست کپنت۔
دومی نیمگ ءَ بُت پروشی ءِ تاریخ ھم باز کوھن اِنت۔ خدا دوستیں بت پروشاں ھر عھد ءَ بت پروشی کُتگ، بلے بامیان ءِ بت نہ زاناں کجام سوب بوتگ کہ بت پروشانی کزا ءَ رک اَتگاں، بلے 1998 ءَ امریکی ساخت ءِ ھما ٹوپ ءُ راکٹ لانچر کہ گوستگیں دو  دھک ءَ سوویت یونین ءِ جنگ ءَ خدا ءُ شیطان ءِ جنگ ءَ کارمرز بوتگ اِتنت، یک رندی گوتم بدھ ءِ بے ساھیں بتانی سرا گوارگ ءَ لگ اِتنت۔۔۔
او مرچی ھم بت پروشیں خدا دوستانی کمی کمی نہ انت۔ مصر ءِ سلفی ملا مرجان  سالم الجوھری ءَ  ھمے دزبندی دیما آورتگ کہ بائد ماں مصر ءَ ابوالھول ءِ بت پروشگ بہ بنت، آئی ءَ گُشتگ کہ اسلام بت پروشی ءِ دین اِنت ، احرام مصر ھم پروشگ ءُ گار کنگ بہ بنت، چیاکہ احرام ھم بت پرستی ءِ درچ ءَ کاینت۔ پدا مصر ءَ ملایانی گل  اخوان المسلمین باز زوریں، نو بیت کنت کہ بت پروشی ءِ نوکیں کسہے بندات بہ بیت۔

بت پروشی کی تمنا اب ہمارے دل میں ہے
دیکھنا ہے زور کتنا ، بازوِ کافر میں ہے